1 Atom Sisas lanaki tu wrong kin a kipman wailet pa, a wa lanaki tu watnom alkil pa la kolkil la, 2 “Tu melnum a aroaro wonel tu yangkipm a Moses nampikgen tu melnum a arpmen yangkipm yiprokgen a Moses pa, tu pa awi wrik a Moses kaling plantepm yangkipm titnongket pa kolen pikekg Moses kil kaling plan pa. 3 23:3 Malak 2:7-8Kolpa ti kipm itning kunun ntokg kitila kweikwei wrongkwail a tu lanakepm pawo. Pake ampake ntokg kitila kuina ur a tu antokg pa. Pati atnen ake tu antokg katila yangkipm a tu angkli pa, kalpis. 4 Yangkipm titnongket a tu yapon pa kolen kalkuten wail ur a tu alkepm la kipm rki. Pake tu alntu ti pa ake wa wakrongen la ipo wam ngklinsepm ngkit kalkut pa, kalpis. 5 23:5 Taku 13:9; Angk 15:38-39; Yang 6:8; Mat 6:1Kweikwei wrongkwail a tu antokg pa, tu antokg la tu melnum ti ri kolti. Mikgni yawet a rpma wuntu, a yalmis a rpma elngkep pa tu ak wail ariworwor manet, atom yangkipm titnongket a Maur Wailen a tu nira pa tu la itna aye atn. A wa tu pa al pimpra watin ari wor wor rka tatu apm wulompwulom a tu nowe pa. Eng mpa tu melnum riwen nirein la tu melnum wor a Maur Wailen. 6 Tu la ntokg okipma wail il pa, tu pa wakrongen la rpmi ep eng uwi okipma. Tu la kaingkai wan a atning atning yangkipm a Maur Wailen atnewe pa, tu pa mpa rki ep. 7 Kol melnum ur nsilen pa, tu wakrongen la, tu lken wor, il wuntuwel, a ukwewen la, tu melnum wailen a kaling plan tu.

8 Pa tu melnum a arpmen yangkipm yiprokgen a Moses pake, kipm pa ake mpa kol tu pa. Ake mpa wa tu wa ukwewepm la kipm melnum wailen a kaling plan tu melnum pa. Eng ntei, melnum a kaling plan kipm pa wris ata. Kipm pa repmrepm kolen kipm wusok wail ase. 9 Kolpa ti ampake wa kipm ukwe melnum ur a itna kanokg a ti la yan pa, iyai. Kol kipm Yan wris ata pa rpma kaino anong wor ai. 10 Ake mpa wa tu wa ukwe kipm pa la kipm melnum wailen pa, kalpis. Melnum wris a wailen pa pati Krais. 11 23:11 Mat 20:26; Mak 9:35; Luk 22:26Melnum wailen a itna ep itna kuin akipmen pa, mpa wa kil palng melnum a akwap angklin kipm. 12 23:12 Sop 22:29; Nimnol 29:23; Luk 14:11; 18:14Melnum a kil ngkat nang alkilen aye kaino kwa pa, nang akilen pa ikga kinar kanokg. A melnum a kil arku nang alkilen aye kinar kanokg pa, ikga kil uwi nang wailen.”

13 “Woi, areinsepm, kipm melnum a aroaro wonel tu yangkipm a Moses, a kipm melnum a arpmen yangkipm yiprokgen a Moses ti pa, kipm ikga uwi paipm. Kipm plan ak num enen ti pa la kipm wor pake wunen ai pa paipm. Atom kipm pa ampri ya a tu melnum la kol a ore kawor anong wor a Maur Wailen. Kipm alkipm ti karken a kawor anong wor pa, wa kipm ampri ya wa tu la ore pa. [ 14 Woi, areinsepm, kipm melnum a aroaro wonel tu yangkipm a Moses, a kipm melnum a arpmen yangkipm yiprokgen a Moses ti pa, kipm ikga uwi paipm. Kipm plan ak num enen ti pa la kipm wor pake wunen ai pa paipm. Kipm uk yangkipm armponel tu kin karpikg pa la uwi wan a kweikwei atuwen pa, a wa akwen Maur Wailen itna watin eng akaur paipm a kipm antokg pa. Kolpa ti kipm ikga uwi paipm wrisen eng ikilmpe paipm a kipm antokg pa.]

