1 Sisas kil la oklala pa plalng pa, wa kil wa la kai tu watnom alkil ti la, 2 26:2 Taku 12:1-27; Mat 20:18”Kipm ariwe pa, a wang wekg kolti eng wang wail a pikekg Maur Wailen ak awi tu amentepmen aye kul takuleikgen tu Isip pa, atom ik wang pa tu ikga elng Warim Kipman a Melnum pa kai eng tu kurkurngkel rki yo okgmangki.”

3 A wang wekg pa, tu tukgunakgen a tu ipma krakgen a ak ak kwap eng al wor uk Maur Wailen, a tu melnum wail wail pa, tu anel kai rka wris kai wan anong a Kaiapas, melnum tukgunakg a tu melnum ipma krakgen. 4 Atom tu akor ya ampen la rkul Sisas eng la orel imo. 5 Ari tu la kolkil la, “Ake mpa mentepm rkulel ik wang wail a antokg okipma pa, pa mpa ntokg tu wrong kin kipman ipma wakget or tita wail, ti kai itni papen.”

6 Atom Sisas kinar anong Petani rpma wan a Saimon, melnum a pikekg i paipuk awi pa. 7 26:7 Luk 7:37-38Kin wris ur pa kil aye wes kaingkuren ur pa pik atnen u yaprekget wor a pikekg ak marpm wail paipm awi pa, aye or eng Sisas. Kil ngkaten ak kaluk Sisas pa kai tukgunakg pa ak wang a kil al okipma pa rpma. 8 Tu watnom alkil pa tu ari kolpa, tu karken atom tu la kolpa la, “Wa kil kaken u yaprekget wor pa eng kuina wai? 9 Kol u pa kol a ik uwi marpm wail manten, atom kol a uk tu melnum a rpma tukwok pa.”

10 Sisas kil ariwe kuina ur a tu la pa atom kil lanaken la, “Wa kipm uk kaikuten kai kin pa eng ntei? Pa kil akwap wor wrisen eng kupm ti. 11 26:11 Yang 15:11Tu melnum a tukwok pa ikgam antiwepm rpma pa rpma pake. Pake kupm ti pa ikgake ntiwepm rpmi pa i pa, kalpis. 12 A kil alung u yaprekget wor kil kai num akupmen kil pati, kil antokg kupm ti nimprampen eng ikga tu uwen kupm ti kai kirk pa. 13 Kupm lanakepm aklale wrisen, ikga tu a laron yangkipm wor yela tungtangkem a kanokg ti pa, ikga kuina ur a wet kin ti antokg pa, ikga wa tu laron kolpa eng ikwonilmpen kil pa iye or pa kai.”

14 Atom Sutas Iskariot, watnom ur a tu melnum wampwam yikak wekg a Sisas aroaro wonel pa, kil aye yangkipm itna ya kai naki tu tukgunakgen a tu ipma krakgen a ak ak kwap eng al wor uk Maur Wailen pa. 15 26:15 Sekar 11:12; Son 11:57Kil la kolkil la, “Mpa kipm uk kuina kupm ti, eng mpa kupm elng Sisas ti kai wam akipmen pa?” Atom tu angkleikg marpm a tu Suta pa kamel wris tuwek wampwam pa alkel. 16 Kil awi krimpwayek pa plalng pa, kil akor ya ur eng la uk Sisas pa kai wam a tu pa.

17 26:17 Taku 12:14-20Wang wail aripm ur a akangklei wring wris wris men angklon nok tingklak a ak mpim ap mringen ak oren pa am ngkaten ak wang wet tike. Tu watnom a Sisas aroaro wonel pa kai eng Sisas pa atom lanakel la, “Kitn la men nimprampen manto walkg malkgu war kweikwei okipma ti itni kai a i, atom mpa kitn il pa?” 18 Kil lanaken la, “Kipm kai laniki melnum ur kil kai anong wail pa la kolkil la, 'Kupm Melnum a kaling plan tu melnum pa la kolkil la, “Wang akupmen am kul wreren tike, ti kupm nampon tu watnom alkupmen ti, mpa men il manto walkg malkgu kweikwei ti rpmi wan akitnen tike.”'” 19 Atom tu watnom alkil pa akwap katila ok a kil lanaken pa, atom tu numprampen okipma pa.

