22
Yangkipm kla a la tu talpulng ok a melnum tukgunakg a akwewen pa
(Luk 14:15-24)
1 Sisas kil wa la yangkipm kla ur kil kolkil la, 2 “Maur Wailen kil itna wailen ikgalen ipma a melnum pa, pati kolen melnum tukgunakg ur a itna ep ikgalen anong kanokg wail ur pa, kil la ntokg okipma wail ur il itnen warim kipman alkil la uwi kin iye. 3 Kil ukwa tu melnum akwapel alkil pa kai lanaki tu melnum a pikekg kil akwenten ep, la mpa tu wli eng okipma wail a kil antokg pa, ari tu karken. 4 Atom wa kil wa ukwa tu melnum akwapel tiur alkil pa wa kai anti ur lanaki tu melnum a pikekg kil akwenten pa la, 'Kipm kul eng tepm kai o! Okipma am kil numprampen ase. Kil alm manto nongko nepm watin a wa nampon manto nepm watin warimpen wor tiur pa alm ntampen numprampen elngtitna ase. Ti kipm kul eng tepm kai ntokg okipma pa il itopen, itnen warim kipman akilen la uwi kin iye ai.'
5 Tu melnum akwapel alkil pa kai lanaken pa ari, ake tu atning. Am anel kai rak atn palpa ase. Tiur pa kai akwap kai wring, wa tiur pa kai akwap marpm alntuwen. 6 22:6 Mat 21:35Wa tiur a rka pa tu arkulen antokgten paipm, atom oren amo. 7 Melnum tukgunakg pa ari kolpa, kil ipma wakget paipm. Atom kil ukwa tu melnum a almpwrong alkilen pa kai alm tu melnum a wet almpor tu melnum akwapel alkil pa, a ak lap wan anong atuwen pa kai plalng.
8 Atom kil lanaki tu melnum akwapel alkil pa la, 'Okipma am kupm numprampen plalng elng itna ase. Pake tu melnum a pikekg kupm akwenten ti pa tu antokg paipm, eng tu talpulng ok a kupm akwenten la wli ntiwopm il okipma ti. 9 Kolpa ti kipm kai tutu ya wail wail, ya wenting wenting pa. Kipm ri tu mlaur pa, kipm laniken la tu kul il okipma akupmen ti.' 10 Tu melnum akwapel alkil pa atning kolpa atom tu kai tatu ya wail wail, a ya wenting wenting pa. Tu ari tu mlaur a wor aki paipm pa tu lanaken kolti. Atom tu kimeket arpme tita kolpa kai wan ok okkapmet wail a al al okipma atnewe pa, kaingkai wan pa pik antiwe wrong a wli pa kolti.
11 Tu kai rka wan okipma pa plalng pa, melnum tukgunakg pa kil kai kawor ari wrong a wli rka wan pa. Atom kil ari melnum wris ur pa ake kil nowe apm wor ur eng aye kai ak ari kin kipman a awi tita pa. 12 Atom melnum wailen pa lanaki melnum ake nowe apm wor pa la, 'Melnum alkupm, ake kitn nowe apm wor a kin kipman awi tita wai aye wli rpma ti?' Melnum pa atning, yangkipm kalpisen tarng rpma kolti. 13 22:13 Mat 8:12; 25:30; Luk 13:28Atom melnum tukgunakg kil lanaki tu melnum akwapel alkil pa la, 'Kipm yipo nepm wampel melnum pa, atom ngkit ngkliwel elng kawor miningket pa. Pa wrik paipm a tu kirkar akg nampok paipm wrisen rkawe.'”
14 Sisas la yangkipm kla pa plalng pa wa kil wa la, “Kol Maur Wailen pa kil akwen wrong wailet, pake kil awi wrong wusoken a kil takwei pa kolti.”
