1 Tu wrongkwail am ak kolpake, kin kipman wekg ur kil pa, ekg ak manet. Ti nang a kipman pa Ananias a nang a kin pa Sapaira. Ananias uk kanokg ur a tuwekg pa kai tu armpenten. 2 5:2 Kwap 4:34-35Atom kil awi marpm pa plan kin pa, tuwekg la ipma wris atom kil elng wompel pa ermpa eng tuwekg alntuwekg, a kil aye wompel pa aye kai uk kai wam a tu melnum wokgen akwapel a Sisas pa. 3 5:3 Son 13:2Kil alken marpm pa atom kil kansil lanaken la, “Marpm a tu armpentopm kanokg ti pa, am kupm alkepm kimeket am pake.” Ari Pita asentel la, “Ananias, wa kitn elng Satan pa ikgalen nol nikgwalpm akitnen pa atom kitn elng marpm wompel a kitn awi kai kanokg pa elngkirmpa eng kitn alkitn pa eng ntei? Wa kitn kansil Maur Wor a Maur Wailen kolpa eng ntei? 4 Kanokg pa alkitnen. Kitn la uk tu rmpen pa aki kalpis aki, pa nikgwalpm alkitnen. Wa kitn la uwi marpm pa atom kitn la iye aki kitn la uk aripm ur kai Maur Wailen pa, pa itna kai kitn alkitn pa. Ari wa antokg kolai atom wa kitn akwonalmpen kolpa atom kitn ak kolpa! Kitn ake kansil melnum ti pa, pa kitn kansil Maur Wailen.” 5 Ananias kil atning pa, kil elngtangko amo kolti. Wa tu mla ur a tu atning yangkipm pa, tu ngkark paipm wrisen. 6 Kil amo rmpa pa, tu warimpen tiur pa wli awi apm pa akyapowel kolti a tu ngkatel aye kai uwen.

7 Tu uwen kipman pa plalng, a wa tu itna watin ketnketn ari kin alkil pa wa wli palng, kil ake ariwe kipman alkil Ananias a wuten amo atom tu uwen pa. 8 Atom Pita asen la, “Ti kitn lanikopm ri, marpm a tu armpentepm kanokg pa am kil kimeket kilke, aki?” Ari kin pa akalmpe la, “Ei, marpm am pa kimeket pake.” 9 Atom Pita lanakel la, “Antokg kolai ti wet kipmekg yapon yangkipm akwonalmpen la kinsil ningkail Maur Wor a Wailen ti? Tu melnum a wet uwen kipman alkitn pa kul wa itna wanyun a pa, mpa wa ngkiteitn iye kai uwenteitn yat.” 10 Ak wang ketn pa a Pita lanakel kolpa, kil elngtangko amo rmpa nepm a Pita pa, atom tu melnum warimpen pa wa wli ari kil amo rmpa atom tu ngkatel kolti, ayewel kai uwen rpma yamping a kipman alkil pa. 11 Tu mapming a wrong kin kipman a ukipma Maur Wailen pa a nampokgen tu wrongkwail pa, tu atning yangkipm pa, tu ngkark paipm wrisen.

12 5:12 Kwap 2:43; 14:3Ti tu melnum wokgen akwapel a Sisas pa tu antokg kweikwei titnongket watipmen, wa plan kla manet manet tiur a antokg kweikwei titnongket titnongket tiur a melnum ake antiwe antokg pa, palng itna kuin a tu wrong kin kipman tu ari. Tu melnum a ukipma Sisas pa nampokgen tu melnum wokgen akwapel a Sisas pa tu nikgwalpm wris. Wa tu wli kulkai kawor yipmingki wunen a yalming a Maur Wailen pa rka rka wris rka wan kling wail a Solomon pa. 13 Pake tu melnum a ake ukipma Sisas pa tu ngkark atom tu ake la wa kulkai rki wris numpokgen tu pa. Ti wrongkwail kin a kipman pa ari kaporng yangkipm la pa tu pa akwap wor. 14 Atom tu wrong a wli ukipma Wailen pa, palng wailet a wailet kolpa aye kaino, tu kin a kipman yatenen.

15 Tu ari pa atom tu ngkat tu melnum numpet pa aye kai ukwulampen wrik nimongkwakg kweikwei pa rmpa tatu ya. Tu la mpa Pita kil ngkom or ya pa kai pa, ntokg numpet a tu tiur pa palng wor, a tiur a kalpis pa, mpa takgni uwi mrangkum a kil pa kai eliwen pa, mpa ntokg tu palng wor. 16 Wa tu wrong kin kipman wailet tu a pa a pa a anong tiur a itna wreren anong wail Serusalem ti tu aye tu melnum numpet a nampokgen tu melnum a maur paipm kimpilpet arpmewen pa aye wli wli. Atom tu melnum wokgen akwapel pa ak titnongket a Sisas pa antokgten palng wor.

