1 2:1 Kol 1:21; 2:13Pikekg ep pa, kipm pikekg kai ar antokg paipmpaipm, atom Maur Wor akipmen pa am pikekg amo ise. 2 2:2 Kol 3:7; Tai 3:3Aklale, pikekg ep pa kipm pikekg katnun ya paipm wrongkwail a itna kanokg ti, katnun maur paipm a itna wailen ikgalen yela kitnong a kanokg ti. Am maur paipm wris pake akwap rpma kawor ipma a tu wrong kin a kipman a talpulng yangkipm a Maur Wailen pake. 3 2:3 Kol 3:6Ti men ti pikekg rpma kolen kipm pa. Mentepm wrongkwail pikekg katnun nikgwalpm tingklaket paipm almentepm ti, atom antokg kuina ur a num a mentepmen ti wasrongen, kolen kirkokget a melmelen eng la il kweikwei tiur, wa nikgwalpm amentepmen rka la mentepm ntokg kuina ur a paipm pipa, mentepm antokg. Mentepm antokg kuina ur katila kol tu kin a kipman wrongkwail pa. Ti mentepm pikekg palng man rakuwo nampokgen paipmpaipm, kolpa atom mentepm itna ipma wakget a Maur Wailen la mentepm ikga uwi paipm.

4 2:4 Rom 6:11-13Pake ipma arein a Maur Wailen a itna eng mentepm pa wail manten paipm ai, atom ari kil plan ipma wor wasrongen mentepm ti wrisen. 5 Aklale, mentepm antokg paipmpaipm atom mentepm am pikekg kol a amo ise. Pake Maur Wailen kil antokg mentepm pa anti Krais wrekg rpma, atom mentepm palng weten. Kil alkil pa planto ipma wor pa ak angklinso, atom akawiyo aye yaper kul eng alkilen. 6 2:6 Kol 2:12Maur Wailen la mentepm a pikekg kol am amo ise, pa wa wrekg anti Krais Sisas pa rpma. Atom kil ak wrik wor kaino anong wor pa ak namput mentepm ti, atom mentepm kol rpma nampokgen Krais Sisas pa rpma pa rpma pake. 7 Maur Wailen kil wor wrisen eng mentepm ti, atom kil ukwa Krais Sisas kil narnto. Kil ak kolpa eng la ik plan tu melnum ak wang ti wa ikga ik wang kutnukg wa iye or pa kai la ipma wor akil a kil ak angklinso pa wail manten paipm or kai ai. 8 Kipm ukipma Maur Wailen pa, atom ipma wor a Maur Wailen kil alkil pa akawiyepm kai paipm a kipm antokg pa yaper kul kai wor. Pa ake kipm ti antokg kuina ur atom kil ak awiyepm pa, kalpis. Pa ipma wor a kil alkil ai kolti ak awiyepm. 9 2:9 1 Kor 1:29-31; 2 Ti 1:9Ake ak awiyepm atnen kwap aki kuina ur wor a kipm antokg, eng mpa kipm wam rki nol ngkit nang alkipm pa, kalpis. 10 2:10 Tai 2:14Maur Wailen kil antokg mentepm ti la mentepm rpmi nimpokgen Krais Sisas, itn a rpmi a ikwap kitila nikgwalpm wasrongen a pikekg kil alkil yapon ep ai, la mpa mentepm kutnun ikwap wor kolpake.

11 Kipm ariwe la, men Suta pa men angket num. Pa melnum ti ak ak wam a melnum ti kolti. Wa tu akwe kipm ti la, kipm ti melnum a ake angket num pa. Kolpa ti kipm ti riwe o, kipm ti ake Suta pa. 12 2:12 Rom 9:4; Kol 1:21Pikekg ep pa, kipm pikekg itna manet takwleikgen Krais pa. A mpa kipm ukipma rpmi nungkwangen mla a i, kipm Maur Wailen kalpisen a itna kanokg ti. Wa Maur Wailen kil yapon yangkipm titnongket a wa lam kla nampokgen men Isrel pake, a kipm ti pa kipm kolen melnum yawen atom kipm ti kalpis. 13 2:13 Kol 1:20Kipm pikekg ep pa, kipm am pikekg itna watin kolpake. Pake ak wang ti pa, walmpopm a Krais Sisas kil akawiyepm aye kul kai wreren Maur Wailen pake. 14 2:14 1 Kor 12:13Pikekg ep pa, men Suta a kipm a ake Suta pa, mentepm pikekg wrong manto eng tita. Pikekg kol yipmingki watin ur ak angketen mentepm itna man man. Ari Krais pa kil kla tarmpupm wrokgen amentepmen a ak arku angkeng ipma wakget amentepm pa kai kupuk wor or wris ore tita. 15 2:15 Kol 2:14Krais kil ungkwan yangkipm titnongket a Moses, a angklon ake, a yangkipm tiur a pikekg men Suta yapon pa a pikekg ak angketen mentepm itna man man pa, eng la ik uwi mentepm om wekg pa iye kai or wris pa kolen melnum wris ata. Kil lam kla atom kil antokg mentepm om wekg pa ipma wris ore tita rpma nampokgen ipma meen wor om. 16 2:16 Kol 1:20,22Krais kil uk num alkil amo kai yo okgmangki pa, atom kil ungkwan ipma wakget a mentepm om wekg awi wrong manto lan tita pa kai plalng. Atom mentepm palng kolen melnum wris, wa ak angketen ipma wakget a Maur Wailen itna eng mentepm pa kai plalng, atom mentepm kai ipma wris a or wris ore tita. 17 2:17 Aisaia 57:19Krais kil nar eng laron yangkipm wor a kil antokg kipm a ake Suta a rka kai watin pa, a men Suta a rka wreren ti mentepm ipma meen wor or wris. 18 Krais kukwa yalming yun pa atom mentekg om wekg pa mentekg antiwe a awi Maur Wor wris ti yatenen kawor eng Yan amentekgen pa.

19 2:19 Epe 3:6Kolpa ti kipm a ake Suta pa, kipm ake melnum yaworen ur aki yawen a angkol ur ai wli ela pa, kalpis om. Ak wang ti pa, kipm am palng wrong kin a kipman a Maur Wailen, kipm kolen kipm alkipm melnum mreren a rka wris a pake. Kipm kolen nan watnom a rka wan wris a Maur Wailen. 20 2:20 1 Kor 3:11Kipm pa kolen ampei wanteng, a wark, a tangkurong a ak ale wan pa. A men melnum wokgen akwapel a Krais a Maur Wailen takweiyo, a tu melnum okwripm a Maur Wailen pa, tu pa kolen ong tangklepen pa. A Krais Sisas kil alkil pa pati, kil ong kimpowen wor wrisen a wan pa elawe pake. Wan arum elawe wa angkon kling pa, pa am wli almpatne itna ong kimpowen pake. 21 2:21 1 Kor 3:16Krais pa kil ong kimpowen wor a ngkat wan pa aye itna tongtong. A tu arum angkon klingkel naren ake itna man pa ak wutneik ale a ore tangklepel, angket yun ar. Plalng pa, wan pa mpa palng kol a yalming klalen wor a Wailen. 22 2:22 1 Pi 2:5Atom Maur Wailen awi kipm pa yat wa nampokgen men wrong kin a kipman alkilen ti kai ak ale wan wris ela ong kimpowen, pa am Krais pake. Atom kipm palng kol yalming a Maur Wor a Maur Wailen arpme.