1 Sisas itna yipmingki wunen a yalming a Maur Wailen pa eng a kul or en pa, watnom ur a kil aroaro wonel pa lanakel la, “Woi, melnum a aroaro wonel men ti, kitn ri yalming wor ti, tu ak wes wail manten manten ak ale!” 2 13:2 Luk 19:44Sisas akalmpentel kolpa la, “Ei, wan wail wor pa, pake ikgake wes ur itni, kalpis. Ikga tu tikale ngkli plalng.”

3 Sisas kil rpma wrik nangen Olip ikg kai ari yalming a Maur Wailen a ela kai wompel ai. Pita, Semis, Son, Antru, tunteng pa kolti antiwel rpma atom tunteng asentel la, 4 “Kitn laniko la, wang a i ikga yalming a Maur Wailen pa topor pa? Kla kuina ikga palngto ep, atom mpa men riwe la, wang am kul wreren tike?”

5 Atom Sisas kil lanaken yangkipm pa la, “Kipm itn riwe! Melnum ur ikga kinsilepm. 6 Melnum watipmen ikga kul uwi nang akupmen ik la la, 'Kupm ti, kupm Sisas.' Ikga tu kinsil kipm wrongkwailet iye kai ar.

7 Ikga kipm itning yangkipm a tu la tu alm tita, a ikga kipm itning milpming a tu almpwrong la kul wreren pa, ampur kipm ngkark! Eng ntei, kweikwei a kolpa ikgam palng pake, wang a kweikwei wrongkwail ti kai plalng pa a pa. 8 Tu anong ur ai ikga wrekg ilm tu anong ur ai. Tu wrong a mring tukgunakg ompur ai ikga wrekg ilm wrong a mring tukgunakg ompur ai. Yelm ikga no, wang nikg wail paipm ikga palng tutu anong kanokg tiur. Kweikwei pa ikga wleket kol wleket a palng ep kai kin a la raku warim pa.

9 13:9 Mat 10:17-20Kipm pa, kipm rpmi riwe! Ikga tu iyewepm kai itni tu mring man alkipm a ikgalen anong pa. Pa tu orepm tutu wan a kipm atning atning yangkipm a Maur Wailen atnewe pa. Pa tu ikwonilmpen la rku nang akupmen. Wa ikga kipm itn ikwap akupmen ti, atom ikga tu iyewepm kai itni wulmpa a tu mring man wail wail, a tu melnum tukgunakg a itna ep. Pa ikga palng kol ya ur eng kipm laron yangkipm wor a la kupm ti niken eng tu itning. 10 Ep pa kipm ngkli yangkipm wor a la kupm ti kai niki tu yela kanokg ti plalng pa, wang a kweikwei wrongkwail ti kai plalng pake. 11 13:11 Luk 12:11-12Ik wang a tu uwiyepm iye kai eng ntokg yangkipm pa, ampur kipm nikgwalpm kaikuten la, kipm ikga la kolai pa. Maur Wor a Maur Wailen ikga ngklin nikgwalpm wrongkwail eng kipm ik la yangkipm pa. Eng ntei, ikgake kipm ti laron pa, kalpis. Ikga Maur Wor alkil ai laron ai. 12 13:12 Mat 10:21Ikg a tu wusok wusok uk wailen alntu kai wam a tu wrongmanto, eng tu ilmpel imo. Tu yantin ikgam ntokg kolpa eng tu warim alntu pake. Tu warim ikgam ilmpor tu mansan alntu pa kolpa yat pake. 13 13:13 Mat 10:22; Son 15:21Kol kipm ukipma kupm pa, ikga tu wrongkwail nikgwalpm wakget eng kipm pa. Pake mlaur a kil itna titnongket kai ngko wang wulompen pa, pa ikga Maur Wailen kil uwiyel.”

14 13:14 Tani 9:27; 11:31; 12:11”Ikg a kipm ri kweiur paipm wrisen a numkropise kamel pa itni kawor wrik a Maur Wailen amprin eng kil alkil pa. Ti melnum a kil angkleikg yangkipm wrkapm kil a Sisas la pa, kil ikwonilmpen pa riworwor! Kipm ri palng pa, la ampake. Kipm wrong kin kipman a rka anong kanokg a Sutia pa kipm ngkirk kaino nang ai! 15 13:15 Luk 17:31Kol melnum ur ikga rpmi kawor wan male pa, ampake kil wa kawor wan wunen pa eng uwi uwi kweikwei tiur alkil pa, mpa kil kai or yawel kolti kai! 16 Wa kol melnum ur ikga kai ikwap itni wring alkil pa, ampur kil wa yaper kul uwi apm nung alkil kul anong pa, kalpis, kil i pa kai pake! 17 13:17 Luk 23:29Arein eng tu kin a itna, a tu mantin a warim rka ma ikga ik wang pa! 18 Kipm laniki Maur Wailen eng kweikwei pa ikgake palng ik wang a u awei pa! 19 13:19 Tani 12:1; Amp 7:14Ikg a ik wang pa kipm ikga rki kalkuten wail paipm. Pekg ep Maur Wailen antokg kitnong a kanokg pa, pekg ake kalkuten ur kolpa palng ep kulngkul wang ti, kalpis, a pa, a kutnukg pa ikgake wa kalkuten ur kolpa wa palng. 20 Kol Maur Wailen pa ikgake rukge wang a kalkuten pa kai tukwok pa, tu wrong kin kipman pa ikga kai paipm plalng. Pake kil arein tu wrong kin kipman alkil pa, kolpa atom kil ikga rukge wang pa kul tukwok.