17 Atom melnum tukgunakg a itna ep eng tu ipma krakgen kimeket pa, a nampokgen tu alkil a atn akwap angklinsel pa, tu kimeket pa a tu Satyusi, tu wrekg ipma paipm wrisen eng tu ari kwap wor a tu melnum wokgen akwapel a Sisas ak pa. Kolpa ti tu akor ya la mpa lken wleket. 18 Kolpa atom tu kai arkulen awiyen kolti aye kai kawor rpma wan tipmining a tu aye tu melnum wrongkwail a antokg melkget pa kai arpme arpme pa. 19 5:19 Kwap 12:7-10Ari ak mining pa maur akwapel a Maur Wailen pa wli kukwa wanyun a wan tipmining pa atom, kil elngen tu melnum wokgen akwapel a Sisas pa kulor en, atom kil lanaken la, 20 “Kipm kai kawor itni yipmingki wunen a yalming a Maur Wailen pa laniki tu wrong kin kipman yangkipm wor wrongkwail a la ya weten wor a rpma wor yongkyong pa eng la tu kutnun, am tike.” 21 Tu melnum wokgen akwapel a Sisas tu atning pa, tu katnun. Atom akwe nungkwat ti pa, tu atnuurng wan tipmining pa kul or kai kawor wan kling wail a yalming a Maur Wailen pa kaling plan tu wrong kin kipman yangkipm a Maur Wailen.

Ak wang a tu kaling plan tu wrong kin kipman itna pa, melnum tukgunakg a itna ep eng tu ipma krakgen kimeket, a nampokgen tu melnum angklin akilen pa tu akwe akor tu alntu mring man wailen wailen wrongkwail a tu Isrel a rka atning atning yangkipm pa. Atom tu anel wli kul kaingkai rka wris eng la ntokg yangkipm. Atom tu ukwa tu nepimpalo kai eng la ikyakur tu melnum wokgen akwapel a Sisas a rka wan tipmining pa iye wli eng ntokg yangkipm. 22 Tu melnum nepimpalo tu kai palng kai wan tipmining pa ari, ake tu melnum wokgen akwapel a Sisas pa rpma kawor wan tipmining pa, atom am wa tu yaper kai lanaki tu melnum wailen wailen pa la, 23 “Men kai palng kai wan tipmning pa, men ari wanyun pa ampei aken ak tilel tongtong worwor itna kati kati, a tu wantengkwang a atnen wanyun pa, tu atnen wanyun pa kolpa itna. Wa men kukwa wanyun pa kai kawor la ikyakuren ari tu melnum pa okwlen, ake rka.”

24 Melnum tukgunakg a tu wantengkwang a ikgalen yalming a Maur Wailen a nampokgen tu melnum tukgunakg a tu ipma krakgen pa tu atning pa, atom tu titnowen num akwonalmpen watipmen la, pa wuten tu kul or kolai or? 25 Tu akor la kolpa itna pa, melnum ur pa kul naken la, “Oi, kipm oklala la kipm itning ri! Tu melnum a kipm akor arongen pa, am itna kai wan kling wail a yalming a Maur Wailen ai, kaling plan yangkipm a Maur Wailen naki tu wrong kin kipman ise!” 26 Tu atning kolpa, melnum tukgunakg a tu wantengkwang a ikgalen yalming a Maur Wailen pa, kil awi tu tiur alkil pa kai akyakur tu melnum wokgen akwapel a Sisas pa aye kul. Tu kai akyakuren meen kolti aye kul, ake tu oren aki antokgten paipm kolai, kalpis. Tu ngkark la kol tu oren aki ntokgten paipm kolai pa kol a tu wrong kin a kipman pa ik weselen imo ikenturng okitnen tu pa.

27 Atom tu akyakur tu melnum wokgen akwapel a Sisas pa aye wli itna tu mring man wail wail a rpma rpma eng atning yangkipm pa. Atom melnum tukgunakg a itna ep eng tu ipma krakgen kimeket pa, wrekg itna oklala antiwen, 28 5:28 Mat 27:25atom kil lanaken la, “Men pikekg angkengkepm a alkepm yangkipm titnongket la la kipm ikgake laron nang a melnum pa nti ur pa. Ari ake wa kipm atning, kipm alilak kaling plan tu kolpa kai, ti yangkipm pa am palng wail tu atning yela tatu anong wail Serusalem ti ise. A wa kipm ti arki men ti la men ti alm melnum pa amo pake!” Melnum tukgunakg a tu ipma krakgen pa la kolpake.

