1 Ak kong miningket ti pa, tu melnum tukgunakgen a tu ipma krakgen a ak ak kwap eng al wor uk Maur Wailen pa nampon tu melnum wail wail a ikgalen tu wrong kin kipman pa, tu akor nikgwalpm la ilm Sisas imo. 2 Tu angkuten wam a Sisas pa plalng, atom tu ayewel kai uk kai wam a Pailat, mringman wailen a tu Rom a ikgalen anong kanokg a Sutia pa.

3 Sutas, melnum a pikekg uk Sisas kai wam a tu wrongmanto pa, kil ari a tu yapon yangkipm la ilm Sisas pa imo kolpa atom, nikgwalpm wor pa palngtel, atom kil arein la, “Pa kupm ak kwap paipm tuwa.” Kil awi lukgwayek kamel wris tuwek wampwam a angkli kul rpma kil pa, aye yaper kai uk tu melnum tukgunakgen a tu ipma krakgen a ak ak kwap eng al wor uk Maur Wailen nampon tu melnum wail wail pa. 4 Atom kil la kolkil la, “Kupm antokg paipm ase, eng kupm uk ya la kipm ilm melnum wor wrisen pa imo.” Atom tu akalmpentel la, “Pa ake kwap a men ti, kol am kitn alkitn pa ikwonilmpen ai.” 5 27:5 Mat 26:14-15; Kwap 1:18-19Kolpa atom Sutas angkli lukgwayek pa elng kawor rmpa yalming a pa, a kil kai angko til.

6 Tu melnum tukgunakgen a tu ipma krakgen a ak ak kwap eng al wor uk Maur Wailen pa awi lukgwayek pa atom tu la kolkil la, “Kil lukgwayek la ikilm melnum, ti ake mpa mentepm ermpi nimpon marpm a yalming a Maur Wailen pa.” 7 Kolpa atom tu yapon yangkipm la ik krimpwayek pa ik rmpen kanokg ur a tu angkon eng ak ak kuntuk, a wa elng itni kolen kirkap ur a uwen tu melnum a ya watinet wli pa. 8 Kolpa atom tu akwe wrik nang pa la, Kanokg Walmpopm. Atom wrik nang pa am tu akwe kolpa itna pake. 9 27:9 Sekar 11:12-13Atom yangkipm ur a pikekg Seremaia melnum okwripm a Maur Wailen la pa palng aklale, pati la kolkil, “Tu Isrel awi marpm kamel wris tuwek wampwam pa kai repmrepm kolen lukgwayek a pikekg tu elng itna la ikga ikirmpen kil pa am kolpake. 10 Atom tu ak marpm pa akarmpen kanokg ur a tu angkon eng ak ak kuntuk. Pa kanun yangkipm a pikekg Wailen kil lanakopm pa.”

11 Atom tu aye Sisas pa kaino itna wulmpa a Pailat mringman wailen pa atom kil asentel la, “Kitn pa melnum tukgunakg a tu Suta am tike?” Atom Sisas kil la kolpa la, “Ei, am kol a kitn la pake.” 12 27:12 Aisaia 53:7Tu melnum tukgunakgen a tu ipma krakgen a ak ak kwap eng al wor uk Maur Wailen nampon tu melnum wail wail pa tu almpel yangkipmok watipmen, ari ake Sisas akalmpe yangkipm ur, kalpis. 13 Kolpa atom wa Pailat lanakel la, “Ti ake kitn atning yangkipmok watipmen a tu almpeitn ti?” 14 Ake wa Sisas akalmpe ok ur. Kolpa atom mringman wailen a itna ep pa kil akwonalmpen watipmen.