20 Takgni kinar pelpel ti pa, Sisas nampon tu watnom wampwam yikak wekg alkil pa kai rpma okg arke tita la il okipma pa. 21 Tu rka al okipma pa pipa, Sisas lanaken la, “Kupm lanakepm aklale wrisen la, wris ur akipmen ti mpa uk ya eng uk kupm ti kai wam a tu wrongmanto.” 22 Tu watnom alkil pa anel ipma kaikut paipm, atom ur asen plalng pa wa ur asen kolpa la, “Wailen, mpam kupm ti aki mla?” 23 26:23 Nang 41:9Ari Sisas akalmpe la, “Melnum a anti kupm angkle okipma kai kaimung wris pa pati am melnum pake. 24 Warim Kipman a Melnum ikga imo kolen wrkapm a Maur Wailen la pake. Pake woi, arein melnum a uk ya eng uk Warim Kipman a Melnum pa kai wam a tu wrongmanto pa, kil ikga uwi paipm. Kola wor kol melnum pa kolake pikekg man raku, kol a kalpis.” 25 Atom Sutas, melnum a uk ya pa, kil wrekg akalmpe kolkil la, “Melnum a kaling plan men, mpam kupm ti ur tike?” Ari Sisas lanakel la, “Am kol a kitn la pa aklale pake.”

26 Tu al okipma pa rka pa, Sisas awi okipma pa aye itna ukwor Maur Wailen pa plalng pipa, kapor alken atom lanaken la, “Kipm uwi ilo, kil num akupmen.” 27 Atom tu al plalng pa, wa kil wa awi u wain pa aye itna ukwor Maur Wailen pa plalng pipa, almten atom kil lanaken la, “Kipm plalngen il o! 28 26:28 Taku 24:8; Serem 31:31-34; Sekar 9:11; 1 Kor 10:16Pa walmpopm akupmen a ungkwan eng lam kla nampon Maur Wailen, atom kil ungkwan paipmpaipm wrongkwail a kipm melnum antokg pa. 29 Kupm lanakepm la, kupm ikgake il u wain kil nti ur. Kupm ikga itni nungkwangen kolpa kai ngko wang a ikga Yan alkupm kil ikglen kweikwei wrongkwail pa pipa, kupm ntiwepm il u wain weten pa.”

30 26:30 Luk 22:39; Son 18:1Tu awi okipma pa plalng pa, tu ngkat nang ur pa ak plalng pa, tu kai kaino nang Olip.

31 26:31 Sekar 13:7; Son 16:32Sisas kil lanaken kolpa, “Ik mining ti pa kipm plalngen mpa ngkirk nuurngtopm plalng. Kol Maur Wailen la ela wrkapm alkilen pa la kolkil la, 'Kupm ilm melnum a ikgalen manto walkg malkgu pa pipa, manto walkg malkgu pa ikga ngkirk kai itn palpa.' 32 26:32 Mat 28:7,16Pake wa kol kupm wrekg i kirkap pa kulno pa, ikga kupm eptepm eng kipm kai rpmi kai Kalili.” 33 Pita kil akalmpe kai eng Sisas pa la, “Tu men alpmen ti pa mpa ngkirk pake, kupm pa mpa kalpis.” 34 26:34 Mat 26:69-75Ari Sisas kil akalmpe kolpa la, “Kil kupm lanakeitn aklale wrisen la, ik mining ti pa, karek ake la pa, kitn mpa lam nang a kupm ti nti wraur.” 35 Pake Pita kil la kolpa la, “Kol tu ilmpopm imo nimpokgenteitn pa, kupm ake mpa ngkirk eng lam nang akitnen pa, kalpis.” Wa tu watnom alkil pa, tu plalngen am wa la kolpake.

36 Sisas anti tu watnom alkil pa anel kai wrik ur a namput la Ketsemani, atom kil lanaken la, “Kipm rki kil, a kupm kai oklala niki Maur Wailen kai ketn ti.” 37 Kil awi Pita pa nampon warim kipman wekg a Sepeti pa antiwel. Ipma a kil pa kaikut paipm wrisen, kil rpma paipm titnowen num. 38 26:38 Son 12:27Atom kil lanaken la, “Ipma a kupm kil kaikut paipm wrisen ai eng a lok ngkliwopm kai imo. Ti kipmteng rpmi wulmpa ore oklala niki Wailen ti nti kupm ti.” 39 Atom kil wa naurngten kai ketn, atom kil elngtangko kinar kanokg ti akg arein oklala naki Maur Wailen pa la kolkil la, “La woi, Yaiyai akupm, kol antiwe pa, mpa kitn ngkit kalkuten a rpma kaimung ti tukulelkgtopm. Ik ik nikgwalpm akitnen pawo, ake mpa kitn ik ik nikgwalpm akupm kil.”

