1 Atom ak wang pa, tu tiur wli lakati naki Sisas tu melnum tiur a Kalili a pikekg Pailat la atom tu almpen amo, atom walmpopm a tu pa ungkwan akoren walmpopm a wlikgok kweikwei a tu itna lap alwor uk Maur Wailen. 2 13:2 Son 9:2Ari Sisas akalmpenten la, “Eng ntei, tu melnum a Kalili a amo kolpa atom, kipm pa akwonalmpen la tu pa tu melnum paipm wrisen a angen tu Kalili a antokg paipmpaipm ai? 3 Kalpis. Ti kupm lanakepm la, kol ake kipm plelng ipma alkipm pa utnuurng paipmpaipm pa, kipm ikgam imo kolen tu pake. 4 Ti wa tu melnum wampwam yikakwomis yikakwom wraur a pikekg wan watin tapor or angkai anong Siloam pa, pa kipm pa akwonalmpen la tu pa melnum paipm wrisen a antokg paipm angen tu melnum a rka Serusalem pake? 5 Kalpis. Kupm lanakepm, kol ake kipm plelng ipma utnuurng paipmpaipm alkipm pa, kipm ikgam uwi paipm kolen tu pake.”

6 Atom Sisas la yangkipm kla ur pa lanaki tu wrong kin kipman pa kolpa la, “Melnum ur pa yo kampuk ur alkil pikekg alin itna wring ampei wain pa, atom kil kai ari ake angko, kalpis. 7 13:7 Luk 3:9Atom kil lanaki melnum a ikgalen yo kampuk akilen pa la, 'Ti kipm ri, wring wraur misen kupm kul ari yo kampuk pa ari ake wa angko. Ti kitn ware yo pawo! Eng itna ti arkolng kanokg wor pa kalpmlel.' 8 13:8 2 Pi 3:9,15Ari melnum pa la, 'Melnum, elngtilo itni ukwiyen kol wring wris pa pen, eng kupm kurkurng up ngklin pen. 9 Wring kutnukg pa, ri la kil ngko pa, pa elng itni. Kol ake kil ngko pa, kitn ware kul.'”

10 Ak wang wail ur a rpma eng yapm pa, Sisas kil angkli yangkipm itna kawor wan ur a atning atning yangkipm a Maur Wailen atnewe pa. 11 Kin wris ur a numpet pa wa rpma kawor wan pa ak wang pa yat. Kin pa maur paipm ur rpmawel, atom antokg yirokg akilen pa tompoket, atom akentiwe mpa kil ngkom itn ute, kolpa itna a wring wampwam yikakwomis yikakwompwraur ise. 12 Atom Sisas kil ariwel pa, kil lanakel la, “Kitn pa, kul o! Numpet akitnen pa am kupm ungkwan ise.” 13 Atom kil elng wam pa elewel kolti, kil wrekg itna ute wor kolti, kil ukwor Maur Wailen. 14 13:14 Taku 20:9-10; Yang 5:13-14Atom melnum tukgunakg a ikgalen wan a atning atning yangkipm a Maur Wailen atnewe pa ipma wakget eng Sisas antokg numpet a kin pa wor ak wang wail pa, atom kil lanaki tu wrong kin kipman pa la, “Kola kipm wli ik wang wampwomis wampwompwris pa, wang a akwap pa eng ntokgtepm numpet pa wor ik wang pake, wa ampur kipm wli ak wang wail a rpma eng yapm pa.” 15 13:15 Luk 14:5Ari Wailen kil akalmpe kolkil la, “Kipm melnum a kansil plan ak num enen ti kolti. Ak wang wail a kol a rpmi eng yapm pa, kipm yat, kipm anelkgen manto nepm watin aki nimpa nungkulkg watin alkipm pa aye kai eng uk uk u al ti. 16 Ti kin ti, yaru marpmeng a Apraam pikekg Maur Paipm Satan yapowel rpma kolen wring wampwam yikakwomis yikakwompwraur, kolpa atom kupm wuten anelkgen ampei a ak yapowel ti ak wang wail a mentepm rpma eng yapm ti. Ti kipm ti lala kupm ti akwap paipm kolai?” 17 Kil akalmpe kolpa atom antokg tu a arpmen paipmel kil pa numpaipm. Pake tu wrongkwail pa atopen paipm eng kweikwei weten wor wor a kil antokg pa.

