1 16:1 Mat 12:38; Luk 11:16Tu melnum a arpmen yangkipm yiprokgen a Moses a tu Satyusi tu kul eng Sisas pa. Atom tu aknukwar akor nikgwalpm a Sisas pa la kil laron kwei ur pa niken. Tu lanakel la, “Kitn elng kla ur itni ik plan titnongket a Maur Wailen pa, eng men ri la Maur Wailen alkeitn titnongket aki.” 2 Ari Sisas akalmpe ok atuwen pa la, “Nungkurikg pa takgni yipuken pa aner watet pa, ikg pa ikga takgni wor. 3 Wa or kong pa takgni pa aro tangkoren a elng nar mining pati plan kolen la u mpa wei. Pa aklale, kipm ariwe kitnong a plan u a takgni pake, kweikwei a palng ak wang ti pa, pa ake kipm ariwe la pa akla kuina. 4 16:4 Mat 12:39; Luk 11:29Kipm wrong kin kipman a wang ti pa, kipm paipm a uk yirokg Maur Wailen kolen kin a angkli arkul kipman ur pa. Kipm akor la ri kla ur a ik plantepm titnongket a Maur Wailen pake, mpa kalpis. Ikga kipm ri kuina ur pikekg palng ep eng Sona, a ur manet pa kalpis. Pa kol kla a Maur Wailen ikga elng itni ik plantepm titnongket akilen pake.” Kil la kolpa plalng kil naurngken kai.

5 Sisas anti tu watnom alkil a kil aroaro wonel pa awi nim ukupuken pa angket kai wompel ai. Pa tu watnom alkil pa woniketen nok tingklak wet la mpa uwi iye pa. 6 16:6 Luk 12:1Ari Sisas lanaken la, “Kipm uk ikg riwe itni watin tukwleikgen nikgwalpm a tu melnum a arpmen yangkipm yiprokgen a Moses a tu Satyusi pa: tu pa kansil plan ak num enen ti kolti, pa kol mpim ap mringen a ak oren kai or arpme nok ti plalng, atom angki wail.” 7 Tu alntu watnom a Sisas pa akor la itna kuin alntuwen pa la, “Ati kil la yangkipm pa eng ake mentepm aye nok tingklak ur aye kul.” 8 Ari Sisas kil ariwe kuina ur a tu la pa atom kil lanaken la, “Ake kipm ukipma kupm ti itna titnongket, atom wa kipm akor la watipmen la nok tingklak pa kalpis pa. 9 16:9 Mat 14:17-21Ake wa kipm ariwe? Ake kipm akwonalmpen nok tingklak wampwomis pikekg kipm ampreing uk tu melnum watipmen paipm kamel kamel (5,000) pa, a umpu umpu pikekg kipm alupm nimong watipmen pik pik pa? 10 16:10 Mat 15:34-38Kipm ariwe nok tingklak wampwomis wampwompwekg pikekg kupm kapor ampreing uk tu melnum kamel kamel (4,000) pa al aki? Ti nok tingklak umpu umpu pa pikekg kipm alupm nimong aripm? 11 Kipm ti ake ariwe yangkipm yiprokgen na a wet kupm la pa. Kupm ake wet la nok tingklak pa, kupm wet la kipm itn wonrpme eng mpim ap mringen a tu melnum a arpmen yangkipm yiprokgen a Moses a tu Satyusi a ak oren nok tingklak eng angki pa.”

12 Kolpa atom tu ariwe a kil la pa lala, ake kil la mpa tu itn wonrpme eng mpim ap mringen a tu ak oren nok mringen pa eng angki pa, kalpis. Kil la tu itn wonrpme ikglen tu alntu eng yangkipmok a tu melnum a arpmen yangkipm yiprokgen a Moses a kaling plan tu, a wa yangkpmok a tu Satyusi pa.

13 Sisas kil kai anong kanokg a Sisaria Pilipai. Ak wang pa kil asen tu watnom alkil a kil aroaro wonel alkilen pa la, “Kipm atning tu wrong kin a kipman la Warim Kipman a Melnum pa mla?” 14 16:14 Mat 14:1-2; Mak 6:14-15; Luk 9:7-8Atom tu la, “Tu pa la kitn melnum ur a pikekg amo atom wa wrekg. Tu tiur pa tu la, pa kitn Son a pikekg kaluk tu. A tu tiur pa wa la, pa kitn Elaisa. Wa tu tiur pa la, pa kitn melnum okwripm Seremaia, aki kitn melnum okwripm ur ai.” 15 Atom Sisas kil la, “Ti kipm ti la kupm ti kupm mla?”

