1 Kupm ari pa plalng pipa, wa kupm atning milpming ur kaino kitnong pa kolen ok watipmen ur a ak nangnang la yikakatnen kolkil la, “Mentepm ngkit nang a Maur Wailen amentepmen pa plan la, kil wris ata antiwe titnongket a nang wailen, a kil Maur Wailen a pikekg akawiyo eng alkilen. 2 19:2 Yang 32:43; Amp 6:10Wleket a kil uk tu pa, pa kil uk ute wor aklale akalmpe paipm a tu antokg pa. Kil uk wleket kin wailen a nang arke eng atn ya antokg kweikwei numkropis a uk numpaipm kamel, a angkli arkul tu pa atom antokg kanokg yela ti kai paipm. Maur Wailen kil uk wleket kin pa akalmpe a kil or alm tu melnum akwapel alkilen pa amo.”

3 Wa tu a rka kaino kitnong pa la yikakatnen anti ur la, “Mentepm ngkit nang a Maur Wailen pa iye kaino kwa, eng ntei, wakg wuan a wakg a al kin pa puurp kaino kwa pa ikga itna yongkyong kolpa itna.” 4 Tu melnum wailen wailen kamel wekg tuwek wikgwikg, a kweikwei malepmen wikgwikg pa tu kapor kilko alein ngkat nang a Maur Wailen a rpma wrik alkil a awi nang wailen arpme arpme pa, atom tu ngkat wam pa la kolkil la, “Kolpa aklale pake, ti mentepm ngkit nang akilen!” 5 Atom ok ur la angkaino wrik tipmakg a melnum a awi nang wailen arpme arpme pa la nar la, “Kipm melnum akwapel wrongkwail alkilen a orngwatneikgen kil pa, kipm a nang arke a kipm a nang kalpisen, kipm a ngkark rpma orngwatneikgen Maur Wailen pa, kipm kimeket pa mpa ngkit nang a Maur Wailen pa!”

6 19:6 Amp 14:2Kupm atning ok ur a la kolpa plalng pipa, kupm wa atning ok ur kolen tu wrong wailet a oklala yikakatnen paipm kolen milpming a kop a minip a u kintir kuntur ai, a wa kolen milmal a praun yikakatnen pa. Tu la yikakatnen kolkil la, “Mentepm ngkit nang a Maur Wailen! Kil Wailen, kil Maur Wailen a antiwe titnongket wrongkwail, kil wailen itna ep ikgalen kweikwei wrongkwail. 7 19:7 Aisaia 61:10; Amp 21:2Mentepm atopen Manto Walkg Malkgu War eng kil a uwi kin alkil a nimprampen rpma ti iye. Ti am wang a kil a uwi kin alkil ti iye tike. Kolpa ti mentepm ngkit nang wailen akilen ti iye kaino kwa itopentel o! 8 Maur Wailen kil uk kin pa apm ute tangkoren pupu rukis wor pa la kil ining.” Apm ute tangkoren wor pa, pa akla nol nikgwalpm a atn a rpma ute wor a tu wrong kin a kipman a Maur Wailen.

9 19:9 Mat 22:2-3Atom maur akwapel pa kil la kul kupm ti la, “Kitn nira oklala kil, 'Tu melnum a pikekg Maur Wailen kil akwenten wli rka la il okipma wail itnen Manto Walkg Malkgu War la uwi kin iye pa, tu pa wor pake, tu itopen o!'” Maur akwapel kil wa angkine yangkipm pa la, “Pa yangkipm aklale wrisen a Maur Wailen.” 10 19:10 Kwap 10:25-26; Amp 22:8-9Maur akwapel kil la kolpa atom kupm wa elng angko rmpa nepm akilen pa la kipor kilko ileinsel ari kil angkengkopm kolkil la, “A'a, ampur kitn antokg kolpa! Kupm am wa akwap orngwatneikgen Maur Wailen kol kitn ti yat tike, a wa kolen tu melnum alkipm a kipm ukipma Sisas pake, kipm a atning alupmen yangkipm a Wailen Sisas kil laron pa. Kitn mpa kipor kilko ilein Maur Wailen wris ita kolti! Am yangkipm aklale a Sisas kil laron pa ngkat nikgwalpmel tu melnum okwripm akilen angklo la wli ok a tu pa, atom tu laron pake.”

