1 10:1 Mak 6:7; Luk 9:1Sisas kil akwe tu watnom wampwam yikak wekg alkilen a kil aroaro wonel pa kaintel, atom kil alken titnongket a ak ungkwan maur paipm kimpilpet a, numpet a wleket wrongkwail a tu melnum pa palng wor.

2 Ri kil pa nang a tu melnum wampwam yikak wekg a kil takweien la ukwawen pa. Melnum ep pa Saimon, nang wompel pa Pita. A Antru paipmen a Pita pa, wa Semis ekg paipmen alkil pa Son, warim kipman wekg a Sepeti pa. 3 Wa Pilip, Partolomyu, Tomas, Matyu melnum a pikekg awi marpmel tu, Semis warim kipman a Alpius, a Taitus. 4 Wa Saimon a tu Selot, a Sutas Iskariot, melnum a ikga uk Sisas kai wam a tu wrongmanto.

5 Sisas kil lala ukwa tu watnom wampwam yikak wekg a kil pa kai laron yangkipm akilen pa, atom naki karkurngken la kolkil, “Ampur kipm kai eng tu melnum a ake Suta pa, a kai rka anong wail ur a tu Samaria pa, yaper! 6 10:6 Serem 50:6Kipm kai eng tu melnum a Isrel, tu pa kolen manto walkg malkgu a kai atn palpa. 7 10:7 Mat 3:2; 4:17; Luk 10:9,11Kipm kai laron yangkipm pa laniken la, 'Maur Wailen wreren eng a ikglen ipma a kipm ti.' 8 Kipm kai ntokg tu melnum numpet pa palng wor, melnum a amo wa wrekg, melnum a i paipuk palng wor a ungkwan maur paipm! Kipm awi titnongket pa kalpmlel, kolpa ti kipm ik kalpmel kolti, ampur awi marpm.

9 10:9 Luk 10:4Ampur kipm aye marpm kweikwei pa alupm kinar apm pa. 10 10:10 Luk 10:7; 1 Kor 9:14Ampur kipm aye apmkok pa nakurnum eng alupme apmnung kweikwei pa. Kuina ur wet kipm nowe itna num pa am iye pa kolti. Ampur wa aye apm a nowe, a nepm palk aki yo tuk a ak atnen pa, iyai. Kipm ngkompwam kolti, eng ntei, melnum a aken kwap angklin tu mla ur pa, mpa tu pa ikglentel pake.

11 Kipm kai kawor anong wail aki anong wusok ur pa pipa, kipm ri la melnum ur a wor a kil lkepm wor itopen la kipm ntiwel rpmi pa, kipm ntiwel rpmi kai wang pa plalng pa, kipm nuurng anong pa kipm kai. 12 10:12 Luk 10:5-6Kipm kai kawor wan wunen a melnum ur pa pipa, kipm lken wor kolkil, 'Alkepm wor, Maur Wailen antiwepm rpma.' 13 Kol tu melnum a wan pa uwi wor eng ukwor a kipm alken pa, ukwor akipmen pa ntiwen rpmi. Pake kol ake tu awi wor eng ukwor a kipm alken pa, kipm wa uwi iye yaper kai. 14 10:14 Luk 10:10-12; Kwap 13:51Kol ake melnum ur awi wor eng awiyepm aye kai wan anong, a wa itning yangkipm a kipm la pa, kipm lo nepm mang pa itni pa, pa planten la kalkuten pa itna kai tu alntu pake, a kipm nuurng anong pa, a kipm kai. 15 10:15 Mat 11:24; Sut 1:7Kupm lanakepm aklale wrisen. Ikga ik wang a tu wrong kin a kipman itni yangkipm wail a Maur Wailen pa, ikga Maur Wailen uk wleket waiketn tu Sotom a Komora. Pake ikga kil uk wleket wail manten kai tu anong a uk yirokg kipm, a yangkipm a kipm laron pa.”

16 10:16 Luk 10:3; Rom 16:19Sisas kil la kolpa plalng wa kil wa lanaki tu watnom alkilen a kil aroaro wonel pa la, “Kipm itning, kupm ukwawepm kai kol manto walkg malkgu kai kuin a nimpa tilpmingen. Kolpa ti kipm itni wontrakole kol ul pa. Kipm kunun nikgwalpm ute wor kolen wel punum pa. 17 10:17 Mak 13:9-11; Luk 12:11-12; 21:12-15Kipm itn riwe, eng kol tu melnum ikga uwiyepm iye kai ntokg yangkipm itni tu mring man ikgalen anong pa, a ikga wa kai ik ampei ntrawepm itni wan a kipm atning atning yangkipm a Maur Wailen atnewe. 18 Kipm ikga tu iyewepm kai ntokg yangkipm itni tu mring man wail wail a tu melnum tukgunakg, atnen kipm ak kwap a kupm. Kolpa eng mpa kipm laron yangkipm wor a kupm pa laniki tu melnum wail wail kolpa wa nimpon tu a ake Suta pa. 19 Ik wang a tu iyewepm kai eng ntokg yangkipm pa, ampur kipm ipma kaikut akwonalmpen watipmen la, mpa kipm la yangkipm na aki la kolai pa. Ikga ik wang ketn pa, ikga Maur Wailen lkepm yangkipm atom kipm la pa. 20 10:20 Son 14:26Yangkipmok ikga kipm la pa, ikgake kipm ti la pa, pa ikga Maur Wor a Yan Wailen alkipmen ti a rpma kawor ipma wunen a kipm ti oklala pa.

21 10:21 Maika 7:6; Mat 10:35; Mak 13:12; Luk 21:16Ikga wailen wrekg uk wusok alkil kai wam a tu wrong manto eng tu ilmpel imo. Wa wusok wrekg wa ik kolpa yat kai eng wailen alkil. Tu yantin wa ntokg tu warim alntuwen kolpa yat. Wa tu warim wa plelng uk tu mansan alntu kai tu wrong manto eng tu ilmpen imo. 22 Tu wrongkwail ikga nikgwalpm paipm eng kipm, eng ntei kipm pa a kupm. Pake kol melnum a kil itna titnongket kolpa kaingkai angko wang a plalng pa, ikga Maur Wailen kil uwiyel iye kai rpmi wor. 23 Kol tu orepm ungkwantepm i anong ur pa pipa, kipm ngkirk kai anong ur ai. Kupm lanakepm aklale wrisen. Kipm ake antiwe ikwap a kupm ti kai yela tutu anong wrongkwail a Isrel ti plalng pa, kupm Warim Kipman a melnum pa ikga yaper nar.

24 10:24 Luk 6:40; Son 13:16; 15:20Warim a awi ariwe ti ampake itni ep wailen angen melnum a kaling plantel pa. A melnum a ak kwap kalpmel orngwatneikgen melnum ur pa, ake mpa wa kil itni ep wailen angen melnum yan a kwap pa. 25 10:25 Mat 9:34; 12:24; Mak 3:22; Luk 11:15Ariwe a warim pa mpa kaino repmrepm melnum a kaling plantel pa kolti, pa am apake. Am wa kolpa yat pake, melnum a ak kwap kalpmel orngwatneikgen yan a kwap pa, mpa ikwap repmrepm yan a kwap pa kolti, pa am apake. Pa planto la, tu aknokgel melnum yan a kin watnom a wan wris pa namput la Pelsepul pa, pa ikga wa tu iknokgel kin watnom akilen pa paipm wrisen angen melnum yan a wan pa!”

26 10:26 Mak 4:22; Luk 8:17”Kolpa ti ampur kipm ngkark eng melnum pa. Kuina ur a pikekg aur pa ikga alken kai rmpi wunong. A kweikwei a itna ampen pa, ikga palng kai ngko wunong. 27 Kuina ur a kupm lanakepm ak mining pa, ikga kipm laron kolpa ik ran. Kuina ur a kupm akoo nakepm kai nungkulkg pa, ikga kipm itni tutu akapm wail pa la ik ok wail.