21 Ik wang pa melnum ur la lanikepm la, 'Kipm ri, Krais, melnum a Maur Wailen ukwa nar pa, rpma ti', aki 'Kipm ri, Krais, melnum a Maur Wailen ukwa nar pa, rpma kai ai.' Ampur kipm atning yangkipm a tu la kolpa. 22 13:22 Amp 13:13Melnum tiur pa ikga kinsil la kolpa, 'Kupm Krais, melnum a Maur Wailen ukwa nar. Kupm melnum ok wripm a Maur Wailen.' Ikga tu elng kla tiur itna ik plan titnongket alntuwen, wa ntokg kweikwei manet manet ur ai a ikga melnum wrekg paipm eng ri pa. Aklale wrisen, tu ntokg la lok rku tu wrong kin kipman a Maur Wailen eng la tu ngko. 23 Kolpa ti kipm itn riwe! Kweikwei wrongkwail pa am pekg kupm lanakepm ike.”

24 13:24 Aisaia 13:10; Soel 2:10,31; 3:15; Amp 6:12-13”Wang a kalkuten wail pa kai plalng pa, ikga ik wang pa takgni pa ikga kai miningket a kainil pa ikgake len. 25 Kormeim ikga nurku ngko, a kweikwei wrongkwail kaino kitnong pa ikga titu plalng. 26 13:26 Amp 1:7Ik wang pa ikga tu ri Warim Kipman a Melnum ikga ingkaino kitnong pa nar nimpokgen waipmunu, a nimpokgen nang wailen a titnongket wail. 27 13:27 Mat 13:41Ik wang pa kil ikga ukwa tu maur akwapel alkil pa nar, eng tukwem uwi tu wrong kin kipman a pekg kil takweiyen eng kil alkil pa. Ikga kil uwiyen yela kai tutu kanokg yiprokgen a kitnong yiprokgen ai.”

28 “Kol kipm riwe yangkipm kla a la yo kampuk: wam alkil pa u rke a yo ipm pa inip no wulkga pa, pa kipm riwe la takgni eng a wor pake. 29 Am kolpake, ikga kipm ri kweikwei kalkuten pa palng pa, kipm riwe la, wang am kul wreren itna yamping a tike. 30 Kupm lanakepm aklale wrisen: kipm wrong kin kipman a rka ti, tiur akipmen pa ikga imo, a tiur akipmen pa ikga rki kolpa kai, kweikwei wrongkwail pa palng. 31 Kitnong a kanokg ti ikga kai plalng, pake yangkipm akupmen pa ikgake kai plalng, ikgam itna kolpa kai pake.”

32 “Melnum ur ake ariwe wang a ikga kweikwei pa palng pa. Tu maur akwapel a Maur Wailen kaino kitnong pa, tu ake wa ariwe wang pa. Warim Kipman pa kil ake wa ariwe wang pa yat. Yan kil alkil wris ata kil ariwe wang pa.

33 Kipm rpmen rpmi, wonrpme nungkulkg lan! Kipm akwekgel wang a i ikga kweikwei pa palng. 34 Pa ikga kol melnum ur a atnurng wan anong alkilen kai atn or kol ur ai. Kil uk wan anong kweikwei tu melnum akwapel alkilen la tu ikglentel, a kil ampreing kwap pa ak nirake tu melnum wris wris. Wa kil wa lanaki melnum a arpmen yipmingki yun pa la kil rpmi nungkwangentel rpmi! 35 13:35 Luk 12:38Kolpa ti kipm rpmen riworwor! Kipm akwekgel wang a i mpa melnum yan a wan pa wli. Mpa kil wli ik nungkurikg aki, mining kuin aki, ik karek lala aki, ik kong wor wor aki, kipm ake ariwe. 36 Kol mpa kil wli penterngen ari kipm okg rmpa pa paipm. Kolpa ti kipm rpmi nungkwangen! 37 Yangkipm a kupm lanakepm ti pa, pa yangkipm a ak angklin wrongkwail: kipm rpmi wonrpme nungkulkg lan!”