1 Mentepm wrong kin a kipman a Maur Wailen pa kol ong a ak atne yangkipm aklale akilen pa. Pake Maur Wor pikekg la klalen angko wunong la, ikga ik wang kutnukg pa tu melnum tiur a ukipma Maur Wailen pa tu ikga uk yirokg yangkipm aklale a Maur Wailen a mentepm ukipma pa, wa ngko yaper kai kutnun maur manet a ikga iyewen kai ar. A tu ikga itning kutnun yangkipm a tu mring, a mring maur a kweikwei kolpa, a tu melnum tiur ikga kiling plantepm pa. 2 Tu melnum a ikga kiling plantepm yangkipm kansil pa, pa tu melnum a ak palk ipaarepm kolti. Satan pa anel kla ak amprin tu pa eng alkilen ise, atom ok wusok a tu melnum a kolpa am amo ise, atom tu ake antiwe ariwe la tu antokg paipm pa. 3 4:3 Ngkat 9:3; Rom 14:6; 1 Kor 10:30-31Tu ikga kinsil kiling plantepm lala, ake mpa kin a kipman uwi tita iye, a wa la ake mpa il wlikgok aki okipma a angklonake pa. Okipma a wlikgok wrongkwail ti pa pikekg Maur Wailen kil antokg la pa woren plalngten. Kil la mentepm wrong kin a kipman a ukipma Sisas, a awi ariwe yangkipm aklale akilen pa, mpa mentepm uk wor kil pa plalng pipa, il. Pa Maur Wailen kil am awi wor kolpake. 4 Eng ntei, kweikwei wrongkwail a Maur Wailen kil antokg ti pa, pa wor kimeket, ake ur paipm. Ti ake mpa mentepm ngklonike kweikwei ur, kalpis. Mentepm mpa ukwor Maur Wailen ti kolti atom mentepm il. 5 Eng ntei, yangkipm a Maur Wailen pa la kweikwei wrongkwail pa wor kimeket, a wa mentepm ukwor kil pa atom kil ari kaporng yangkipm la pa wor.

6 Kitn kaling plan yangkipm kil tu melnum alkitn a kipm ukipma Krais Sisas pa, atom kitn pa melnum akwapel wor a Krais Sisas. Kitn awi yangkipm wor a mentepm ukipma pa wa nikgwalpm ariwe wor aklale a pikekg kaling planteitn atom kitn katnun pa, pa kol okipma a kitn awi al eng wa ak titnongketel kitn alkitn pa yat. 7 4:7 1 Ti 1:4Kitn mpa uk yirokg itni watinet tukuleikgen yangkipm a tu kin nangkwor tiur a rka aut ok kalpmilel a elukgen Maur Wailen kolpa. Kitn mpa kiling kiling eng itn a rpmi ntokg kuina ur kitila nikgwalpm a Maur Wailen kil wasrongen pa. 8 Eng ntei, mentepm ariwe la, mentepm kiling kiling ik titnongketel numpalk ti pa, pa mpa ik ngklin numpwam ti kolti. Pake mentepm kiling kiling ik titnongketel Maur Wor almentepm ti kutnun nikgwalpm a Maur Wailen pa, pa mpa ik ngklinso kai kweikwei wrongkwail pa. Eng ntei, kil pikekg yapon yangkipm la ikga ik ngklin mentepm ti ik wang ti a mentepm rpma kanokg a ti, a wa ikga ik ngklin ik wang kutnukg a mentepm ntiwel rpmi kaino ai. 9 Yangkipm kil pa yangkipm aklale wrisen, a kol a mentepm itning yangkipm kil ukipma kutnun yek kimeket pa kol a wor wrisen.*4:9 Mentepm ake ariwe la kil la yangkipm a i aklale wrisen pa, kil la yangkipm a ela mantolng wampwomis wampwompwraur ai aki yangkipm a ela mantolng wampwam ti. 10 4:10 1 Ti 2:3-4Engntei, mentepm ukipma rpma nungkwangen ariwe Maur Wailen a rpma yongkyong, kil melnum a amo eng ak awi mentepm wrongkwail kin a kipman, wa kil melnum a ak awi mentepm melnum a ukipma pa. Kil pikekg yapon yangkipm la lko Maur Wor ik ngklinso ik wang ti, wa ikga ik wang kutnukg kaino anong wor ai. Am yiprokgen kolpa atom ari mentepm aken kwap tumplowisen nikgwalpm arkekgen kaling kaling nol nikgwalpm amentepm ti eng mpa mentepm itn a rpmi kutnun wasrongen a kil pa kolti.

11 Kitn la kurkurng tu wrong kin kipman pa laniken a kiling planten yangkipm kweikwei kil eng tu kutnun. 12 4:12 Tai 2:15Kitn ti warimpen, pake ake mpa kitn elng melnum ur ri elukgen kitn ti la kitn warim ur kolti pa. Kitn mpa plan mrangkum wor kolkil tu melnum a ukipma Sisas pa eng mpa tu ri pa tu kutnun: