3
Mpa tu ngkit melnum kolai itni melnum tukgunakg ikglen tu wrong kin a kipman mapming a ukipma Sisas pa
1 3:1 Kwap 20:28Yangkipm a kupm la la kil pa aklale: kol nikgwalpm a melnum ur rka la kil a itni tukgunakg eng ikglen tu wrong kin kipman mapming a ukipma Krais Sisas pipa, kwap a kil wasrongen la uwi pa, pa mentepm kaporng yangkipm la pa kwap wor. 2 3:2 Tai 1:6-9Kolpa ti melnum a la itni melnum tukgunakg eng ikglen tu wrong kin kipman mapming a ukipma pa, kil mpa melnum kolkil:
- kil mpa melnum a ake wrongkwail elukgen ari la kil antokg paipm ur,
- kil mpa melnum a awi kin wris kolti,
- kil mpa melnum wontrakole,
- kil mpa melnum a arkul ipma alupm nikgwalpm wor,
- kil mpa melnum a mentepm alupmel worwor,
- kil mpa kipor ilei tu wokgmprak,
- kil mpa melnum wor a arowonel a kaling plan tu wrong kin a kipman nikgwalpm a Maur Wailen kil wasrongen pa.
- 3 Kil ake mpa melnum a al u titno,
- kil mpa melnum a ake ipma wakget atom or aki ikle kamel pa,
- kil mpa melnum nikgwalpm wor kolti,
- kil ake mpa melnum a nikgwalpm arken la uwi marpm pa.
- 4 A kil mpa melnum a ikgalen kin watnom a wan anong alkil pa ariworwor,
- kil mpa melnum a naki karkurng alupmen tu warim alkil pa ariworwor, eng mpa tu itning kutnun yangkipm akilen. Kil mpa ik won iro lok kil alkil ti, kil ake mpa ik ipma wakget ntokgten kai paipm pa.
5 Kol melnum ake antiwe ikgalen alok kin a watnom alkil pa rka ariworwor pa, pa mpa wa kil ikglen tu wrong kin a kipman a Maur Wailen pa la kolai? 6 Ake mpa kipm ngkit melnum a ukipma Sisas weten pa. Kol kipm ngkitel pa, kil mpa atop wam rka nol la kil ti melnum wor. Ti ikga wa Maur Wailen lkel wleket ikilmpe paipm a kil antokg pa, kolen pikekg kil uk wleket Maur Paipm Satan akalmpe paipm a pikekg kil antokg pa. 7 3:7 2 Kor 8:21Kil mpa tu melnum yimponen ai wa riwel kiporng yangkipm la kil pa melnum wor. Kolpa eng ake mpa tu iknokgel la paipmel kil pa atom kil ngkowe ran a Maur Paipm Satan ngkat pa.
Mpa tu ngkit melnum kolai itni uwi kwap a ak angklin tu wrong kin a kipman mapming a kaingkai kapor kilko alein Maur Wailen
8 Am kolpake, kipm la ngkit tu melnum a akwap a ak angklin tu wrong kin a kipman mapming a kaingkai kapor kilko alein Maur Wailen pa, kipm mpa ngkit tu melnum kolkil:
- tu mpa melnum a kipm alupm worwor,
- tu mpa melnum a ake okmilip wekgenen,
- tu mpa melnum a ake al u titno atom titno pa,
- tu mpa melnum a ake aklampe marpm kweikwei a tu tiur ai.
- 9 Tu mpa melnum a atning katnun ok wusok alntu a naken pa atom tu ariwe la tu ake antokg paipm ur,
- a tu mpa rkul nikgwalpm ampen wrongkwail a Maur Wailen pa itni titnongket a pikekg kil laron nako atom mentepm ukipma pa, atom tu arkul katnun ari la pa aklale.
10 Kipm ngkit tu melnum a kolpake, pake kipm lken kwap ur pa ep eng tu ik eng ik riwen la kol tu ikwap wor pipa, kipm ngkiten itni melnum akwapel a angklin tu wrong kin a kipman a ukipma Maur Wailen pa wom. 11 3:11 Tai 2:3Wa tu kin alntuwen pa, tu mpam wa kolpa yat pake.
- Tu mpa kin a kipm alupmen worwor,
- ake mpa tu la yangkipm elyirokgel melnum ur,
- tu mpa wontrakole, a tu mpa nungkulkg wor ikwap wrongkwail a tu alken pa iklale ute riworwor.
12 Wa tu kipman kipm la ngkit pa,
- tu mpa melnum a aye kin wris ata,
- a tu mpa melnum a ikgalen tu warim a wan anong alntu ti ariworwor.
13 Ti kipm mpa ngkit tu melnum wor kolpake, eng ntei, tu melnum a akwap ak angklin tu wrong kin a kipman a Maur Wailen pa, kol tu ikwap riworwor kolpa kai pa, tu pa mpa uwi nang wor a tu ake mpa ngkirk, tu mpa itni titnongket laron Krais Sisas a tu ukipma pa.
Nikgwalpm yiprokgen wrongkwail a Maur Wailen a mentepm ukipma katnun pa kwei ur wail manten
14 Kupm wasrongen la kupm a kai riweitn itatu kai pake, kupm niranteitn wrkapm kil kainteitn tipen. 15 Kol kweiur ik lokopm atom kupm mpenet ingkul kil i pa, kitn ngkleikg wrkapm kil pipa, mpa kitn uwi riwe kuina ur a kupm lanakeitn pa, la kipm mpa itn a rpmi ikwap na na kolai itni kawor yalming a Maur Wailen, kil alkil yiprokgen a yaprekg watin a rpma yongkyong. Wan yalming pa ak la kipm wrong kin a kipman mapming akilen a ukipma kil pa. Wa kipm kol ong a ak atne yangkipm aklale a Maur Wailen a men laron laron pa atom itna ute aklale. 16 3:16 Mak 16:19; Son 1:14; Kol 1:23Mentepm ariwe worwor kolpa la, “Nikgwalpm yiprokgen ampen wrongkwail a Maur Wailen a mentepm ukipma pa, pa wail manten aklale”, pa mentepm wrongkwail ariwe atom laron la am kolpa aklale pake. Nikgwalpm yiprokgen ampen a pikekg Maur Wailen planto pa pati kolkil:
- Kil pa pikekg palng melnum, man rakuwel, kil rpma kanokg ti kolpa kaingkai, kai kil amo kol mentepm tike.
- Wa kil wa melnum kol mentepm tike, nikgwalpm wrongkwail a kil alupm pa ute wor kol a Maur Wailen kil alkil pa.
- Kil pa plan kil alkil ti tu maur akwapel a Maur Wailen pa wa ariwel.
- Kil pa pikekg tu laron naki tu wrong kin a kipman a ake ukipma yela.
- Kil pa tu wrong kin a kipman yela kanokg ti ukipma katnun.
- Kil pa pikekg Maur Wailen awiyel aye kaino anong wor ai alkel nang wailen.