Wrkapm katnukg a Pol nira eng
Timoti
Yangkipm a la ela ep
Timoti pa kil pikekg akwap wris anti Pol, kolpa atom Pol nirantel wrkapm kil. Kil lanaki Timoti pa eng mpa kil ntokg nikgwalpm wor. Kil la Timoti mpa ukipma itni titnongket eng ake mpa kil elngen a angkli yangkipm a la Sisas Krais pa. Kil mpa ngkli yangkipm ute a Maur Wailen ti kolti. Kol tu melnum lkel wleket a kalkuten pa, kil ake mpa elngen pa. Kil mpa rki kalkuten pa itni titnongket ik kwap a Maur Wailen alkel pa. Kil ake mpa elng nungkulkg pa rmpi itning yangkipmok tiur a tu melnum tiur a alupm nikgwalpm raimpe paipm a kolpa. Yangkipm tiur a kolpa antiwe antokg paipm maur wusok a melnum. Wor wrisen eng kol a Timoti kil ik won kiti atn a rpma wor a Pol pa atom kil kitila. Pol kil pikekg arki kalkuten ukipma itna titnongket, a wa ipma akilen pa pikekg rka kupuk meen wor a wasrongen wrongkwail.
Timoti mpa ikwap titnongket eng palng melnum akwapel wor a Maur Wailen
1
(Klapm 1-4)
Pol uk wor Timoti
1 Kupm Pol, kupm melnum wokgen a Krais Sisas. Pikekg Maur Wailen kil alkil ai takweiyopm ak wasrongen a kil alkil ai, atom ukwawopm la kupm laron niki tu wrong kin kipman la Maur Wailen kil pikekg yapon yangkipm la mentepm ukipma kutnun Krais Sisas pa, kil mpa lko yaprekg watin a rpma wor yongkyong.
2 1:2 Kwap 16:1; 1 Ti 1:2Timoti, yek alkupm, kitn pa kol warim akupmen a kupm plan ipma wor wasrongenteitn, kupm nira wrkapm kil eng kitn pake. Kupm asen Yan Maur Wailen a Wailen Krais Sisas a mentepmen pa, eng mpa tuwekg plan ipma wor ngklinseitn a reinseitn atom ntokg ipma akitnen pa rki kupuk meen wor.
Pol uk wor Maur Wailen eng Timoti
3 1:3 Kwap 23:1Kupm oklala naki Maur Wailen miningkranen pa kupm akwonalmpenteitn rpma akangklei wang a kupm ukwor Maur Wailen. Kil Maur Wailen a tu mamikgmamin mansan akupmen, ok wusok atuwen pikekg aktitnongketel la tu pikekg rka rukis wor atom tu kapor kilko aleinsel kolpa kul, atom kupm am wa kapor kilko aleinsel kol tu pake. 4 Kupm akwonalmpen ikgakg akitnen a pikekg ungkwan pa, kolpa atom kupm wasrongen paipm la riweitn pen, eng mpa kupm rpmi wor uwi ipma atopen wor. 5 1:5 Kwap 16:1Kupm wonarpme kitn pa la, kitn pikekg ukipma Sisas Krais aklale irir kol a pikekg mamikg mayen alkitn Lois, a man alkitn Yunis ukipma pa. Ti kupm ariwe la kitn am wa ukipma kolpake.
Mentepm ake mpa numpaipm eng laron yangkipm wor a Maur Wailen pa
6 1:6 1 Ti 4:14Kupm ariwe la kitn ukipma aklale. Pikekg Maur Wailen alkeitn kweikwei titnongket wor wor a Maur Wor pa ak wang a pikekg kupm elng wam eleweitn oklala naki Maur Wailen ak angklinseitn pa. Kolpa ti kupm la ngkiteitn won eng kitn rkul kweikwei pa titnongket ik ik kwap pa kolpa iye kai o! Pa kol wakg waiketn a kitn karpen atom naruk al wail pa. 7 1:7 Rom 8:15Maur Wor a pikekg Maur Wailen alko pa, pa ake Maur Wor a antokg mentepm ngkark pa, kalpis. Pa Maur Wor a alko titnongket, a kil Maur Wor a ak angklin mentepm ti plan ipma wor wasrongen tita, a kil Maur Wor a antokg mentepm wontrakole ikgalen atn a rpma a oklala almentepmen ti ariworwor.
