1 3:1 Kwap 17:15Minto ti nikgwalpm pilpilen arken kipm pa rpma kolpa rpma, atom ake antiwe mpa minto rkul ipma pa rpmi, atom minto akwonalmpen la kai riwepm pake. Minto rpma la wris la mentekg Sailas pa rpmi anong Atens kilke, 2 3:2 Kwap 16:1-3a mentekg ukwa paipmen almentepmen Timoti pa kai riwepm. Kil pa melnum akwapel a Maur Wailen a laron yangkipm wor a la Krais pa. Am mentekg ukwa kil pa kai la ngklinsepm nikgwalpm wor wor a ik titnongketel kipm pa. 3 3:3 2 Ti 3:12Eng ampake kalkuten a wleket a tu alkepm pa rkuwepm atom kipm ngko yaper kai pa. Ti kipm alkipm ariwe pa, mentepm ukipma Maur Wailen pa, kalkuten a wleket kolpa pa mpa palngto palngto pake. 4 Aklale, ak wang a pikekg minto antiwepm rpma pa, minto pikekg lanakepm oren kong la tu ikga lko kalkuten a wleket kolpa. Ti kipm ari pa, ti am palng katila kolpake. 5 Ti kupm ipma kalkut kolpa eng kipm pa rpma, ake antiwe mpa kupm rkul ipma pa rpmi, kolpa atom kupm ukwa Timoti pa kai la kil kai itningkri la kipm ukipma itna titnongket aki kalpis. Kupm maminikgentepm la mpa maur a almpil nikgwalpmel kamel pa lmpilepm nikgwalpm ti atom kipm ngko, ti kupm maminikgentepm lala kwap wail a pikekg minto ak pa mpa kai tikote kolti.

6 3:6 Kwap 18:5Pikekg Timoti kai ariwepm antiwepm rpma ari kipm wa ukipma Sisas itna titnongket apa, wa kipm arkul nikgwalpm a plan ipma wor wasrongen tita rka wor rpma pa. Kil kul lakati nako kipm pa kolpa pipa, nikgwalpm amentekgen pa angko a om. Kil nako la nikgwalpm akipmen pa arkento a plan ipma wor wasrongen minto ti la kulngkul riwo. Minto ti am wa kol pake, minto nikgwalpm arkentepm la wa kai riwepm yat. 7 3:7 2 Te 1:4Kipm melnum almintowen a mentepm ukipma Krais, tu alko kalkuten a wleket, pake minto atning a Timoti lakati la, kipm ukipma Sisas itna titnongket pa wa ak angklin ak titnongketel ipma amintowen ti. 8 Ti minto atning ariwe la kipm ukipma Sisas itna titnongket itna pa, kolpa atom numwalmpopm amintowen pa angko a, a rpma wor om. 9 Ti ak wang ti pa minto atopentepm, kolpa atom minto uk wor wail manten Maur Wailen eng kipm pa or kaingkai ai, pake minto yangkipm kalpisen eng mpa minto la kolai. 10 Nikgwalpm wail amintowen pa arkentepm kolpa atom minto oklala naki Maur Wailen pa miningkranen la kol a minto kai riwepm, a wa ngklinsepm kiling plantepm nikgwalpm wor wor tiur a kipm tukwok pa kolpa iye kai, eng mpa kipm ukipma Sisas pa iye kimeket riworwor.

11 3:11 2 Te 2:16-17Eng mpa Maur Wailen, Yan Wailen kil alkil, a Wailen Sisas a mentepmen pa la mpa tuwekg ukulento ya ur pa wokget itni eng mpa minto kai riwepm. 12 Minto wa asen Wailen la mpa kil ngklinsepm eng mpa kipm plan ipma wor wasrongen tita wa plan ipma wor wasrongen tu wrong kin kipman a rka yela pa iye kolpa iye kai, kol a minto ti plan ipma wor wasrongen kipm pa. 13 Minto wa asen Wailen la mpa kil ik titnongketel nol nikgwalpm akipmen pa, eng mpa Yan Wailen amentepmen pa kil ikgake ri paipm ur la kipm antokg pa, kil ikga ri kipm a rpma wriwen wor kolti ik wang a Wailen Sisas kil ikga yaper nar nimpokgen tu wrong kin a kipman alkilen pa.