15 Akangklei wring wris wris atom angko wang a tu al akule wan pa, mringman wailen pa ungkwan melnum wris a rpma wan tipmining pa kulor kai en. Wrongkwail kin a kipman pa wakrongen melnum mla ai, atom tu la pa Pailat kil ungkwan melnum pa a wan tipmining pa kulor kai en. 16 Ak wang ti pa melnum ur a rpma wan tipmining a tu ariwewel worwor la kil melnum paipm, nang akilen pa Parapas. 17 Tu wrong kin a kipman kai rka wris pa, Pailat asenten la, “Kipm wakrongen melnum mla lala kupm ungkwan kawor en eng kipm pa? Parapas aki Sisas a namput la Krais?” 18 27:18 Son 11:47-48; 12:19Pa kil ariwe la wet tu elng Sisas pa kul wam akilen ti pati atnen tu ipma paipm eng kil pake. 19 Pailat kil rpma wrik alkil a rpma rpma eng atning yangkipm pa, kin alkil pa ukwa yangkipm kil kulntel ak angkengkel la kolkil la, “Ake mpa kitn ntokg kwei ur kai melnum ute wor pa eng ake kil antokg paipmpaipm pa, kalpis. Wet ak mining kil pa kupm okgwangket kai melnum pa ari kupm awi kaikuten wail.”

20 Pake tu melnum tukgunakgen a tu ipma krakgen a ak ak kwap eng al wor uk Maur Wailen nampon tu melnum wail wail pa tu uk yangkipm tu wrong kin a kipman pa atom tu mpraken la, “Elngen Parapas pa kai o, a kipm ilm Sisas pawo!” 21 Atom mring wailen pa wa asenten la, “Kipm wakrongen mla wris ur a tuwekg la mpa kupm elng kulor kai eng kipm pa?” Ari tu akalmpe la, “Men wakrongen Parapas.” 22 Pailat kil asen tu pa la, “Ti mpa kupm ntokg kolai Sisas a tu namput la Krais ti?” Ari tu akalmpe la, “Kurkurngkel rki yo okgmangki pawo!” 23 Ari Pailat kil asenten la, “Eng kil antokg paipmpaipm kuina wai?” Ari tu mpraken akalmpe yikakatnen paipm la, “Kurkurngkel o!”

24 27:24 Yang 21:6-9Tu itna pa itna pa, la plalplal mainmain wreren eng a or tita, kolpa atom Pailat kil titnowen num, yangkipm kalpisen a ak angkeng tu pa. Atom kil ari kolpa, kil awi u pa aklak wam alkilen ti eng mpa tu wrongkwail pa ri, a kil la kolkil la, “Kupm yangkipm kalpisen eng antokg melnum kil amo. Kalkuten pa itna kai kipm alkipm pake, kupm pa kalpis.” 25 27:25 Kwap 5:28Ari tu wrongkwail kin a kipman a pa akalmpe la kolkil la, “Elng kalkuten a amo akilen pa kul men ti nimpon tu warim amenen ti rki!” 26 Atom Pailat pa kil ipma kalkuten, pake kil katila nikgwalpm a tu pa kolti ungkwan Parapas pa a wan tipmining pa kulor kai en eng tu pa. A kil lanaki tu melnum a almpwrong pa awi ampei pa ak ake Sisas pa plalng pa, uk kil elng kai wam atuwen pa la tu iyewel kai kurkurngkel rki yo okgmangki ai.

27 Atom tu melnum a almpwrong a mringman wailen pa tu aye Sisas pa kai kawor wan a mringman wailen pa, atom tu akwe tu melnum wailet a almpwrong pa wli kapringentel. 28 27:28 Luk 23:11Tu aner apm akilen pa, atom tu nowewel apm watet wail ur pa. 29 Tu kapring ampei iket ur pa kolen wanukgmis pa, atom tu elng rpma tukgunakg akilen pa. Tu alkel wark pa kai wam wi akilen pa. Tu kalingkake kil pa kol kil melnum tukgunakg atom tu kapor kilko aleinsel, a ak nokgelel la, “Melnum tukgunakg a tu Suta, alkeitn wor!” 30 27:30 Aisaia 50:6Tu ungkwawel wlikg, plalng pipa, tu awi wark kai wam alkilen ti wa akorel kai tukgunakg ti. 31 Tu ak kolpa kai, plalng pipa, tu aner apm watet wail kai num a kil pa kai takwelkg, a wa nowewel apm alkilen pa. Atom tu ayewel kai eng la kurkurngkel rki yo okgmangki.

