3
Ik wang umpuwen pa tu melnum ikga plelng yirokg la Maur Wailen ti atom ntokg nikgwalpm paipm paipm
1 3:1 1 Ti 4:1Timoti, kitn mpa wonrpme yangkipm kil: ik wang umpuwen pa kaikuten wail wail paipm ikga palngto. 2 Ik wang pa ikga wonet paipm, tu wrong kin kipman ikga lupm nikgwalpm paipm aur aur kolkil:
- tu ikga wasrongen tu alntu ti kolti,
- nikgwalpm wail a tu pa ikga rkekgen la uwi marpm wailet,
- tu ikga wam rka nol ngkit nang a tu alntu ti, a rku nang a tu mla ur ai,
- wa tu ikga la paipmel a ik nokgel Maur Wailen,
- wa tu ikga nungkulkget a tulpulng yangkipm ok a mansan,
- wa tu ikgake uk wor tu mlaur a angklinsen kuina ur pa,
- wa tu ikgake ngkirken Maur Wailen pa atom rpmi orngwatneikgen kil pa.
- 3 Tu ikgake uk ipma wor wasrongen mlaur,
- tu ikga lupmen nikgwalpm paipm a tu ak nampokgen mla ur pa rpmi kolpa rpmi pake,
- tu ikga ik uwepel mlaur,
- wa tu ikgake ntiwe ngkeng lok ipaar nikgwalpm wasrongen atuwen a wrekg titnongket tilpen la ntokg kuina ur pa, kalpis.
- Wa tu ikga ok la wam wampor,
- wa tu ikga uwi wrong manto lan nikgwalpm wor wor wrongkwail.
- 4 Tu ikga ningkail tu melnum pa kai ngko ampei a tu angkli pa,
- tu ikga wrekg uren itatu kutnun nikgwalpm alntuwen ti kolti.
- Tu ikga ngkit nangkel tu alntu ti la tu ti melnum wailen nang arke.
- Nikgwalpm wail atuwen pa ikgake rken Maur Wailen pa, kalpis, nikgwalpm wail atuwen pa ikga rken eng ntokg kuina ur la ik itopen tu alntu ti kolti.
- 5 3:5 Mat 7:15,21; Tai 1:16Tu ikga kinsil kipor kilko ilein Maur Wailen ti plan ik numpalk enen ti kolti wa tu ikgake riwe ketn ketn ur titnongket a Maur Wailen a kol a ikwap kawor ipma wunen atuwen pa, kalpis.
Ti kitn mpa itni watin tukwuleikgen tu melnum a kolpa. 6 Tu melnum tiur kolpa a laron yangkipm manet pa tu ikga ik palk ipaar kai kawor wan a tu kin a antokg paipmpaipm. Tu kin yek yek pa ake antiwe titnongket a arku angkeng nikgwalpm wasrongen wrongkwail alntuwen a alok al tukgunakg kai pa kai pa atom tu rpma nampokgen ipma kalkuten. Atom tu ikga ik palk ipaar kai kawor wan a tu kin pa, tu kol ampei a aut rpma mengkel tu kin pa rkolngken iye kai la kutnun nikgwalpm atuwen. 7 Tu kin pa la uwi riwe kweikwei a mla ur kiling planten, pake nol nikgwalpm atuwen ti ake wa umpen wor antiwe mpa tu uwi riwe yangkipm aklale a Maur Wailen pa. 8 3:8 Taku 7:11Tu melnum a ikga ik palk upaar tu pa, ikga ikwap kolen Sanes ekg Sampres a pikekg ekg ak pa. Tuwekg pikekg awi wrong manto lan Moses. Ti tu ti ikgam wa ik kolpake, tu ikga uwi wrong manto lan yangkipm aklale a Maur Wailen ti. Nol nikgwalpm atuwen pa ikga kai titnowen paipm kolti, atom tu ikga kai ar utnurng ya a ukipma katnun Sisas pa. 9 Pake nikgwalpm a tu ikga ik kolpa, pa ikgake wa tu ntokg kolpa itni kai watin pa, ikga tu ntokg itni kai waiketn kolti, atom nikgwalpm titno a tu pa ikgam palng kai ngko wunong wrongkwail ri pake. Am kolen nikgwalpm titno a pikekg Sanes ekg Sampres ak pa pikekg palng angko wunong.
