1 Kupm Pol, kupm pikekg Maur Wailen kil ak wasrongen alkil ai takweiyopm la kupm melnum wokgen a Krais Sisas. Kupm ti nampikgen Sostenes melnum almentepmen a mentepm ukipma Krais Sisas pa, 2 mentekg nira wrkapm kil eng kipm wrong kin a kipman a Maur Wailen a kaingkai takwem rka anong Korin, kipm a pikekg Maur Wailen anel Krais Sisas pa kol kla ak amprinsepm eng alkilen, kipm a pikekg kil rkantepm la kipm itni wriwen wor, kol a pikekg kil ak amprin a rkan tu kimeket a kaingkai takwem rka anong wrongkwail yela a naren Sisas Krais pa la, kil Wailen a tu, kol a mentepm narentel la kil Wailen amentepmen pa. 3 Kupm oklala naki Maur Wailen Yan amentepmen nampikgen Wailen Sisas Krais, eng mpa tuwekg plantepm ipma wor atuwekg pa a lkepm ipma meen wor kolpa iye kai.

4 Kipm rpma kawor Krais Sisas pa, atom Maur Wailen akupmen pa plantepm ipma wail wor alkil a angklinsepm pa, kolpa atom akangklei kupm alkel wor eng kipm pa. 5 Kipm rpma kawor Krais Sisas pa, atom Maur Wailen plantepm ipma wail wor alkil pa, atom ari kil alkepm kweikwei wrongkwail angko angen. Kweikwei kol yangkipm wrongkwail alkilen pa kil antokg kipm antiwe laron ariworwor. Wa kol yangkipm yiprokgen wrongkwail alkilen pa kil antokg kipm ariwe worwor. 6 Kipm katnun nikgwalpm ariwe wor wor kolpa pa ak titnongketel yangkipm wor a pikekg men laron Krais nakepm pa la, pa yangkipm aklale. 7 Maur Wailen plantepm ipma wor alkil kolpa ti ake kipm tukwok eng ariwe, a titnongket ur a ak ak kwap auraur a Maur Wor pa ak wang a kipm rpma nungkwangen Wailen Sisas Krais amentepmen ti, eng la kil nar ngko wunong pa. 8 1:8 1 Te 3:13; 5:23Wa Maur Wailen mpa lkepm titnongket, kolpa kaingkai, kai ngko wang a plalng ai, atom ikga ik wang a Wailen Sisas Krais kil nar la ikilmpe kuina ur wrongkwail a mentepm ak itna kanokg ti, ikgake tu ur lawepm la kipm antokg paipm ur pa kalpis. 9 1:9 1 Te 5:24; 1 Son 1:3Am Maur Wailen kil alkil pa pikekg akwewepm aye kai orwris nampokgen Warim Kipman alkilen Sisas Krais, Wailen amentepmen. Kil akangklei antokg kuina ur a kil la ntokg pa, ake mpa kalpis pa. Kolpa atom ari kil ikga ik titnongketelepm pa.