15 Woi, areinsepm, kipm melnum a aroaro wonel tu yangkipm a Moses, a kipm melnum a arpmen yangkipm yiprokgen a Moses ti, kipm ikga uwi paipm. Kipm plan ak num enen ti pa la kipm wor pake wunen ai pa paipm. Kipm angket unokg kai atn tatu anong manet watipmen akor tu melnum la kul kunun ya wa kipm ti ore ti. Kipm awi tu melnum pa kul kaling planten atom tu kul kanuntepm pa, tu palng paipm wrisen angen kipm ti, atom ikga tu kai anong paipm.

16 23:16 Mat 15:14Woi, areinsepm, kipm melnum wulmpa tilmpisen a plan ya tu melnum pa, kipm ikga uwi paipm. Kipm la kolkil la, 'Tu melnum a naren yalming a Maur Wailen pa eng ak titnongketel yangkipm ur pa, pa mpa wa ntei, kai tu lalowe o! Pake kol mlaur kil naren kweikwei a ak wes muinmainet antokg a rpma yalming a Maur Wailen pa, pa ake antiwe mpa lalowe, kalpis, pa titnongket itna.' 17 Kipm titnowen a kipm wulmpa tilmpisen! Kuina a i wail manten itna ep, wes muinmainet pa aki pa yalming ti antokg wes muinmainet pa klalen wakget? 18 Kipm wa la kolkil la, 'Melnum a kil naren tipmakg a alm itna eng alwor uk Maur Wailen atnewe pa, pa wa ntei, kai kil lalowe o! Pake kol melnum a kil naren okipma a aye kawor rmpa tipmakg pa eng alwor uk kai Maur Wailen pa, pa ake antiwe mpa lalowe pa, kalpis, pa titnongket itna.' 19 Kipm ti wulmpa tilmpisen, ake kipm ariwe la kuina ai wail manten itna ep pa, okipma pa wailen aki, a tipmakg pa a antokg okipma pa klalen wakget? 20 Kol melnum a kil naren tipmakg pa pati, am kil naren kweikwei wrongkwail a tu elng itna kaino tipmakg pa nampon pake. 21 Wa kol melnum a kil naren yalming a Maur Wailen pa pati, pa kil naren Maur Wailen a rpma kawor yalming pa nampon pake. 22 23:22 Aisaia 66:1; Mat 5:34Wa melnum a kil naren kitnong pa, pa kil naren wrik a Maur Wailen arpme pake, kolpa ti pa kil naren melnum kil alkil a rpma wrik pa nampon pake.

23 23:23 Lipai 27:30; Maika 6:8Woi, areinsepm, kipm melnum a aroaro wonel tu yangkipm a Moses, a kipm melnum a arpmen yangkipm yiprokgen a Moses ti pa, kipm ikga uwi paipm. Kipm melnum plan ak num enen ti pa la kipm wor pake wunen ai pa paipm. Wanukgnung waiketnketn kai wringkya alkipm pa kipm awi elng itna mpil wampwam pa atom kipm uk mpil wris pa kai Maur Wailen. Kweikwei waiketnketn pa kipm kanun pake, ake wa kipm kanun yangkipm titnongket a lala ri lok melnum eng ntokg nikgwalpm ute wor, a ya a arein a ya a ukipma. Kweikwei waiketnketn pa kipm kanun pake, kol a kipm kunun kweikwei wail wail pa ep pake. 24 Kipm melnum wulmpa tilmpisen ti la plan ya tu melnum tike. Kipm alung u wilmpet, pake manto meng watin (kemel) pa kipm wonmis angklei nampon u pa kolti.

25 23:25 Mak 7:4Woi, areinsepm, kipm melnum a aroaro wonel tu yangkipm a Moses pa, wa kipm melnum a arpmen yangkipm yiprokgen a Moses ti pa, kipm ikga uwi paipm. Kipm plan ak num enen ti pa la kipm wor pake wunen ai pa paipm. Kipm klak kuntuk kaimung ti or en tike, a kawor kuntuk wunen pa kalpis. Kweikwei kol ikgwam a nikgwalpm wakrongen alkipm pa ake kipm klak, kalpis, kipm alupm rpma pa. 26 Kitn melnum a arpmen yangkipm yiprokgen a Moses, pa kitn wulmpa tilmpisen. Ep pa kol a kitn klak or wunen pa ep, atom kawor en pa mpa rukis pa.

