1 Tu kul no wreren anong wail Serusalem pa no angko Petpake a Petani, anong wasek wekg a ela wreren wrik nangen Olip. Sisas ukwa watnom wekg a kil aroaro wonel pa kai ep. 2 Kil lanaken la, “Kipmekg kaino anong a kipmekg ari wreren pawo! Kipmekg kaino anong pa, mpa kipmekg ri nimpa nepm kuinen warimpen a ake melnum ur arpme arpme pa, tu angkuten itna yo wang a pa. Inelkgentopm nimpa nepm kuinen pa, atom iye nar eng kupm rpme! 3 Mla ur la isentepm la, 'Kipmekg anelkgen nimpa nepm kuinen pa la ik ntokg kuina?' pipa, kipmekg lanikel kolpa, 'Melnum Wailen ai kil la uwi nimpa nepm kuinen eng ik ik kwap ur alkil ai, plalng pipa, wa kil penterng ukwanteitn no pa!'” 4 Tuwekg kawor ari nimpa nepm kuinen warimpen pa a tu angkuten itna yo wang a wanyun enen pa, atom tuwekg anelkgentel. 5 Tu melnum tiur a rka anong pa asenten kolpa la, “Kipmekg anelkgen nimpa nepm kuinen pa eng ntei?” 6 Tuwekg lanaken yangkipm ok a wuten Sisas kil lanaken pa. Tu atning atom tu awi wor alken. 7 Kolpa atom tuwekg aye nimpa nepm kuinen warimpen pa aye nar eng Sisas. Atom tuwekg angkli apm pa elng kaino nimpa nepm kuinen pa ukulam, atom Sisas kaino arpme. 8 Tu melnum watipmen anel elng apm alntu pa elngkirmpa ya pa, tu tiur angket yo ipm itna ya yamping pa elngkirmpa ya pa eng Sisas kil arpme nimpa nepm kuinen aye ore. 9 11:9 Nang 118:25-26; 148:1Tu wrong tiur a ep pa, a tu wrong tiur a katnukg pa, tu anel ngkat ok la yikakatnen atopen Sisas pa la, “Osana, Maur Wailen, men atopenteitn! Kitn plan ipma wor ik ngklin melnum ti. Kitn alkel nang Wailen atom kil wli ti. 10 Kitn plan ipma wor ik ngklin melnum tukgunakg a wli ti, kil la wrekg itni wailen ikglen men ti, kol pekg yipetatnong amentepmen Tepit itna wailen ikgalen tu amenen pa. Maur Wailen, men atopenteitn, kitn melnum a rpma kaino kwa ai!”

11 Sisas kil no palng no anong wail Serusalem atom kil kawor yipmingki wunen a yalming a Maur Wailen. Kil ari yela kweikwei wrongkwail pa plalng, ari takgni am kinar nungkurikg plalng tike. Kolpa atom am wa kil nampokgen tu melnum wampwam yikakwompwekg alkil pa yaper kinar anong wasek Petani pa.

12 Tu okg or kong ti pa, tu wrekg atnurng anong Petani ti pa Sisas pa nikgalmpel. 13 11:13 Luk 13:6Kil ikg kai ari yo kampuk ur a ipm atnen pa itna kai ai. Kil la kai ri la tikga kulok aki tikga tukgun ur rka aki kalpis. Kil kai palng kai yo kampuk yiprokg, pake ake kil ari ok ur rka, ipm kalpmilel kolti, eng ntei, ake wang alkil a ok arke pa. 14 Atom Sisas lanaki yo pa la, “Ikgake mla ur il ok kai kitn pa nti ur!” Tu watnom alkil pa tu atning yangkipm a kil lanaki yo pa.

15 Tu no palng no Serusalem pa, Sisas kil kawor yipmingki wunen a yalming a Maur Wailen. Kil ngkaten eng ungkwan tu a akwap marpm a ak kweikwei awi marpm itna kawor yipmingki wunen pa. Kil taipurng tipmakg a elng marpm elngarmpe eng ak awiye awiye marpm, nampokgen wrik tipmakg a tu melnum a aye wel punum kai armpe eng tu armpenten pa. 16 Kil angkengken la, ake mpa mla ur iye kweikwei ur ngkom or kawor yipmingki wunen a kapringen yalming a Maur Wailen pa. 17 11:17 Aisaia 56:7; Serem 7:11Kil aro wonelen la, “Wrkapm a Maur Wailen pa la kolkil, 'Wan akupmen ti wan a tu wrong a awen wli eng oklala naki naki kupm ti.' Wrkapm a Maur Wailen pa la kol pake, ari kipm antokg wan kil palng paipm kol wrik ampen a tu melnum ikgwampet ak ikgwampel kweikwei wli lam armpe.”