32 Tu akawi Sisas pa angkom naurng anong wail pa or ya pa kai la kurkurngkel rki yo okgmangki pipa, tu ansil melnum ur kai anong Sairini, nang akilen pa Saimon. Atom tu tirpmingentel la kil ngkit yo okgmangki a Sisas pa iye. Atom kil ngkat aye kai. 33 Tu kai palng kai wrik ur a tu namput la Kolkota. Yiprokgen a wrik nang pa pati tukgunakg timpal. 34 27:34 Nang 69:21Tu kai palng wrik pa pipa, tu ngkaten u wain ur a wuten tu ak kweikwei kinipis ak oren pa ngkaten alkel, la mpa kil il eng ik kupuketel num a wleket pa. Atom kil al akwiyen ari ake kil lala il pa, kalpis. 35 27:35 Nang 22:18Tu karkurngkel rka yo okgmangki pa, plalng pa, tu alm nep pimpos pa la mla ai klangkil pipa, mpa tu mpreing apm a Sisas pa. 36 Tu antokg kolpa rka ikgalen Sisas pa rka. 37 Tu nira yangkipm yiprokgen na a tu alm Sisas pa, atom karkurng itna kaino yo okgmangki tukgunakgen kwa a Sisas pa kolkil la, “Kil Sisas, kil Melnum Tukgunakg a tu Suta.”

38 27:38 Aisaia 53:12Tu karkurng melnum paipm wekg pa itna wreren Sisas pa. Ur pa itna wam wi a ur pa itna wam wangkokg. 39 27:39 Nang 22:7; 109:25Atom tu wrongkwail kin a kipman pa kaingkul angkli wulmpa pa elng kaino ariwel atom tukgunakg wilwil a ak nokgelel 40 27:40 Mat 26:61; Son 2:19lala, “Kitn pikekg lala kitn antiwe titnongket a tikale yalming a Maur Wailen pa atom wa le weten ik wang wraur ti, pati kitn ngklin kitn alkitn pawo! Aki kitn la kitn Warim Kipman a Maur Wailen pa pati, kitn nuurng yo okgmangki pa nar o!” 41 Tu melnum tukgunakgen a tu ipma krakgen a ak ak kwap eng al wor uk Maur Wailen, a tu melnum a aroaro wonel tu yangkipm a Moses pa nampon tu melnum wail wail pa am wa tu wa aknokgelel kolpa yat pake. 42 Tu la kolpa la, “Kil pikekg angklin tu wrong kin kipman pake, kil akentiwe angklin kil alkil ti, kalpis. Kil melnum tukgunakg a mentepm Isrel, ti itni eng kil nuurng yo okgmangki pa kulnar pa pati, mpa mentepm ukipma kunun kil pa. 43 27:43 Nang 22:8Kil pa ukipma kai Maur Wailen, kolpa ti mpa mentepm ri Maur Wailen kil mpa ipma wor eng kil pa atom ngklinsel ur pa. Eng ntei, kil alkil ti la kil Warim Kipman a Maur Wailen.” 44 Am wa kolpa yat pake. Melnum ikgwampet wekg a tu karkurngken itna wreren kil pa, wa ekg wa aknokgelel yat.

45 Takgni no pirng pa, aye mining pa kul kai akipaarng kanokg ti yela, kolpa itna a a, tukoryauk pa angkli om pa, mining pa kai plalng pa wa ran. 46 27:46 Nang 22:1Mining itna pa Sisas kirkar akg akwe yikakatnen la, “Eli, Eli, lema sapaktani?” Pa la kolkil la, “Maur Wailen akupm, Maur Wailen akupm, wa kitn naurngkopm eng ntei?” 47 Wa tu melnum tiur atning pa atom tu wa lala, “Palpa kil akwe Elaisa.” 48 27:48 Nang 69:21Atom melnum wris ur pa pinterng kai ak kweikwei ur a akarkolng u pa, angklewe u wain kinipis pa, atom aye kai elng itna wark pa uk kai Sisas pa la kil il. 49 Ari wa tu tiur pa wa lala, “Itni pen, itni eng tepm ri la, mpa Elaisa pa kulnar ngklinsel aki kalpis?” 50 Wa kil wa kirkar akg akwe yikakatnen anti ur plalng pipa, kil amo.