Akasen marpm a uk kai melnum tukgunakg a tu Rom
(Mak 12:13-17; Luk 20:20-26)
15 22:15 Mak 3:6Atom tu melnum a arpmen yangkipm yiprokgen a Moses pa tu kai rka yapon yangkipm eng la mpa ilm ipmawel Sisas pa, eng la kil la oklala ur kai paipm pa, mpa tu iyewel kai ntokg yangkipm. 16 Atom tu ukwa tu melnum tiur alntuwen pa nampon tu melnum tiur a Erot pa kai eng Sisas. Atom tu armpwonel aknukwar la, “Melnum a kaling plan tu, men ariwe la kitn pa melnum a la yangkipm a aklale wrisen kolti. Kitn ake ngkark eng nikgwalpm oklala a mlaur pa, kalpis. Kitn laron naken ya a Maur Wailen pa ute wor aklale kolti naki tu wrongkwail a wor a paipm. 17 Kitn laniko nikgwalpm ur a kitn akwonalmpen pa ri? La kol mentepm uk marpm Kaisarus, melnum tukgunakg a tu Rom a awi marpmel mentepm pa la, pa wor aki?”
18 Ari Sisas pa kil ariwe nikgwalpm paipm atuwen pa ase. Atom kil lawen la, “Kipm pa melnum a kansil plan ak num enen ti kolti. Wa kipm wa aknukuar akor kupm ti eng ntei? 19 Ti kipm plantopm marpm a kipm angkli angkli uk melnum tukgunakg a tu Rom ti ri!” Atom tu aye marpm ok ur pa aye kai alkel. 20 Atom kil asenten la, “Ti nang ikgokg a mla ela marpm kil?” 21 22:21 Rom 13:7Tu akalmpe la, “Nang ikgokg pa a Kaisarus, melnum tukgunakg a Rom pake.” Atom kil lanaken la, “Kolpa ti kipm uk kweikwei a melnum tukgunakg a Rom pa kipm uk kai kil alkil. A kipm uk kweikwei a Maur Wailen pa kai eng Maur Wailen kil alkil.”
22 Tu atning kolpa, tu wrekg paipm kolti. Tu wrekg naurngkel kolti am kaingkai ase.
Tu melnum a amo amo pa ikga wrekg wrekg aki kalpis?
(Mak 12:18-27; Luk 20:27-40)
23 22:23 Kwap 23:8Ak wang wris pa tu Satyusi tu wa kul eng Sisas. Am tu pa pati tu melnum a lala tu melnum a amo kaingkai pa, ikgake wa wrekg wrekg, kalpis. Tu alntu pa ariwe ase, atom tu ak yangkipm kolkil la alm ipmawel Sisas pa la kolpa la, 24 22:24 Yang 25:5”Melnum a kaling plan tu, yangkipm a Moses pikekg kil kaling planto pa la kolpa la, 'Kol kipman aye kin, atom warim kalpisen, atom kil imo pa, mpa wa wusok alkil pa uwi kin karpikg pa iye eng ngket warim eng ngklin wailen alkil a pikekg amo pa.' 25 Kol wusok wail wampwomis wampwompwekg pikekg rpma a pa. Wailen pa aye kin, atom warim kalpisen, atom amo naurng kin pa rpma pa eng tu wusok wusok alkil pa. 26 Wailen pa amo pa warim kalpisen kolti. Pa wa wusok pa awi wampuk wa warim kalpisen, wa kil amo. Tunteng wusokwail klungen wampwomis wampwompwekg pa am teng karpo tita aye kin karpikg pa kai, warim kalpisen kolti amo kimeket. 27 Kanukg pa kin pa amo eng plalng pake. 28 Atom kol wang a tu wusokwail wusokwail a pikekg amo kaingkai pa wa wrekg wrekg i kirkap a u mlaminel pa kulor pa, kin a pikekg tu pa kimeket aye pa, kin pa ikga kil kin a mla?”
29 Ari Sisas akalmpe la, “Nikgwalpm akipmen ti kai ar atnen a ake kipm ariwe yangkipm wrkapm a Maur Wailen ti, a titnongket akilen pa. 30 Ikga ik wang a tu kin a kipman a pikekg amo kaingkai pa wa wrekg wrekg pa, tu ikgake iye tita pa, kalpis. Tu ikga rki i kolti kolen tu maur angklin a Maur Wailen a rka kaino anong wor pa.
