1 3:1 Pil 1:7,13Kupm Pol, kupm akwap a Krais Sisas, atom tu awiyopm aye or rpma wan tipmining ti atnen a kupm laron yangkipm wor a Maur Wailen naki kipm a ake Suta pake. 2 3:2 Kol 1:25Kipm pikekg atning ur pa lala, nikgwalpm a Maur Wailen pa kil plan ipma wor alkil ak angklinso, atom kil rkan kupm ti itna ep eng akwap a laron yangkipm wor alkilen pa nakepm la, kil wa la plan ipma wor alkil wa ik ngklin kipm ti yat. 3 3:3 Epe 1:9-10; Kol 1:26Maur Wailen plantopm nikgwalpm ampen akilen a pikekg itna am pa palng kai klalen angko wunong eng kupm, atom wuten kupm nirantepm waiketnketn ep ela wrkapm kil. 4 Kol kipm ngkleikg kuina ur a kupm nira kil pa, mpa kipm ri la kupm ariwe worwor kai itna yiprokg nikgwalpm ampen a pikekg Maur Wailen yapon la Krais ik pa. 5 Tu yoampei mamikgmamin mansan ak ai kul angko wang ti pa, ake pikekg Maur Wailen planten nikgwalpm ampen pa, kol ak wang ti Maur Wor akilen pa plan nikgwalpm ampen pa kai angko wunong, naki men melnum wokgen a Krais a wa tu melnum okwripm a Maur Wailen amprinsen eng alkilen pa. 6 3:6 Epe 2:13,16-19Nikgwalpm ampen pa la kolkil la, kipm a ake Suta pa kipm atning yangkipm wor a Maur Wailen pa, atom kipm ukipma Krais Sisas pa. Atom kil awi kipm pa aye kul kai wris nampokgen men Suta pa kol mentepm almentepm num wris. Atom kipm antiwo awi num angklin kweikwei wor wor a Maur Wailen yapon yangkipm la uk mentepm warim alkilen pa. 7 3:7 Kol 1:25Kupm palng melnum akwapel akilen eng laron yangkipm wor akilen a la Krais. Ipma wor a kil alkil plantopm ak angklin kupm ti, atom kil alkopm kalpmilel titnongket alkilen ak titnongketel kupm ti, eng la kupm ik ik kwap pa. 8 3:8 1 Kor 15:9-10Kupm ti ake melnum wor kol tu wrong kin kipman wor a Maur Wailen ai. Pake Maur Wailen kil plantopm ipma wor alkil ak angklinsopm, atom kil uk kwap pa kul kupm ti la laron niki kipm a ake Suta pa kweikwei wor wor wailet paipm ai itna kai Krais pa, ake antiwe melnum ur ik won kiti pa kai itni yiprokg pa. 9 A Maur Wailen a pikekg kil antokg kitnong a kanokg pa, kil yapon nikgwalpm ampen pa itna ep ak ai. Itna ampen kolpa kulngkul, palng kai angko wunong. Atom wang ti pa kil uk kwap kul kupm ti, la kupm laron pa eng tu riwe worwor. 10 Ak wang ti Maur Wailen kil laron nikgwalpm ampen a kil pa kai angko wunong, eng mpa plan tu maur akwapel alkilen a tu maur a antiwe titnongket a nang wailen itna kaino kitnong ai. Eng mpa tu ri mentepm wrong kin a kipman ti kai or wris ukipma kil pa, eng mpa tu riwe nikgwalpm ariwe wor wor wail watin a kil pa. 11 Pa am Maur Wailen kil ak kai katnun ute katila nikgwalpm wrongkwail epet a pikekg kil yapon itna ep ak ai, la ikwap kolpa kai Krais Sisas, Wailen amentepmen pake. 12 3:12 Son 14:6; Rom 5:2Mentepm ukipma Krais pa atom pa antokg mentepm ake mpa ngkirk. Krais kukwa yalming yun pa, atom mentepm antiwe kawor eng Maur Wailen, a mentepm ariwe la kil mpa uwiyo pa. 13 Kolpa ti kupm lanakepm, la ampur kipm ari a kupm arki kaikuten kol kil atom kipm elngen a kipm ukipma pa, iyai. Kupm kai kolpa pa, pa wor eng ak angklin kipm pa eng ikga kipm uwi nang wailen.

14 Am yiprokgen a kupm akwonalmpen kweikwei wrongkwail pa, atom kupm kapor kilko alein asen Yan pake. 15 Yan pa kil angklo ompel alil nangkel tu melnum, a kweikwei wrongkwail a itna kanokg a ti, a wa rka kai anong wor ai yat. 16 Kolpa atom kupm oklala naki Maur Wailen a antiwe klalen titnongket wor wrisen pa, eng mpa kil ik titnongketel nol nikgwalpm akipmen pa ik titnongket a Maur Wor alkilen ai. 17 3:17 Son 14:23; Kol 1:23; 2:7Wa yat kipm ukipma kolpa ti kupm oklala naki Maur Wailen, eng mpa Krais kil uwi wrik rpmi kawor nol nikgwalpm akipmen. A wa eng mpa kipm rkul nikgwalpm a uk ipma wor wasrongen tita titnongket kolen yo a angkli yapoko ningnakg elng kinar kanokg wunen watin ai atom arkul kanokg itna titnongket pa. 18 Eng mpa kipm nimpokgen men wrong kin a kipman wriwen wor a Maur Wailen pa kipm uwi riwe ipma wasrongen a Krais pa, la watinet a kaingkul akilen, a wail akilen, a watinet a kaino kinar akilen pa kolai. Pa kipm antiwe antin eng riwe ipma wasrongen a Krais pa am kolpake. 19 Nikgwalpm a Krais a plan ipma wor wasrongen mentepm ti titnongket pa kinar walopmen watinet paipm kinar ai, a ake antiwe a melnum mpa riwe pa. Pake kupm oklala naki Maur Wailen pa, eng mpa kipm uwi riwe nikgwalpm a kil uk ipma wor wasrongen mentepm pa atom pa mpa kipm lupm nikgwalpm kweikwei wrongkwail wor wor a kil pa ntiwe kolen kil alkil a antiwe pa.

20 Titnongket a Maur Wailen a kil akwap kai mentepm ti pa, wail manten paipm wrisen kai ai, pa ake antiwe mentepm ntin aki isen a rapo aki ikwonilmpen kai kolai pa, kalpis. 21 Kolpa ti mentepm kin a kipman mapming wrongkwail yela a ukipma Maur Wailen a kai or wris nampokgen Krais Sisas pa, mpa mentepm ngkit nang a Maur Wailen iye kaino kwa lkel wor ikngklei wang ikngklei wang kilmik auraur ik wang ti wa iye or pa kai! Aklale wrisen.