51 27:51 Taku 26:31-33; Ipr 10:19-20Atom ak wang ketn pa pipa, apm kaki wail a tu alekg rka akangketen yalming tiwel a Maur Wailen pa rakol wompwekg, angkaino kwa ai kinar plalng kinar kanokg ti. A yelm ti no a wes wail wail ti rakol. 52 Kirk a tu u mlamin pa rakol wompwekg okore itna atom, tu melnum wailet ute wor itna wulmpa a Maur Wailen pikekg amo kaingkai pa, wa wrekg wrekg rka. 53 Tu wrekg wrekg a kirk pa or rka nungkwangen, tu alil Sisas pa rmpa kawor mlamin pa plalng pa, kil wrekg or rpma pa, tu palng angko wunong kai anong wail a Maur Wailen amprin eng kil alkil pa, eng tu wrongkwail ariwen om. 54 Tu melnum a almpwrong pa nampon melnum tukgunakg alntuwen pa tu ikgalen Sisas pa rka. Pa tu ari yelm pa no, a wa kweikwei wrongkwail a palng pa atom, tu ngkark warwar paipm wrisen, atom tu la, “Pa kil Warim Kipman a Maur Wailen aklale tuwa!”

55 27:55 Luk 8:2-3Tu kin wailet a pikekg anti Sisas atn angklinsel angkai Kalili ai kul pa, tu itna kai watin ai ari kuina ur a palng kai Sisas pa. 56 Kin wris ur pa Maria a Maktala, wa ur pa Maria man a Semis ekg Sosep. A wa wris ur pa man a Son ekg Semis, kin a Sepeti.

57 Atom ak nungkurikg ti pa melnum ur a kai anong Arimatea a antiwe kweikwei pa, nang akilen pa Sosep, kil wa melnum ur a ukipma Sisas a aroaro wonel tu pa. 58 27:58 Yang 21:22-23Kil kai ari Pailat pa asentel la uwi yipmiri a Sisas pa. Atom Pailat kil awi wor la kil uwi yipmiri a Sisas pa iye kai. 59 Atom Sosep awi yipmiri pa kolti, yapo ak apm tangkoren maing wor ur pa, 60 27:60 Aisaia 53:9plalng pipa, ngkat aye kawor alil ermpa kirk weten alkil a pikekg kil u mlamin itna krongkwang pa elngitna eng kil alkil pa. Kil alil yipmiri pa ela kawor mlamin pa plalng pipa, kil talpul wes wail pa aye kai akampri mlamin ok pa plalng pa, kil kai. 61 Maria Maktala wa nangkur alkil pa, ekg rpma won kai kirk pa arpmen rpma.

62 Pa ak wang a tu Suta nimprampen eng wang wail a rpma eng yapm pa, atom wa okg or kong pa, tu melnum tukgunakgen a tu ipma krakgen a ak ak kwap eng al wor uk Maur Wailen, a tu melnum a arpmen yangkipm yiprokgen a Moses pa, tu kai rka wris anti Pailat pa. 63 27:63 Mat 12:40; 16:21; Mak 9:31; 10:33-34; Luk 9:22; 18:31-33; Son 2:19-21Atom tu la kolpa la, “Mring Wailen, men wonuwen yangkipm a pikekg melnum yangkipm kansil pa la pa. Pikekg kil rpma pa, kil pikekg la kolkil la, 'Ikga kupm imo rmpi wang wraur kai plalng pa, kupm wa wrekg i kirk pa kulor.' 64 Kolpa ti kitn uk yangkipm titnongket tu melnum a atnen kirk pa, eng mpa tu ikglen riworwor kolpa itni, wang wraur pa kai plalng. Mpa tu watnom alkil pa kai ik ikgwampel yipmiri a kil pa atom, wa laniki tu melnum pa la, kil am wrekg ase. Atom kansil a tu la kanukg ti pa, mpa wa wail manten angen kansil a pikekg kil la ep ai.” 65 Atom Pailat kil lanaken kolpa la, “Wor pa, kipm uwi tu melnum tiur alkupmen a almpwrong ti iye kai itnen kirk pa riworwor, ampur atnen paipmtel pa.” 66 Atom tu kai anel kla ur pa amprin wes a ak ampri mlamin ok pa elngitna ikgompen, a tu elng tu melnum a almpwrong pa itna atnen kirk pa itna.