31 Akasen a kipm asen kai melnum a amo kaingkai pa la tu ikga wrekg wrekg aki kalpis, ti ake kipm angkleikg oklala a Maur Wailen lanakepm ela kai wrkapm alkilen pa. Pa la kolkil la,
32 22:32 Taku 3:6; Mat 8:11'Kupm ti kupm Maur Wailen a Apraam, kupm Maur Wailen a Aisak, kupm Maur Wailen a Sekop.'
Yangkipm pa planto la, melnum amo kai kalpis kolpa pa, pa mpa Maur Wailen kil ikglenten kolai, kalpis. Melnum a amo pa tu ake kai kalpis pa. Tu kai rka, atom Maur Wailen kil ikgalen tu pake.” 33 Tu wrongkwail kin a kipman atning yangkipm a kil laron naken kolpa atom tu wrekg paipm.
Yangkipm titnongket a Maur Wailen a itna ep
(Mak 12:28-34; Luk 10:25-28)
34 Sisas kil la yangkipm pa elng kai eng tu Satyusi pa, tu arkol ok tatar rka. Wa tu melnum a arpmen yangkipm yiprokgen a Moses pa atning pa, tu kai rka wris akorla yapon yangkipm. 35 Tu yapon yangkipm plalng pa, melnum wris ur atuwen a itna yirokgel angklin melnum a antokg yangkipm pa wrekg itna akasen Sisas pa almpel ipma la, 36 “Melnum a aroaro wonel tu, yangkipm titnongket a i itna ep?”
37 22:37 Yang 6:5Ari Sisas akalmpe lanakel la, “'Kitn mpa plan ipma wor wakrongen Wailen kil Maur Wailen akitnen pa nimpon nol nikgwalpm, amen wor, a lngkep akitnen pa kai kimeket.' 38 Pa yangkipm titnongket wail manten a itna ep ampake. 39 22:39 Lipai 19:18; Mat 7:12Wa yangkipm titnongket wail manten ur a wa itna kai arkekg pa pati itna kolkil, 'Kitn mpa plan ipma wor wakrongen mlaur kolen kitn plan ipma wor wakrongen kitn alkitn pa.' 40 22:40 Rom 13:10; Kal 5:14Yangkipm titnongket wekg pa pati yangkipm yiprokgen a yangkipm titnongket wrongkwail a Moses a tu melnum okwripm a Maur Wailen laron pa, pa am kai alm itna yangkipm manten wekg pake.”
Antokg kolai atom Krais pa kil warim kipman a Tepit a wa Wailen a Tepit pa?
(Mak 12:35-37; Luk 20:41-44)
41 Tu melnum a arpmen yangkipm yiprokgen a Moses pa tu rka aken tita rka pa atom Sisas asenten la, 42 22:42 Son 7:42”Kipm akwonalmpen kolai Krais a Maur Wailen ukwa kul nar pa, pa la pa kil palng wli mla?” Ari tu lanakel la, “Kil walpopm ur a angket ale a Tepit ti kul tike.”
43-44 22:43-44 Nang 110:1; Mat 26:64Sisas kil wa la kolkil lanaken la, “Tepit kil pikekg ep ai la kolkil,
'Maur Wailen kil la kai Krais Wailen pa la kolkil la, “Rpmi kai wam wi akupmen pa rpmi i, kupm or tu wrongmanto akitnen pa yikak rkganti mengkel itni orngwatneikgen kitn pa.”'
Antokg kolai atom Maur Wor a Maur Wailen pa uk nikgwalpm Tepit pa, atom wa kil wa akwe kil pa la Krais Wailen pa? 45 Ti kol Tepit pa kil ukwewel la Krais Wailen pa, pati wa antokg kolai atom Krais Wailen pa kil walpopm a Tepit pa?”
46 Akentiwe mpa ur ikilmpe ok akilen pa, kalpis. Atom ak wang pa aye or pa kai pa, tu ngkark om. Atom ake wa tu akasen oklala ur wa kai eng kil pa, kalpis.