40 Kil oklala naki Maur Wailen plalng pa, kil wa yaper kai ari tu watnom alkil pa ari okg plalngen rka. Atom kil arowen ikgyokg, atom kil lanaki Pita pa la, “Karken a kipm antiwopm rpma waiketn ur? 41 Rpmi wonirpme, a oklala niki Maur Wailen ti, eng ake mpa kalkuten a palngtopm pa ik rkolng kipm pa ngko. Nol nikgwalpm ti pa atopen pake, numpwam ti pa lpmaak.”

42 Wa kil wa yaper kai anti ur eng oklala naki Maur Wailen pa la, “La woi, Yaiyai akupm, kol kitn ake la ngkiten kaimung a kaikuten kil tukuleikgtopm pa, kitn ik ik nikgwalpm alkitnen pa, kupm antiwe mpa il pa.” 43 Kil wa yaper kul ariwen ari ikgyokgalen ti okg rka. 44 Wa kil wa naurngten rka pa, kil wa yaper kai oklala naki Maur Wailen anti ur, kol wet kil oklala nakel anti wekg ai.

45-46 26:45-46 Son 14:31Kil oklala naki Maur Wailen plalng pa, kil wa yaper kul arowen ikgyokg lanaken la, “Kipm okgen na rka? A pake, wrekg ri! Wang am plalng tike, melnum a uk ya pa am wli tike, mpa uk Warim Kipman a Melnum ti kai wam a tu melnum a antokg paipmpaipm. Wrekg wrekg eng tepm kai o!”

47 Sisas la okyangkipm pa itna pa, Sutas melnum wris ur a tu watnom alkilen pa wli palng. Tu tukgunakgen a tu ipma krakgen a ak ak kwap eng al wor uk Maur Wailen nampon tu melnum wail wail pa, tu ukwa tu melnum watipmen aye kowri a yomis yomis kweikwei pa anti Sutas pa aye wli. 48 Atom melnum a la mpa uk Sisas kai wam a tu wrongmanto pa, kil pikekg yapon yangkipm nampon tu pa la, “Kipm ri melnum a kupm kai rkul nikron pa pipa, kipm rkul o! Melnum ampake.” 49 Sutas pinterng kai arkul nakrontel akwampor la, “Alketn wor, melnum a kaling planto!” 50 Ari Sisas akalmpe la, “Melnum wor alkupm, kitn wet kul la ntokg kuina, pa kitn ntokg o!” Atom tu kul yipuket Sisas pa wamparpmewel kolti, tu arkulel.

51 26:51 Son 18:26Watnom wris ur a Sisas aroaro wonel pa ari kolpa, kil wamnalu kowri alkil ti ak wangket nungkulkg wompel ur a melnum akwapel a melnum tukgunakg a tu ipma krakgen pa kitnangku kolti. 52 26:52 Ngkat 9:6; Amp 13:10Ari Sisas kil lanakel la, “Lupm kowri pa elngkinar timpal alkil pa! Melnum a alm tita ak kowri pa, ikgam wa tu uwi kowri pa ikilmpen pake. 53 Kitn ti akwonalmpen la kupm ti akentiwe akwe Yan akupmen ai, eng mpa kil ukwa tu maur angklin almpwrong akilen a angen mapming wail manten wampwam yikakwompwekg akilen ai nar eng ngklin kupm ti? 54 Yangkipm wrkapm a Maur Wailen la pa mpam palngtopm kolpake. Kol kupm ukwen tu pa nar ngklinsopm pa, yangkipm wrkapm a Maur Wailen la pa, ake mpa palng iklale.”

55 26:55 Luk 19:47; 21:37Sisas kil la kai tu melnum a kul la rkulel pa la, “Kipm la kupm ti melnum paipm ur, atom kipm aye kowri a yo kweikwei pa wli la ik rkulopm? Akangklei wang kupm itna wunong kaling plan tu melnum itna yalming a Maur Wailen pa, ake kipm kul arkulopm. 56 Pake kweikwei wrongkwail ri kil pa palng kanun yangkipm a tu melnum okwripm a Maur Wailen pikekg la ela kai wrkapm pa palng aklale.”

Atom tu watnom plalngen alkil pa naurngkel itna pa, a tu am ngkark kaingkai ase.

57 Tu melnum wet arkul Sisas pa, anel aye Sisas pa kai wan a Kaiapas, melnum tukgunakg a tu ipma krakgen. Tu melnum a aroaro wonel tu yangkipm a Moses pa nampon tu melnum wail wail, am rka wan pake. 58 Pake Pita pa angklokg wang kanukg kanukg, kolpa kanunten kai kawor wan anong akapm a melnum tukgunakg a pa, kai rpma nampon tu melnum wantengkwang pa rpma, la rkolng nungkulkg itning yangkipm a tu la Sisas pa la, mpa tu ntokg kai kolai.