28 10:28 Rom 8:31; Sem 4:12Ampur kipm ngkark eng melnum a alm numpalk amo pa, a ake antiwe mpa ilm amen wor pa imo pa. Pake kol a kipm ngkirk eng melnum a alm yatenen, numpalk a amen wor angkli elng kai anong paipm a awi wleket wakget.

29 Kol melnum ur la iye wel ikrawis wasek paipm wekg la iye kai eng ik uwi marpm pa, ake antiwe mpa uwi marpm wail, pa antiwe mpa uwi ik marpm watet wompel wris pa. Pake pa wail itna wulmpa a Yan Wailen, kil alkil la wel wasek pa la imo pa, antiwe mpa imo. Kalpis pa mpa kalpis. 30 Ti kipm ri, tukgunakg walk wris wris akipmen a itna tukgunakg ti pa kil angkleikg ase. Pa plantepm la Maur Wailen kil ikgalentepm. 31 10:31 Mat 6:26Kolpa ti ampur kipm ngkark. Kipm melnum pa wa wor angen wel ikrawis waseksek pa.”

32 “Mla ur kil a laron kil alkil itna kuin a tu wrongkwail kin a kipman pa la kil akupmen pa, ikga kupm laron kil pa itni wulmpa a Yan akupmen kaino kitnong la kil pa akupmen. 33 10:33 Mak 8:38; Luk 9:26; 2 Ti 2:12Pake mla ur kil lam nang akupmen pa itna kuin a tu wrongkwail kin a kipman pa, ikga wa kupm lam nang a kil pa itni wulmpa a yan akupmen kaino kitnong.

34 Ampur kipm akwonalmpen la kupm kulnar kanokg ti eng ikga kipm rpmi meen wor pa, kolpa kalpis. Kupm nar eng ak aye rapon pa palng. 35 10:35 Maika 7:6Kupm nar eng wako aro kipm itna manman. Warim kipman pa mpa nikgwalpm paipm eng yan alkil. Warim kin pa mpa nikgwalpm paipm eng man alkil. Wa warim kin pa mpa nikgwalpm paipm eng yalmpikg mayen alkil. 36 Wrongmanto pa ikga palng itni wan wunen alkitn pake.

37 Melnum a nikgwalpm wail a kil pa arken man a yan alkil pa, a nikgwalpm wusok a kil pa arken kupm ti pa, kil pa ake melnum wor antiwe a kanun kupm ti. Melnum a nikgwalpm wail a kil pa arken warim kipman a warim kin alkil pa, a nikgwalpm wusok a kil pa arken kupm ti pa, kil ake melnum wor antiwe a kanun kupm pa. 38 10:38 Mat 16:24-25; Mak 8:34-35; Luk 9:23-24; 17:33; Son 12:25Melnum a ake arki yo okgmangki alkilen atom kanuntopm pa, pa kil akentiwe a kanun kupm pa. 39 Melnum a kil la ikglen numpalk a kil ti kolti pa, pa amen wor akilen pa ikga kai paipm. Pake melnum a kil uk num alkil ti kolti eng aken kwap kupm pa, pa amen wor akilen pa ikga rpmi wor yongkyong.

40 10:40 Mak 9:37; Luk 10:16; Son 13:20Melnum a kil awi wor eng kipm pa, pa kil awi wor eng kupm ti, wa nampon melnum a kil ukwa kupm ti nar pa yat. 41 Kol melnum ur kil uk wor melnum okwripm a Maur Wailen eng kil melnum okwripm a Maur Wailen pa, ikga kil uwi kweikwei a akalmpe kwap a kol a melnum okwripm pa awi pa. A melnum a kil uk wor melnum ute wor kai wulmpa a Maur Wailen pa, ikga kil uwi kweikwei a akalmpe kwap a kol a melnum ute wor kai wulmpa a Maur Wailen awi pa. 42 Wa kol melnum ur kil anong u ur uk melnum ur kolti il eng kil watnom alkupm a kupm aroaro wonel pa, kupm lanakepm aklale wrisen la, kil ikgake kalpis eng uwi kweikwei a akalmpe kwap a kil ak pa.”