27 23:27 Kwap 23:3Woi, areinsepm, kipm melnum a aroaro wonel tu yangkipm a Moses, a kipm melnum a arpmen yangkipm yiprokgen a Moses ti pa, kipm ikga uwi paipm. Kipm plan ak num enen ti pa la kipm wor pake wunen ai pa paipm. Kipm pa kolen kirkap a tu aser miwel, ma kiminim wak kweikwei pa ak nakure ariworwor tatu en tike, kinar wunen pa pik atnen melnum tupmungkul a u mainilng paipm paipm a kimpilpet pa arke. 28 23:28 Luk 16:15Kipm alkipm ti am kolpake. Tu melnum ariwepm num enen ti pa tu lala kipm melnum ute wor. Pake kawor wunen akipmen pa pik eng nikgwalpm paipm a paipmpaipm a kipm antokg.”

29 “Woi, areinsepm, kipm melnum a aroaro wonel tu yangkipm a Moses, a kipm melnum a arpmen yangkipm yiprokgen a Moses pa, kipm ikga uwi paipm. Kipm plan num enen ti pa la kipm wor pake wunen ai pa paipm. Kipm a alen wanel kirkap a tu melnum okwripm a Maur Wailen. A kipm nakure kirkap a tu melnum ute wor a pikekg amo epep ai. 30 Atom kipm la kolkil la, 'Kol a pikekg men rpmi ik wang a tu mamikg mamin mansan amenen pa, men kolake ntimprak ilm tu melnum okwripm pa imo pa, kalpis.' 31 23:31 Kwap 7:52Yangkipm a kipm la kolpa pa, pa kipm laron kipm alkipm la kipm walwalpopm walyaru a tu melnum a pikekg alm tu melnum okwripm a Maur Wailen pa amo pake. 32 Kolpa ti kai kipm kai ntokg nikgwalpm kol a pikekg tu wapyipmiri a walyipmiri akipmen antokg pa kolpa kai lan o! 33 23:33 Mat 3:7; 12:34; Luk 3:7Kipm pa paipm kolen ul angketepm. Ikga wa kipm ngkom nlokgen anong paipm pa la kolai, kalpis. Kipm ikgam kai ore pake.

34 Kupm lanakepm kolkil la, kupm ukwa tu melnum okwripm, a tu melnum a antiwe ariwe watin a tu melnum a aroaro wonel kipm yangkipm a Moses pa tu kaintepm. Pake ikga kipm ilm tiur imo, a kurkurng tiur rki yo okgmangki a wa or tiur itni wan a atning atning yangkipm a Maur Wailen atnewe, a wa ungkwanten kai anong yela tatu palpa. 35 23:35 Ngkat 4:8; 2 Por 24:20-21Kolpa ti ikga kipm uwi paipm nimpon tu a pikekg alm tu melnum ute wor a pikekg rka kanokg ti amo kaingkai pa. Melnum wor wor pikekg tu alm pa, tu alm angko Apel pa aye or pa kulngkul kul plalng angko Sekaraia, warim a Perekia. Sekaraia pa pikekg tu almpel kawor itna kawor yipmingki wunen itna kuin a wan klalen, a tipmakg a alm eng alwor uk Maur Wailen. Pati am pikekg tu a kipm ti antokg paipm tike. 36 Kil kupm lanakepm aklale wrisen. Akalmpe a paipm a pikekg tu pa antokg paipmel tu melnum wor pa, ikgam kipm wrong kin a kipman a rka ti uwi tike.”

37 “Woi, arein kipm anong Serusalem, kipm akangklei almpalm tu melnum okwripm a Maur Wailen pa amo, a wa kipm akwesel tu melnum akwapel a Maur Wailen a kil ukwa kulngkul eng kipm ti. Wang watipmen ai kupm la uwi kipm wrong kin kipman a anong Serusalem pa iye kul itni wris, eng ikglen kolen karek man a ak iplepm ipaarng karek nampi pa, ari kipm karken. 38 23:38 1 Tukg 9:7-8; Serem 22:5Kolpa ti kipm itning, anong akipmen pa ikga Maur Wailen nuurng itni kupuk kalpmel kolti. 39 23:39 Nang 118:26Kol kupm lanakepm kolkil la, kipm ikgake wa riwopm nti ur, kolpa kai ngko wang a ikga kipm laron kupm ti la, 'Maur Wailen ukwa melnum pa, atom kil nar, ti mentepm lkel wor ngkit nang akilen.'”