8 Kolpa ti ake mpa kitn numpaipm eng laron Wailen Sisas amentepmen pa. Wa ake mpa kitn numpaipm eng kupm a pikekg laron yangkipm akilen, atom tu awiyopm rpma wan tipmining ti. Kitn mpa ntiwopm rki kaikuten eng laron yangkipm wor a la Sisas pa, Maur Wailen kil mpa lkeitn titnongket a ngklinseitn pa. 9 1:9 Epe 2:8-9; Tai 3:5Maur Wailen kil melnum a pikekg awiyo a amprinso atom akwewo, lala mentepm itni wrong kin kipman akilen. Ake kil awiyo atnen kwap wor kolai a mentepm ti ak pa, kalpis. Palpa kil pikekg akwonalmpen yiprokgen ur alkil ai atom kil planto ipma wor areinso kolpa. Pikekg ak ep lmpiwen ai pa, Maur Wailen kil takwei mentepm ti ep ise, a kitnong a kanokg a kweikwei wrongkwail pa pikekg kil antokg katnukg. Kil alkil pa planto ipma wor areinso kolpa atom kil alko Krais Sisas pa la ik ngklin mentepm wrong kin a kipman tike. 10 1:10 Ipr 2:14Ipma wor a kil pikekg lawen la reinso pa, ak wang ti am kil ak pa angko wunong ise. Pa am la Krais Sisas a pikekg nar akarmpento pake. Kil angketen titnongket a Amo a alok yapo melnum pa plalng yat ise, wa antokg mentepm rpma malepmen itna klalen a ikga rpmi yongkyong. Mentepm am pikekg yangkipm alkil pa armpento wam pake.
11 1:11 1 Ti 2:7Maur Wailen kil takwei kupm ti la kupm melnum wokgen akwapel akilen, wa kupm melnum a laron, a wa kupm melnum a kaling plan yangkipm wor a armpen wam mentepm wrong kin a kipman ti. 12 Am yiprokgen pa atom ari kupm arki kalkuten kil, pake kupm ake numpaipm atnen pa, kalpis. Eng ntei, kupm ariwe worwor melnum a kupm ukipma pa. Wa kupm ariwe worwor la, kil antiwe titnongket a ikga iken yipmingki ikglen yangkipm wor a kwap a pikekg kil uk kul wam akupmen ti eng ikga itni wor kolpa kai ngko wang wail a ikga Krais kil yaper nar.
13 Kitn rkul yangkipm ute wor aklale a pikekg kupm kaling planteitn pa, atom elng pa itni kol mrangkum wor a kitn la kitila ik kiling tu wrong kin kipman pa irir kol pikekg kupm kaling planteitn pa. Kitn pa a Krais Sisas, atom kitn ukipma kil, wa kitn wa plan ipma wor wasrongen tu wrong kin kipman, ti kitn rkul nikgwalpm pa ik kiling planten iye kolpa kai o! 14 1:14 1 Ti 6:20Maur Wailen pikekg ariwe kitn pa wor wor kolpa atom kil elng yangkipm wor pa elng kai wam akitnen pa la kitn ikglen. Pa kweikwei wor wrisen. Ti kitn mpa iken yipmingki ikglen riworwor. Maur Wor akilen a rpma mentepm ti pa mpa wa ngklinseitn eng kitn ikglen riworwor pa.
15 Kitn ariwe pa, tu wailet a anong kanokg a Esia pa am pikekg plelng yirokg lawopm a atnuurngkopm kai plalng ise. Ti Pikelus a Ermokenes pa tuwekg am wa atnuurngkopm kai ise.
16 Pake Onesiporus pa ake atnuurngkopm, kalpis. Kupm asen Wailen eng mpa kil plan ipma arein wor ngklin Onesiporus nimpokgen kin a watnom alkilen pa. Kupm rpma wan tipmining ti, pake kil ake wa numpaipm atom atnuurngkopm pa, kalpis. Kil yek pikekg wli wli ariwopm atom ak titnongketel ipma akupmen ti anti watipmen atom kupm rpma wor. 17 Ak wang a kil pikekg kul rpma anong wail Rom ti pa, kil pikekg nikgwalpm arkekgen pilpilen akoropm kai pa kai pa kaingkai, kil kul ariwopm om. 18 Kupm asen Wailen pa eng mpa kil reinsel a plan ipma arein wor ngklinsel ik wang wail a ikga ntokg yangkipm itni Wailen pa. Ti kitn pa pikekg ariwe worwor pake a kil angklinsopm wail or ya yawen ak wang a kupm rpma kai Epesus pa.