10 1:10 Pil 2:2Kolpake, kipm melnum alkupm a mentepm ukipma Sisas, kupm naren Sisas Krais, Wailen almentepmen pa, atom kupm tilpepm titnongket la, ampur kipm wako aro kipm alkipm pa itna manman pa, i ai. Kipm la la yangkipm ok pa, kipm la or wris kolti, kipm kai or wris lupm nikgwalpm wris kolti eng kuina ur a kipm ukipma a kuina ur a kipm la ntokg pa. 11 Kupm la kolpa eng tu tiur a Kloi*1:11 Kloi pa nang a kin. a antiwel rpma wan wris pa pikekg lakati nakopm yek kimeket la la, kipm melnum alkupmen a mentepm ukipma Sisas pa kipm akle tita. 12 1:12 Kwap 18:24-28; 1 Kor 3:4Kuina ur kupm la mpa la pa pati, itna kolkil la: tiur akipmen pa la kolkil la, “Kupm kil pa a katnun Pol”, wa ur pa la, “Kupm kil pa a katnun Apolos”, wa ur pa la, “Kupm kil pa a katnun Pita†1:12 Nang Pita pa ak ok Aramea pa namput la Sipas.”, wa ur pa la, “Kupm kil pa a katnun Krais.” 13 Ti Krais ti watipmen ur atom mpa wa kipm wako iro ikuwiye kipm alkipm ti, aki? Ti kupm Pol ti pikekg tu karkurngkopm rka yo okgmangki ti akarmpen kipm pa ur pake? Aki pikekg tu naren kupm ti kalukepm tike? 14 1:14 Kwap 18:8; Rom 16:23Kupm ukwor Maur Wailen atnen a pikekg kupm ake kaluk kipm melnum watipmen a Korin pa kalpis, kupm kaluk Krispus ekg Kayas wekg ata kolti, 15 kolpa ti ake ntiwe mpa melnum ur lala, “Men pikekg tu naren Pol pa kaluko pa.” 16 1:16 1 Kor 16:15Wet kupm la kupm kaluk Krispus ekg Kayas wekg pa kolti, a'a, ake wa kupm kaluk tuwekg pa wris pa, wa Stipen nampikgen tu a rka wan wris akilen pa yat, pa pikekg kupm kaluken pake. Pake wa or pa kai pa ake kupm ariwe la kupm kaluk tiur aki kalpis. 17 Krais ake pikekg ukwa kupm ti la kupm kuluk tu melnum pa. Kil pikekg ukwawopm eng la kupm laron yangkipm wor a laron kil pa. A ake lala kupm la ik nikgwalpm ariwe a melnum ak laron yangkipm itna kanokg a ti pa, kalpis. Kol kupm laron ik ariwe a melnum pa, pa mpa ik ungkwan titnongket a yangkipm a la kil pikekg amo rka yo okgmangki pa kai kalpis kolti.

18 1:18 Rom 1:16Tu melnum a angkom or ya a ikga tu kai paipm pa, tu atning yangkipm a la Krais amo rka yo okgmangki pa, tu la, pa yangkipm titno ur kolti. Pake mentepm melnum a angkom or ya a Maur Wailen akawiyo eng alkilen la ikga mentepm kai wor pa, mentepm ariwe la pa yangkipm wor titnongket a Maur Wailen am pake. Kolpa atom ari kupm wuten lanakepm la yangkipm wor a la Krais pikekg amo rka yo okgmangki pa antiwe titnongket a Maur Wailen. 19 1:19 Aisaia 29:14Ti nikgwalpm ariwe a kanokg pa ake wor eng ak ari la yangkipm a la Krais amo rka yo okgmangki pa la pa yangkipm titno aki yangkipm wor. Kolen yangkipm a pikekg Maur Wailen la atom tu nira ela wrkapm alkil pa la, “Ikga kupm ungkwan ariwe a tu melnum ariwe pa, wa ikga kupm ngketen nikgwalpm wontrakole a tu melnum nikgwalpm umpen pa.” 20 1:20 Sop 12:17; Aisaia 19:12; 33:18; 44:25Wrkapm pa la kolpa ti mpa wa mentepm la tu melnum a nikgwalpm ariwe watin a kanokg ti la kolai? Mpa wa mentepm la tu melnum a arpmen yangkipm yiprokgen a Moses ti la kolai? Mpa wa mentepm la tu melnum nimnol arke a ak yangkipm rapon rapon ti la kolai? Tu melnum kolpa ikga ik ariwe alntu a kanokg ti ik ngklinsepm la kolai? Pa kalpis. Maur Wailen elngen Krais amo rka yo okgmangki, atom ak antokg nikgwalpm ariwe wrongkwail a la itna kanokg ti pa la pa titno kolti.

