1 4:1 Mat 7:15; 1 Te 5:21; 1 Son 2:18; 2 Son 1:7Workganen yekyek alkupm, ampur kipm ukipma lala tu melnum a maur akwap kawor ipma a tu pa la, pa Maur Wor a Maur Wailen pa. Kipm mpa ri itningke ep lala, pa Maur Wor a Maur Wailen aki pa maur a Maur Paipm Satan ai. Eng ntei, tu melnum okwripm kansil watipmen a kaling plan yangkipm manet pa am kai atn yela tatu kanokg ti ise. 2 4:2 1 Kor 12:3Ti kipm mpa riwe la maur a rpma kawor melnum ur pa Maur Wor a Maur Wailen aki pa maur ur manet ai? Kol melnum a maur ur arpmewel pa kil ukipma atom laron kolkil la, “Sisas pa kil Krais, melnum a pikekg Maur Wailen naren la kil nar ikuwi mentepm ti, wa kil pikekg palng melnum aklale kol mentepm ti”, melnum pa laron kolpa pati mpa lkepm ariwe la maur wor a rpma kawor melnum pa am Maur Wor a angkai Maur Wailen pa kul pake. 3 4:3 1 Son 2:18Pake kol melnum ur a maur wor arpmewel pa kil ake laron Sisas pa la, kil melnum a pikekg Maur Wailen naren la kil nar ikuwiyo pa pati, kil pa ake awi Maur Wor a Maur Wailen pa, palpa kil awi maur wor a Wrongmanto Antikrais a pikekg kipm atning a tu la ikga wli pa. Ti am wli akwap itna tatu anong kanokg ti ise.

4 4:4 Mat 12:29; 1 Son 5:4-5Kipm warim yekyek alkupm a mentepm ukipma Krais, kipm pa a Maur Wailen. Maur wor a rpma kawor kipm ti pa antiwe titnongket wail manten klangkil maur wor a rpma kawor tu melnum a alupm nikgwalpm a kanokg ti. Kolpa atom kipm itna kalnten alok angkli tu pa. 5 4:5 Son 8:47; 15:19Tu pa a kanokg ti kolti. Kolpa atom yangkipm a tu la pa, tu la yangkipm a kol a melnum a alupm nikgwalpm a kanokg ti la pa, atom tu a kanokg ti atning yangkipm a tu pake. 6 Pake mentepm ti pa warim a Maur Wailen. Kol melnum ur ariwe Maur Wailen pa, kil pa atning mentepm tike. Melnum ur a ake warim a Maur Wailen pa, kil pa ake atning yangkipm a mentepm ti. Pa am ya a mentepm ariwe maur wor pake, la maur wor a i a laron yangkipm aklale, a maur wor a i a alok melnum ti kai ar.

7 Workganen yekyek alkupm, Maur Wailen pa kil arkul nikgwalpm a plan ipma wor wasrongen mentepm ti, kolpa ti mentepm ti mpa wa plan ipma wor wasrongen tita. Melnum ur kil plan ipma wor wasrongen melnum ur pa, kil pa palng warim a Maur Wailen, atom kil pa ariwe Maur Wailen pake. 8 Nikgwalpm yiprokgen a plan ipma wor wasrongen melnum ur ai pati, pa nikgwalpm a Maur Wailen pake. Kolpa atom melnum ur kil ake plan ipma wor wasrongen melnum ur pa, kil pa ake ariwe Maur Wailen pa. 9 4:9 Son 3:16Maur Wailen kil pikekg ukwa Warim Kipman yekwris anangket alkilen pa nar eng ak armpento eng mpa Warim Kipman alkil pa lko yaprekg watin a antokg mentepm rpma wor yongkyong. Kil angklinso kolpa pa planto la kil plan ipma wor wasrongento aklale wrisen. 10 4:10 Rom 5:8-10; 1 Son 2:2Nikgwalpm a plan ipma wor wasrongen melnum ur pa pati, itna kolkil: ake lala mentepm ti pikekg plan ipma wor wasrongen Maur Wailen ai ep pa, kolpa kalpis. Maur Wailen kil alkil ai kil plan ipma wor wasrongen mentepm ti ep tike, atom kil ukwa Warim Kipman alkilen pa nar amo eng ak armpen paipmpaipm amentepmen ti.