18 11:18 Mak 14:1Tu tukgunakgen a tu ipma krakgen a ak ak kwap eng al wor uk Maur Wailen nampokgen tu melnum a aroaro wonel tu yangkipm a Moses tu atning pa, atom tu akor ya la ilmpel imo. Pake tu ngkark eng yangkipm a Sisas kil kaling plan pa alm ipma a tu wrongkwail. 19 Ak nungkurikg pa Sisas nampokgen tu watnom alkil pa tu atnurng Serusalem pa kinar.

20 Ak kong Sisas nampokgen tu watnom a kil aroaro wonel pa kai akanele yo kampuk pa, tu ari, yo pa am nungkwor nungen ike kinar yapoko alkil ai. 21 Pita kil won uwen pa atom kil lanaki Sisas pa la, “Melnum a kaling planto, kitn ri! Yo kampuk a pekgkil kitn akle pa am nungkwor nungen ike!” 22 Sisas akalmpenten kolpa la, “Kipm rkul ipma a kipm ukipma Maur Wailen pa itni tongtong! 23 11:23 Mat 17:20Kupm lanakepm aklale wrisen la, kol melnum ur a ukipma Maur Wailen pa kil laniki tipmining a itna ti la, 'Tipmining, kitn tipor ngko elng kinar unokg pawo!' Kol melnum pa ake nikgwalpm wekg wekg, kil nikgwalpm wris kolti la, 'Yangkipm akupmen kil pa mpa palng iklale', kol kil la kolpa pa, pa mpa palng iklale kol a melnum kil la pa. 24 11:24 Mat 7:7Kupm lanakepm la, kol kipm oklala niki Maur Wailen atom ukwentel la kil ngklinsepm pa. Kol kipm ukipma la, kipm am awi ike, kil mpa ngklinsepm kitila kol a kipm ukipma pake.

25 11:25 Mat 6:14-15Ik wang a kipm itni oklala niki Maur Wailen pa, kipm utnurng paipm a mla ur antokgtepm pa ep, plalng pipa, mpa Yan akipmen kaino kitnong pa mpa wa kil ungkwan paipmpaipm a kipm antokg pa. 26 Kol ake kipm utnurng paipm a mla ur antokgtepm pa, Yan akipmen kaino kitnong pa ampake wa ungkwan paipmpaipm a kipm antokg pa.”

27 Tu yaper kaino Serusalem antiur. Atom Sisas kawor yipmingki wunen a kapringen yalming a Maur Wailen. Tu tukgunakgen a tu ipma krakgen a ak ak kwap eng al wor uk Maur Wailen, tu melnum a aroaro wonel tu yangkipm a Moses nampokgen tu melnum wail wail tu kul eng kil. 28 Tu asentel la, “Pekg kitn asen mla awi wor atom kitn antokg kweikwei pa? Mla alkeitn titnongket atom kitn antokg kweikwei pa?”

29 Ari wa Sisas kil akalmpenten la, “Ti itni eng kupm ik isentepm akasen wris ur kil. Kol kipm ikilmpe akasen akupmen kil pipa, mpa kupm lanikepm titnongket a kupm ak ak kwap pa. 30 Son kil kaluk tu, pekg mla la atom kil kaluk tu pa? Maur Wailen aki melnum? Kipm lanikopm ri!”

31 Atom tu rpma akor la, “Kol mpa mentepm la kolpa, 'Maur Wailen, kil la atom kil kaluk tu', pa mpa kil iklewo la, 'Ti ake kipm ukipma kil?' 32 Aki mentepm la, 'Son pa kil kaluk tu ak nikgwalpm alkilen kolti?'” Pake tu wrong kin kipman a rka pa ukipma la Son pa kil melnum ok wripm a Maur Wailen aklale, kolpa atom tu ngkark, 33 atom tu kansil akalmpe kai Sisas pa la, “Men akwekgel.” Atom wa Sisas lanaken la, “Kupm yat, kupm ake mpa wa lanikepm la mla a i alkopm titnongket atom kupm ak ak kwap kil.”