Timoti mpa rkul yangkipm wor a Maur Wailen pa tongtong nimpokgen kweikwei wrongkwail a pikekg Pol kaling plantel
10 Pake kitn ti pa, kitn ikgake kol tu melnum a alok tu wrong kin kipman aye kai ar pa, kalpis. Kitn pa pikekg antiwopm atn a rpma, a atning a ari, a awi ariwe atn a rpma akupmen pa worwor,
- wa kitn ariwe yangkipm na na a pikekg kupm kaling plan tu wrong kin kipman pa.
- Wa kitn ariwe nikgwalpm yiprokgen wrongkwail a kupm akwonalmpen pa.
- Wa kitn ariwe a kupm ukipma Krais pa.
- Wa kitn ariwe a kupm arkul ipma itna titnongket arki kaikuten wrongkwail pa.
- Wa kitn ariwe nikgwalpm wail akupmen a plan ipma wor wasrongen tu mla ur ai pa.
- Wa kitn ariwe kwap a kupm ak angkai ai kulngkul pa kupm ake elngen pa kalpis.
11 3:11 Kwap 13:14-52; 14:5,8-20Kitn ariwe kalkuten wail wail a pikekg tu or ungkwantopm alkopm wleket itna anong wail Antiok, Aikoniam a Listra pa.
Woi, pa pikekg kalkuten wail wail a wleket wakget paipm pikekg kupm arki itna anong pa! Pake pikekg Wailen kil alkil pa angklinsopm kaikuten wrongkwail pa, kolpa atom kupm rpma wor. 12 3:12 Mat 16:24; Son 15:20; Kwap 14:22Am aklale pake, pa ake pikekg tu antokg paipmel kupm wris ti kolti pa, kipm mla ur a la kai kirpon Krais Sisas pa atom kutnun nikgwalpm a Maur Wailen pa, kipm ikgam wa rki kaikuten a wleket kolpa yat pake, tu ikgam or ungkwantepm lkepm wleket kolpa yat pake. 13 Pake tu melnum paipm, a tu melnum a ningkail tu melnum pa kai ngko ampei a tu angkli pa, tu ikga wa lmpil lok tu wrong kin kipman pa iye kai ar utnuurng yangkipm aklale pa. Wa tu pa wa lmpil lok tu tiur ai wa iye kai ar kolpa iye kai paipm wrisen.
14 Pake Timoti kitn pa, kitn mpa rkul yangkipm nikgwalpm ariwe wrongkwail a pikekg kitn awi wa kitn ariwe la pa ute aklale ampake. Eng ntei, pa kitn ariwe men a pikekg kaling planteitn pa la men ti melnum a kaling plan kuina ur a ute aklale kolti. 15 Wa ngkaten ak a kitn a warim wasek ai kul pa, kitn am awi ariwe yangkipm wrkapm a laron nako Maur Wailen pa ak ai kul ise. Kolpati kitn mpam rkul yangkipm pa titnongket itni kolpa itni pake! Yangkipm a ela wrkapm pa antiwe titnongket a alkeitn ariwe eng kitn ukipma Krais Sisas eng mpa Maur Wailen uwiyeitn iye kul eng alkilen. 16 3:16 Rom 15:4Maur Wor a Maur Wailen alkil pikekg ikan yangkipm pa atom tu melnum nira ela wrkapm pa, pa yangkipm wrkapm wor a ak angklinso kolkil:
- pa ak kaling planto yangkipm aklale,
- wa ak akle la karkurng mentepm a antokg paipm,
- wa ak alok nikgwalpm a raimpe pa kul kai ute wor,
- wa ak kaling planto la mentepm mpa itn a rpmi kutnun nikgwalpm a Maur Wailen wasrongen pa.
17 Am yangkipm pa ak angklinso eng mpa mentepm wrong kin kipman a Maur Wailen pa uwi nikgwalpm ariwe wrongkwail wor wor atom pa ik numprampen mentepm ti antiwe ikwap wrongkwail wor wor.
3:5 3:5 Mat 7:15,21; Tai 1:16
3:8 3:8 Taku 7:11
3:11 3:11 Kwap 13:14-52; 14:5,8-20
3:12 3:12 Mat 16:24; Son 15:20; Kwap 14:22