16 16:16 Son 6:69Atom Saimon Pita pa akalmpe la, “Pa kitn Krais, kitn Warim Kipman a Maur Wailen a rpma yongkyong.”

17 16:17 Kal 1:15-16Ari Sisas kil akalmpe la, “Saimon, alkeitn wor, kitn warim kipman a Sona. Eng ntei, nikgwalpm ariwe pa ake melnum ur a kanokg ti alkeitn pa, kalpis. Nikgwalpm ariwe pa mpam Yan akupmen kaino kitnong pa alkeitn pake. 18 16:18 Son 1:42; Epe 2:20Pita kitn pa kolen wulkging. Ikga kupm uwi uwi tu wrong kin a kipman iye kul eng kupm ti kolen kupm ale wan akupmen ti eli wulkging pa. Ti wrik om a tu melnum a ake ukipma amo kai arke arke pa ake antiwe titnongket a tikale wan pa. 19 16:19 Mat 18:18; Son 20:23Mpa kupm lkeitn titnongket a ikgalen ampei umpu a wanyun a kweikwei wrongkwail a Maur Wailen kil ikgalen pa. Kitn ngkuten itni kanokg ti pa, Maur Wailen wa ngkuten kaino kitnong ai. Kitn inelkgen itni kanokg ti pa, Maur Wailen wa inelkgen kaino kitnong ai.” 20 Kil lanaki Pita oklala pa plalng pa, kil lanaki tu watnom alkil pa la, “Ampur kipm laron naki tu wrong kin a kipman pa la kupm pa Krais pa, yaper.”

21 Angko wang pa aye kai pa, Sisas kil la alupm alupm naki tu watnom alkil a kil aroaro wonel pa la, “Ikga kupm kai anong wail Serusalem pa ep atom ikga tu melnum wailen, a tu tukgunakgen a tu ipma krakgen a ak ak kwap eng al wor uk Maur Wailen, a tu melnum a aroaro wonel tu yangkipm a Moses, ikga tu ntokg kupm ti rki kalkuten wail, a wa oropm imo rmpi wang wraur plalng pa, kupm wa wrekg.”

22 Pita kil atning kolpa, kil epilng Sisas pa aye kai itna laikge atom kil angkengkel la, “Ai Wailen, kupm karken kitn antokg kolpa. Kwei ur kol wet kitn la pa ampur palng eng kitn pa.” 23 Sisas kil wa atning kolpa, kil plelng won la Pita pa lanakel la, “Maur Paipm Satan, kitn itni tukwelkg kupm ti! Kitn pa kol yopmiri ur a ak lawopm nepm eng la kupm ngko. Eng ntei, nikgwalpm pa ake a Maur Wailen pa, pa nikgwalpm a melnum.”

24 16:24 Mat 10:38; Luk 14:27Atom Sisas lanaki tu watnom alkil a kil aroaro wonel pa la, “Kol melnum ur la kul kunun kupm ti pa, kil mpa elngen a kanun nikgwalpm alkil pa, a kil mpa rki yo okgmangki alkilen pa, atom kil kul kununtopm. 25 16:25 Mat 10:39; Luk 17:33; Son 12:25Melnum a kil la ikglen numpalk akil ti kolti pa, pa amen wor akilen pa ikga kai paipm. Pake melnum a kil uk num alkil ti kolti eng aken kwap kupm pa, pa amen wor akilen pa ikga rpmi wor yongkyong. 26 16:26 Mat 4:8-9Kol melnum ur kil uwi kweikwei wrongkwail a itna kanokg ti, atom amen wor a kil pa ikga kai paipm. Ti mpa wa kweikwei wrongkwail a kanokg pa mpa wa ik ngklin amen wor a kil pa la kolai? Melnum pa mpa wa kil ik marpm kolai ik rmpen amen wor alkil pa iye kul wor kolai? 27 16:27 Nang 62:12; Nimnol 24:12; Mat 25:31; Rom 2:6; Amp 22:12Kol Warim Kipman a Melnum ikga nar nimpon titnongket a nang wailen a Yan alkil a nimpon tu maur angklin alkilen. Atom ikga kil ikilmpe uk kweikwei kai melnum wris wris kitila kwap a kil ak pa. 28 Kupm lanakepm aklale wrisen, kipm tiur a itna ti pa kipm ikgake imo, kipm ikga rki kolpa rki, atom ikga ri Warim Kipman a Melnum ikga nar kolen melnum tukgunakg a ikgalen kweikwei wrongkwail. Kipm rki ri pa plalng pipa, kipm imo kaingkai.”