11 19:11 Nang 96:13; Aisaia 11:4; Amp 1:5; 6:2Kupm ari kitnong pa ari okore itna, woi, kipmteng pa! Kupm ari nimpa nepm watin tangkoren pa itna, a melnum a arpme nimpa nepm watin tangkoren pa tu namput la Melnum a atning nungkulkg ikgalen kwap alkil ariworwor, wa nang wompel ur a kil pa Melnum a alupm nikgwalpm ute aklale kolti. Kil rpma atning yangkipm a tu antokg itna kil pa atom kil akalmpe aklale ute kolti katila kuina ur a melnum antokg pa. Kil wrekg itna rapon pa, pa kil alupm nikgwalpm ute wor kolti ak rapon talpulng wrongmanto eng ak angklin tu wrongkwail. 12 19:12 Tani 10:6; Amp 1:14; 2:17Wulmpa akilen pa ari kolen wakg yuk a naruk pa. A tukgunakg akilen pa, kil arpme wanukgmis watipmen a melnum a awi nang wailen arpme arpme pa. Nang ur a nira ela num akilen ti ake mla ur ariwe, kil alkil wris pa ariwe kolti. 13 19:13 Aisaia 63:1-3; Son 1:1,14Kil nowe apm watin wail a pikekg angkle walmpopm. Nang akilen pa namput la, Yangkipm a Maur Wailen. 14 Tu mapming mapming a almpwrong a rka kaino kitnong pa, tu nowe apm watinet tangkoren rukis wor pa arpme nimpa nepm watin tangkoren pa aknrake tu alntu ti katnuntel. 15 19:15 Nang 2:9; Amp 1:16; 14:20Sakal a lepet wom wompen pa or itna ok a kil pa, pa ikga laik ik ngket tu wrongkwail kin a kipman a kanokg ti. Ikga kil itni wailen iye yotuk kalnten itni ikglenten. A wa kil ikga rkganti raingen wain ok pa eli wes pilmpalen kulkwempen a rkganti rkganti wain ok atne pa, pa plan kolen ipma wakget a Maur Wailen a antiwe titnongket wail manten, pa kolen wakg a naruk itna ipma akilen pa la kil ikgam ik kolpake. 16 19:16 Amp 17:14Nira ela apm watin wail a kil nowe pa a ela kinar tatu nepm kimang yipuken akilen pa la kolkil la, Melnum Tukgunakg a tu melnum tukgunakg yela orngwatneikgentel, a Wailen a tu melnum wailen yela orngwatneikgentel.

17 19:17 Isik 39:17-20Atom wa kupm ari maur akwapel a Maur Wailen ur pa kil itna nampokgen takgni pa. Atom kil akwe yikakatnen naki tu wel a pelng or kaino kitnong pa la, “Kipm kul rki wris eng il okipma wail a Maur Wailen! 18 Eng mpa kipm il num a tu melnum tukgunakg, a tu melnum itna ep ikgalen tu melnum a almpwrong, a tu melnum titnongket titnongket, a nimpa nepm watin, a tu melnum a arpme nimpa nepm watin pa, a il num a tu melnum wrongkwail kol tu melnum a aken kwap kalpmlel orngwatneikgen mring alntu, a tu melnum a atn a rpma ak wasrongen alntu, a tu melnum a nang arke, a tu melnum a nang kalpisen. Pa kipm il num a tu pa kimeket o!”

19 Pipa wa kupm ari wlikgok tilpmingen pa nampokgen tu melnum tukgunakg a ikgalen kanokg ti a tu melnum alntuwen a almpwrong pa, tu kai takwem rka wris eng la rapon nti melnum a arpme nimpa nepm watin tangkoren pa nimpokgen tu melnum alkilen a almpwrong pa. 20 19:20 Amp 13:12-17; 20:10Ari melnum a arpme nimpa nepm watin tangkoren pa arkul wlikgok tilpmingen pa, wa kil wa arkul melnum okwripm kansil pa. Melnum okwripm kansil pa pikekg kansil elng kla a kweikwei titnongket titnongket a tu melnum wrekg paipm eng ari pa itna won wulmpa a wlikgok tilpmingen pa. Kil antokg kweikwei pa ak arkolng tu a tu nira krakg a wlikgok tilpmingen pa elawen, a tu a kapor kilko alein yo a tu ukual kalingen wlikgok tilpmingen pa. Atom melnum a arpme nimpa nepm watin tangkoren pa kil angkli wlikgok tilpmingen pa nampokgen melnum okwripm kansil pa yatenen elng kinar lkim watin a wakg al wes salpa atne itna yongkyong pa. 21 A tu melnum atuwekg a antiwel rapon pa melnum a arpme nimpa nepm watin pa almpen amo plalng ak kowri lepet a or itna ok akilen pa. Atom wel wrongkwail pa kai arpmen al tu melnum yipmiri a wuten kil alm amo pa ninan nikgwor.