59 Tu melnum tukgunakgen a tu ipma krakgen a ak ak kwap eng al wor uk Maur Wailen, a tu mringman pa tu akor yangkipm kansil ur, eng la mpa ik ilm Sisas ti imo. 60 Tu wailet pa aye yangkipm kansil wli pake, ake tu ansil yangkipm ur eng mpa ilmpel imo, kolpa kaingkai, melnum wekg ur pa wa wrekg kai itna. 61 26:61 Son 2:19-21Tuwekg la Sisas pa la, “Melnum pa la kolkil la, kil ikga tikale yalming a Maur Wailen pa plalng pipa, kil le wan weten pa ik wang wraur.”

62 Atom melnum tukgunakg a itna ep eng tu ipma krakgen kimeket pa wrekg la kai Sisas pa la, “Kitn ti ok kalpisen a akalmpe kai tuwekg a laweitn pa.” 63 26:63 Aisaia 53:7; Mat 27:12Pake Sisas pa terng itna, ake akalmpe ok ur. Atom melnum tukgunakg a itna ep pa lanakel la, “Kitn naren Maur Wailen a rpma yongkyong pa, kitn laniko iklale la, kitn Krais, Warim Kipman a Maur Wailen aki kalpis?”

64 26:64 Nang 110:1; Tani 7:13; Mat 24:30Sisas akalmpe la, “Ei, aklale, am kol a kitn la pake. Kil kupm lanaki kipm wrongkwail kolkil la, ikga itni waiketn kolti pa, ikga kipm ri Warim Kipman a Melnum ikga rpmi wam wi a Maur Wailen a Antiwe Titnongket Wail Manten. Wa kipm ikga ri kil ikga itni waipmunu pa ikiyewel nar.” 65 26:65 Mat 9:3; Son 10:33Atom melnum tukgunakg a itna ep pa nikgwalpm wakget aro apm alkil pa kil lanakel la, “Kil aknokgel Maur Wailen! Yangkipm ti kai paipm ase, ti ake mpa wa mentepm uwi melnum weten ur wa iyewli eng lawel pa! Ti kipm alkipm wet atning a kil ak nokgel Maur Wailen pa! 66 26:66 Lipai 24:16; Son 19:7Ti kipm akwonalmpen kolai melnum pa?” Ari tu akalmpe ok akil pa la, “Pa kil antokg paipm eng kil la kil alkil la kil Krais, ti kai kil imo!”

67 26:67 Aisaia 50:6; 53:5Atom tu ungkwawel wlikg kai ikgokg ti, a tu orel ak wam. Wa tu tiur pa wampor wam ntrawel kai tangkwei pa. 68 Tu orel kolpa a angklo ok pa lala, “Kitn Krais pipa, kitn la melnum ur a oreitn pa ri!”

69 Pita pa kil anti tu rpma kawor akapm. Atom kin akwapel ur pa kul ariwel atom lanakel la, “Kitn melnum ur pikekg anti Sisas kai Kalili am tike.” 70 Ari Pita kil la kil kalpis itna wulmpa a tu melnum wrongkwail a rka pa. Atom kil la, “Kupm akwekgel kuina ur a kitn la pa.” 71 Wa kil wa wrekg a pa wa kai itna kai yipmingki yun a kawor en ai, pa wa kin ur wa ariwel, atom wa la kai tu wrongkwail a rka pa la, “Melnum pa pikekg anti Sisas a Nasaret am tike.” 72 Ari kil wa lam nang a Sisas pa anti ur, atom kil akwen la, “Aklale wrisen kaino kwa, kupm akwekgel melnum a kipm la pa!” 73 Wa itna waiketnketn pa, tu melnum tiur a itna pa wa kai lanaki Pita pa la, “Kitn pa am kitn melnum ur a tu pa aklale pake. Men atning ok kromeng akitnen pa atom men ariwe la kitn melnum ur atuwen Kalili ampake.” 74 Ari Pita kil nikgwalpm wakget akwen aklale wrisen la, “Kupm akwekgel melnum pa, kupm kalpis. Kol yangkipm a kupm la kil kupm kansil pa, kupm ikga uwi paipm.” Kil la kolpa plalng pa karek kil la. 75 26:75 Mat 26:34Pipa Pita kil akwonalmpen yangkipm a pikekg Sisas kil la pa la, “Karek ikgake la pa, kitn ikga lam nang akupmen pa nti wraur.” Pa Pita kil kawor akg paipm kawor en ai.