29 5:29 Kwap 4:19Ari Pita nampokgen tu alntu melnum wokgen akwapel a Sisas pa akalmpe la, “Men ake mpa itning kutnun yangkipm a melnum la pa, men mpa itning kutnun yangkipm a Maur Wailen ai la. 30 Am pikekg kipm pa karkurng Sisas rka yo okgmangki pa atom kil amo pake. Ari Maur Wailen a mamikgmamin mansan a mentepmen ti la atom kil wrekg a kirkap pa rpma. 31 5:31 Kwap 2:33-34; Epe 1:20; Ipr 2:10; 12:2Atom Maur Wailen awiyel aye kaino alkel nang wailen. Kil palng melnum tukgunakg a ikgalento, a wa melnum a akawiyo. Atom kil angklin mentepm Isrel ti akule ya okore itna eng la mentepm antiwe plelng ipma uk yirokg paipmpaipm ti, atom mpa Maur Wailen kil ungkwan paipmpaipm amentepm pa kai plalng. 32 Kweikwei wrongkwail a men laron itna ti pa, men almen ti pikekg nungkulkg a wulmpa. Ake wa men wris ti pa, men ti a wa Maur Wor a Maur Wailen uk tu a atning katnun yangkipm akilen pa wa ak titnongketel yangkipm pa.”

33 Tu melnum wailen wailen a rpma atning yangkipm pa, tu atning yangkipm pa ari paipm, atom tu ipma wakget nikgwalpm kungkruwis paipm, la ilm tu melnum wokgen akwapel a Sisas pa imo. 34 Ari melnum ur a tu melnum a arpmen yangkipm yiprokgen a Moses pa, nang akilen pa Kamaliel, kil melnum a aroaro wonel tu yangkipm a Moses, a tu wrong kin kipman awi wor lawel la kil melnum nang wailen. Kil wris ur a tu mring man wailen wailen a itna ep ikgalen tu Suta pa. Kil wrekg itna a kil lanaki tu melnum wantengkwang pa la, tu uwi tu melnum wokgen akwapel a Sisas pa iye kawor itni kawor en pa itni waiketn pen. 35 Atom kil lanaki tu alntu a rpma atning yangkipm pa la, “Kipm melnum a Isrel ti pa, kol kipm la ik kuina ur eng tu ti pa, kipm ik riwe! 36 5:36 Kwap 21:38Ti kipm ariwe wring aripm ur kai ai pa, pikekg Teutas kil wrekg itna, a ngkat kil alkil ti la, kil pa melnum wailen, atom kipman wailet palng kol kamel kamel (400) tu kai katnun kil pa. Ari tu almpel amo, atom tu melnum alkil a orngwatneikg katnuntel pa am or rak ngkark kai atn palpa ise. Ti kwap akilen pa kai plalng kolpake. 37 Wa itna waiketnketn pipa, Sutas, melnum ur a Kalili wrekg itna wailen ak wang a pikekg tu awi nangkel tu wrong kin kipman. Kil epilng tu wrong wailet kai katnuntel ari am wa kolpa yat pake, wa tu wa almpel amo. Atom tu wrong a kai katnuntel pa, tu ngkark kai atn palpa ise. 38 Kolpa ti ri ti pa kupm lanakepm la, ake mpa kipm ntokg paipm tu melnum ti a la tu alntu ti la tu melnum wokgen akwapel a Sisas pa, kipm elngenten eng tu kai o! Eng ntei, kol tu ikwap pa ik nikgwalpm a titnongket a tu alntu melnum ti kolti, kol a pikekg Teutas a Sutas pa, pa ikga kai plalng. 39 Pake kol tu ikwap nimpokgen Maur Wailen pa, kipm ake antiwe mpa ngkeng pa, kalpis. Pa ikga kipm riwe la pa am kipm rapon nampokgen Maur Wailen kil alkil pake.”

Tu alntu a rpma atning yangkipm pa tu katnun oklala a Kamaliel lanaken pa, 40 5:40 Kwap 4:18atom tu awi ipma meen atom tu ak katnun kolpa pen, atom akwe tu melnum wokgen akwapel a Sisas pa yaper kul or wan pa. Atom tu lanaki tu wantengkwang pa akewen ak wanteng pa plalng pipa, tu alken yangkipm titnongket la, ikgake wa tu laron nang a Sisas pa wa nti ur, pa kalpis. Tu oren alken wleket kolpa plalng pipa tu lanaken la tu kai. 41 5:41 Mat 5:10-12; 1 Pi 4:13Atom tu melnum wokgen akwapel a Sisas pa tu atnuurng tu melnum a rpma atning yangkipm rpma wan wail pa, tu kawor en pa, tu atopen wail. Tu alken wleket wa tu awi numpaipm wail atnen nang a Sisas ti, pake tu ariwe la Maur Wailen pa ariwe la la tu pa wor antiwe a arki kalkuten pa, atom tu atopen wail manten arki kalkuten pa. 42 Ake wa tu elngen, tu kaling plan tu wrong kin kipman pa itna wan kling wail a yalming a Maur Wailen ai wa itna wan ur wan ur a tu ti. Tu laron naken la Sisas pa la melnum a pikekg Maur Wailen takwei atom ukwa nar la ik rmpento am pake.