21 1:21 Mat 11:25Nikgwalpm ariwe a Maur Wailen pa watin mleing, kolpa atom kil antokg tu melnum ariwe a kanokg ti ake antiwe mpa tu ik ariwe a tu alntu ti riwe Maur Wailen pa. Tu pa awi paipm uk yangkipm a kupm a tu kwapwris akupmen laron pa la, pa yangkipm titno paipm ur kolti. Pake nikgwalpm wasrongen a Maur Wailen pa atom wa kil plelngen yangkipm a tu awi paipm uk pa, pa wa palng wontrakole wor a kil la ik uwi tu a ukipma pa iye kul kai eng alkilen. 22 Pake tu a men Suta a atning yangkipm a kupm a tu kwapwris akupmen laron pa, tu la ik wulmpa ri kweikwei weten weten a palng ak titnongket a Maur Wailen pa, pa tu ukipma pake. A tu a kipm a ake a Suta a atning yangkipm a men laron pa tu la itning yangkipm a ak nikgwalpm ariwe watin a melnum ok wail ti laron pa pipa, tu ukipma pake. 23 1:23 Rom 9:32; 1 Kor 2:14Tu pa la itning yangkipm kol pake, a kupm a tu kwapwris akupmen ti pa, men laron Krais a pikekg amo rka yo okgmangki pa. Atom tu a men Suta pa atning yangkipm pa, pa tu la pa ake planten titnongket a Maur Wailen, yangkipm pa kol wes ur a tu kai al nepm atne pa. A tu a kipm a ake Suta pa atning yangkipm pa, pa tu la pa yangkipm titno ur kolti. 24 1:24 Kol 2:3Pake men a Suta aki, kipm ake a Suta aki, mentepm kimeket a pikekg Maur Wailen akwewo ti pa, mentepm ari angko wunong la Krais amo rka kaino yo okgmangki pa am titnongket a ariwe wail manten a Maur Wailen ampake. 25 1:25 2 Kor 13:4Nikgwalpm titno a tu melnum akwonalmpen la Maur Wailen antokg titno pa, pa kil antokg wontrakole wor angen nikgwalpm ariwe a melnum ti. Wa tu ari la kwap a Maur Wailen ak pa la ake antiwe titnongket pa, ari kwap pa antiwe titnongket wail manten angen titnongket a melnum ti.

26 1:26 Mat 11:25; Sem 2:5Ti kipm ri, kipm melnum alkupm a mentepm ukipma Krais, kipm ikwonilmpen a pikekg Maur Wailen akwewepm ep pa atom kipm kai ukipma pa, kol mentepm melnum ti ari la tita pa ake pikekg wailet tiur akipmen ti melnum a awi ariwe pa aki, melnum a nang arke aki, melnum tempil a anong ur pa, kalpis. 27 Pa ake kolpa, kol kilke: Maur Wailen kil angklo awi tu melnum lngkep titnowen itna wulmpa a tu melnum ariwe a kanokg ti, eng la uk numpaipm tu melnum ariwe a itna kanokg ti. A kil angklo awi tu melnum a tu ari la tu pa ake antiwe titnongket pa, eng la uk numpaipm tu melnum a antiwe titnongket pa. 28 Kil angklo awi tu melnum a tu a itna kanokg a ti ari elukgen la pa tu melnum a ake itna tempil a anong ur, a tu melnum wor paipm a nang kalpisen. Nikgwalpm a Maur Wailen pa kil antokg kolpa, eng mpa ik ntokg tu melnum wor wail wail nang arke pa palng kol tu melnum wor paipm a nang kalpisen pa. 29 1:29 Epe 2:9Kil angklowe awi tu melnum a kolpa eng melnum ur ake antiwe mpa wam rka nol itni wulmpa a Maur Wailen pa. 30 1:30 Serem 23:5-6Pake kipm ti pa, kipm antiwe rpma kawor mrangkum a Krais Sisas pa atnen kuina ur a Maur Wailen kil antokg eng kipm pa. Mentepm rpma kawor mrangkum a Krais pa atom mentepm awi nikgwalpm ariwe a Maur Wailen alko pa. A wa Krais pa kol kla a ak amprinso eng Maur Wailen, wa atnen kwap a pikekg Krais kil ak pa Maur Wailen kil ariwo la mentepm ti wa ute wor kol Krais pa, wa Krais kil armpen mentepm ti aye yaper kul wirng no itna kukula wor. 31 1:31 Serem 9:23-24Kolpa ti mentepm kitila yangkipm a ela wrkapm a Maur Wailen pa lala, “Mla ur kitn la itop ik la mla ur pa pipa, kitn itop ik la Wailen wris ita kolti.”