18 Sisas lanaki tu wrong kin kipman pa la, “Mpa kupm ik kuina a i ik la a kai irir kolen Maur Wailen itna wailen ikgalen nol nikgwalpm a kipm wrong kin kipman pa? 19 Pa am kolen trumpwilm ipopm ok a wripm almpen aye kai anip yela tatu palpa. Atom anip kaino kol yo pa, alm talpuk atnewe kai pa kai pa. Atom wel pa wli ak ila rka tatu talpuk pa.”

20 Atom wa Sisas asenten la, “Mpa wa kupm ik kuina a i ik la a kai irir kolen Maur Wailen itna wailen ikgalen nol nikgwalpm a kipm wrong kin kipman pa? 21 Am kol mpim ap mringen pake. Kin pa awi waiketn kolti alung ak oren nok mringen kinar kuntuk mangkei wail pa, kolti nok pa angki kai wail.”

22 Sisas kil angkom kai anong lkgungkur lkgungkur kaling plan yangkipm a Maur Wailen, kolpa kai, la kaino Serusalem. 23 Ari melnum ur pa asentel la, “Wailen, ti ikga Maur Wailen ik uwi melnum yek wraur ur kolti iye kai eng alkilen?” Ari wa Sisas akalmpentel la, 24 “Kitn nikgwalpm rkekgen eng kai or wanyun wasek pa. Eng ntei, kupm lanakepm la tu wailet ikga mpen la kai or wanyun wasek pa, pake ikgake ntiwe. 25 13:25 Mat 25:10-12Melnum yan a wan pa ikga wrekg kolti ir wanyun pa, atom ikga kipm itni kawor en pa kulkwon la, 'Wailen, kukwanto wanyun ti!' Pa ikga kil ikilmpentepm la, 'Kupm akwekgel kipm pa la kipm pa angkai a i wli?' 26 Wa ikga kipm ikilmpentel la, 'Men pikekg al okipma rka wris nampokgen kitn, wa kitn pikekg kaling planto yangkipm a Maur Wailen tatu anong amenen ti.' 27 13:27 Nang 6:8Wa ikga kil ikilmpentepm la, 'Kupm akwekgel kipm pa. Ti kipm melnum a antokg paipmpaipm pa, kipm kai tukuleikgentopm.' 28 13:28 Mat 8:11-12Ti kipm ti ikga tu tulpulepm itni en, atom ikga ik wang a kipm ri Apraam, Aisak, Sekop numpokgen tu melnum okwripm a rpma kawor anong wor a Maur Wailen pa, kipm ikga akg paipm nampok. 29 13:29 Nang 107:3Tu wrongkwail ikga ingkai takgni no, takgni kinar, i yamping yamping pa wli uwi wrik nti Maur Wailen il okipma kaino anong wor. 30 13:30 Mat 19:30Kipm itning, melnum tiur a katnukg pa tu ikga wa kai ep, a melnum tiur a ep pa tu ikga wa kai kutnukg.”

31 Atom ak wang pa, tu melnum a arpmen yangkipm yiprokgen a Moses tiur, tu kul lanaki Sisas pa la, “Ti kitn kai itn kol ur ai tukuleikgen anong ti! Eng ntei, Erot la ikga wangketeitn meng.” 32 Ari wa Sisas lanaken la, “Ti kipm kai laniki nimpa tilpmingen pa la kil itni, kupm ikwap ungkwan maur paipm, a ntokg tu melnum numpet palng wor amti ikgkil, atom kwaikg ai pa kwap a kupm ak kil pa ikgam kai plalng ngko pake. 33 Kolpa ti, amti, ikgkil, kwaikg pa, kupm mpa ngkom kai kolpa, eng ntei, ake wor mpa tu ilm melnum okwripm ur a Maur Wailen pa imo rmpi wrik ur manet pa, kalpis, ikga tu ilmpel imo rmpi Serusalem ai kolti.

34 Woi, arein kitn anong Serusalem, Serusalem! Kitn akangklei almpalm tu melnum okwripm, kitn akwesel tu melnum yangkipm kuin a Maur Wailen ukwanteitn kulngkul pa. Wang watipmen ai kupm la lok tu warim alkitnen pa kul rki wris ikglen kol karek man a ak iplepm aur nampi alkil pa, ari wa kipm karken. 35 13:35 Nang 118:26Kolpa ti Serusalem, kitn itning, wan yalming a kitn pa ikga Maur Wailen utnuurng itni kupuk kalpmlel kolti. Pake kupm lanakeitn kolkil: ti wa kitn ikgake wa riwopm nti ur, kolpa kai ngko wang a ikga kitn laron kupm ti la, 'Maur Wailen ukwa melnum pa atom kil nar, ti mentepm lkel wor ngkit nang akilen!'”