4
Maur Paipm Satan ningkail Sisas la kil ngko
(Mak 1:12-13; Luk 4:1-13)
1 4:1 Ipr 2:18; 4:15Son kil kaluk Sisas plalng pa Maur Wor a Maur Wailen kil awi Sisas aye kai wrik kalpmel ur a ake melnum ur arke, eng mpa Maur Paipm kil ningkailel. 2 4:2 Taku 34:28Sisas kil uk wang rpma ak nikg wang kamel misen wekg miningkranen pa atom nikgalmpel. 3 Pa pipa Maur Paipm a ningkail kamel pa wli palngtel kolti lanakel la, “Kol kitn Warim Kipman a Maur Wailen pa pati, kitn la wes ti palng kolen okipma pa, atom kitn il!” 4 4:4 Yang 8:3Ari Sisas akalmpe la, “Wrkapm a Maur Wailen pa la kolkil la, 'Melnum ake antiwe a rpma ak okipma kolti pa, kalpis. Pa rpma ak yangkipmok wrongkwail a palng kai ok a Maur Wailen!'”
5 Kil akalmpe kolpa plalng pipa, wa Maur Paipm wa awiyel a pa wa ayewel kai kaino anong wail Serusalem a pikekg Maur Wailen amprin eng kil alkil pa atom ayewel kai kaino itna kaino wan kimpo kwa wai, yalming a Maur Wailen. 6 4:6 Nang 91:11-12Atom kil lanakel la, “Kitn ti Warim Kipman a Maur Wailen, ti kitn tipra elng kinar kanokg ai! Nira ela wrkapm a Maur Wailen pa la kolkil la, 'Mpa kil uk yangkipm tu maur angklin alkil ti mpa tu rkuleitn pa.' A wa nira kolpa yat la, 'Mpa tu wamplilngteitn pa, eng ake mpa kitn ngko ngket nepm pa eli wes ur pa.'” 7 4:7 Yang 6:16Ari Sisas akalmpentel la, “Pake wrkapm a Maur Wailen wa la kolkil yat la, 'Ampur kitn ningkail Wailen, kil Maur Wailen akitnen ti.'”
8 Wa Satan awiyel a pa wa ayewel kaino itna kaino wrik nangen watin ur pa. Kil plantel anong nampon kanokg, a kweikwei wrongkwail a wor wor a antiwe titnongket a itna anong kanokg yela pa. 9 Atom kil lanakel la, “Kol kitn kipor kilko ilein ngkit nang akupmen ti pa, kweikwei wrongkwail ri pa mpa kupm lkeitn.” 10 4:10 Yang 6:13Pake Sisas akalmpe la, “Satan, kitn kai tukwelkg kupm ti! Eng ntei, nira ela wrkapm a Maur Wailen pa la kolkil la, 'Kitn kipor kilko ilein ngkit nang a Wailen, kil Maur Wailen alkitnen, kitn ikwap a kil wris ita!'”
11 Atom pake, Maur Paipm Satan kil wrekg naurngkel a tu maur angklin tiur a Maur Wailen pa wli angklinsel.
Sisas kil ngkaten kwap a laron yangkipm
(Mak 1:14-15; Luk 4:14-15)
12 4:12 Mat 14:3; Mak 6:17; Luk 3:19-20Sisas atning la tu arkul Son kil aye kai rpma wan tipmining pa, kil wrekg kaino anong kanokg Kalili. 13 Kil wrekg naurng anong Nasaret pa wa kai kaino rpma anong Kaperneam. Kaperneam pa ela wreren ukupuk wail a Kalili, kai kanokg a tu Sepulun a tu Naptali. 14 Kil kaino akwap rpma kaino Kaperneam pa, yangkipm a Maur Wailen kil la kai melnum ok wripm Aisaia kil la pa, am palng angko oken ase, kil pikekg la kolkil la, 15 4:15 Aisaia 9:1-2”Kanokg a tu Sepulun, a kanokg a tu Naptali, pa kanokg a ela ya a kai unokg. A kanokg a itna kai u kop Sotan wompel pa, pa kanokg wompel a Kalili, tu melnum tiur a ake Suta pa tu wli antiwen rka anong kanokg pa. 16 Tu melnum a rpma anong kanokg pa tu rka miningket, atom tu ari klalen wail. Tu a rka wrik om miningkon pa, klalen pa palngten.”
17 4:17 Mat 3:2; 19:27Angko wang pa atom wa aye or pa kai pa, Sisas kil ngkaten eng laron yangkipm pa la kolkil la, “Maur Wailen wreren eng a itni wailen ikglen nol nikgwalpm a kipm wrong kin kipman ti, ti kipm plelng ipma!”
Sisas kil laron yangkipm wor a la Maur Wailen kil itna wailen ikgalen kweikwei wrongkwail, a wa antokg melnum numpet palng wor
(Klapm 4:18-9:34)
Sisas akwe melnum wikgwikg pa ep eng katnuntel
(Mak 1:16-20; Luk 5:1-11)
18 Sisas kil angkom antilawe ukupuk yamping a Kalili pa kinar ari wusok wail wekg, ekg ak apm mumu pa akawi yul pa itna. Saimon, nang wompel pa Pita, wa wusok pa Antru. Pa kol kwap marpm atuwekg. 19 Sisas kil lanaken la, “Kipmekg kul kunun kupm ti, eng mpa kupm kiling plantepm atom ikga kipmekg uwi tu melnum kolen a kipmekg awi yul pa.” 20 Tuwekg atning kolti, tuwekg naurng apm mumu pa rmpa, a tuwekg kai kanun Sisas.
21 Wa tunteng angkom kolpa kai pipa, tunteng ari yantwarim ur pa rpma kai nim ukupuken pa rpma. Semis ekg Son anti yan alntuwekg pa Sepeti, teng noworel angkut karpo apm mumu pa rpma. Ari Sisas akwewen. 22 Atom tuwekg atning kolpa, tuwekg naurng yan pa nampon nim ukupuken pa rpma wai a tuwekg penterng kul kanuntel.
Sisas antokg tu melnum numpet palng wor
(Luk 6:17-19)
23 4:23 Mat 9:35; Mak 1:39; Kwap 10:38Sisas kil akwe Semis ekg Son pa plalng pa kil wa alekgen tuwekg pa angkom or kai yela anong kanokg Kalili ti. Kil kaling planten, a kil laron yangkipm wor ti itna wan a tu atning atning yangkipm a Maur Wailen atnewe pa. Kil laron yangkipm wor a Maur Wailen a kil a itni wailen ikglen ipma a mentepm wrongkwail, a kil antokg tu melnum a awi numpet a wleket auraur pa palng wor. 24 4:24 Mak 6:55Tu lakati kwap a Sisas kil ak kolpa yela anong kanokg wrongkwail a Siria ti. Atom tu wrongkwail atning kolpa, tu aye tu a awi numpet auraur, tu melnum a maur paipm arpme, a amo titno titno, a amo nepm wam plupmen, atom Sisas kil antokg tu melnum a awi numpet a kolpa tu palng wor. 25 4:25 Mak 3:7-8Wrong wailet paipm a anong kanokg Kalili a Tekapolis, a anong wail Serusalem, a anong kanokg Sutia, a kai u kop wompel Sotan pa, tu kanun kil pa. Tu ak wail kunturng kanuntel.