11 Workganen yekyek alkupm, Maur Wailen kil pikekg planto nikgwalpm kolpa lala kil plan ipma wor wasrongen mentepm ti, kolpa ti mentepm ti mpa wa plan ipma wor wasrongen tita kolpa yat pake. 12 4:12 Son 1:18Ake melnum ur ari Maur Wailen ak wulmpa pa, kalpis. Pa aklale, pake kol mentepm plan ipma wor wasrongen tita pa pati, pa plan la Maur Wailen am rpma kawor mentepm ti, a wa plan yat la mentepm am plan ipma wor wasrongen tita kol a kil wasrongen la mpa mentepm plan ipma wor wasrongen tita kolpake.

13 4:13 2 Kor 1:22; 1 Son 3:24Ti mentepm mpa riwe kolai la mentepm rpma kawor Maur Wailen ai a Maur Wailen rpma or mentepm ti? Kil pikekg ampreing kweikwei wor wor a Maur Wor akilen pa rpma kawor ipma amentepmen ti, atom mentepm ariwe la kil rpma or mentepm ti a mentepm rpma kawor kil pa. 14 Yan Wailen pa pikekg kil ukwa Warim Kipman alkil pa nar amo ak awi wrongkwail kin a kipman a kanokg ti. Atom men pikekg nungkulkg a wulmpa, atom men lanaki tu wrong kin a kipman pa la, pa aklale, pa ake kansil pa. 15 Melnum ur kil ukipma Sisas pa atom laron kil pa la kil Warim Kipman a Maur Wailen pa, melnum pa kil rpma kawor Maur Wailen a Maur Wailen pa rpma kawor kil pa kolpa kai. 16 Mentepm pikekg awi ariwe nikgwalpm a Maur Wailen kil plan ipma wor wasrongen mentepm ti, atom mentepm ukipma kolpa itna la Maur Wailen kil plan ipma wor wasrongento pa.

Maur Wailen pa kil yan yiprokgen a nikgwalpm a plan ipma wor wasrongen mentepm wrongkwail, atom kol melnum ur kil rkul nikgwalpm a plan ipma wor wasrongen mla ur pa, pa Maur Wailen rpma kawor melnum pa, a melnum pa kil rpma kawor Maur Wailen. 17 Mentepm rpma kawor Maur Wailen, a Maur Wailen rpma or mentepm ti. Atom pa ak antokg mentepm alupm nikgwalpm a Maur Wailen kol a kil wasrongen la mpa mentepm plan ipma wor wasrongen tita kolpake. Kolpa ti mentepm ikgake ngkirk ik wang wail a ikga mentepm itni ntokg yangkipm wail itni Maur Wailen pa. Pa pati atnen a mentepm rpma kanokg ti a pa, pake mentepm rpma kawor Maur Wailen kol a Sisas kil rpma kawor Maur Wailen pa. 18 Melnum a kil alupm nikgwalpm titnongket a plan ipma wor wasrongen tu melnum pa, pa kil ake ngkark, kalpis. Eng ntei, nikgwalpm a plan ipma wor wasrongen tita pa, pa ak ungkwan nikgwalpm a ngkark pa kai takwlelkgen. Yiprokgen a ngkark pa pati kil akwonalmpen la kil ikga uwi paipm ikilmpe paipmpaipm a kil antokg pa. Kol kil ngkirk pa, kil ake alupm nikgwalpm a Maur Wailen a plan ipma wor wasrongen tu melnum pa kol a Maur Wailen kil wasrongen la kil mpa plan ipma wor wasrongenten pa, a pa.

19 Mentepm plan ipma wor wasrongen tita atnen a Maur Wailen kil pikekg plan ipma wor wasrongen mentepm ti ep. 20 Kol melnum ur kil lala, “Kupm ti plan ipma wor wasrongen Maur Wailen”, pake wa kil ipma paipm eng melnum alkil a tuwekg ukipma Krais pa pati, pa kil melnum a kansil kolti. Kol kil ake plan ipma wor wasrongen melnum alkil a kil ari ak wulmpa pa, pati ake antiwe mpa kil plan ipma wor wasrongen Maur Wailen a kil ake ari ai. 21 4:21 Mak 12:29-31Ti yangkipm a pikekg Krais kil alko la mentepm kutnun pa pati la kolkil la, melnum ur a kil plan ipma wor wasrongen Maur Wailen pa, kil mpa wa plan ipma wor wasrongen melnum alkil a tuwekg ukipma Krais pa kolpa yat pake.