1 Kupm melnum tingklaket itna ep a akwap a Maur Wailen, kupm nira wrkapm kil eng kitn kin yek a pikekg Maur Wailen takweiyeitn eng alkilen pa, nampokgen tu warim watnom akitnen pa.*1:1 Tu melnum ariwe tiur pa tu akwonalmpen la wrkapm kil Son nira kai eng la kin ur aklale. Tiur pa wa lala kin pa yangkipm kla a akla mapming a kaingkai takwem rka anong a Son nira wrkapm ti kaiye pa, wa warim pa akla tu wrong kin a kipman mapming a kaingkai takwem rka pa. Wa wailen alkil a la ela mantolng wampwam yikak wraur pa, pa wa akla mapming a Son kil alkil antiwen kaingkai takwem rka ti. Kupm plan ipma wor wasrongen kipm a mentepm arkul nikgwalpm ute aklale a Maur Wailen pa worwor. Ake wa kupm wris ti pa, wa tu wrongkwail a pikekg awi ariwe nikgwalpm ute aklale a Maur Wailen pa atom tu arkul aye itna pa, wa tu pa wa plan ipma wor wasrongentepm yat. 2 Nikgwalpm ute aklale a Maur Wailen pa rpma wail kawor ipma a mentepm ti, a ikga ntiwo rpmi yongkyong or pa kai, kolpa atom ari kupm plan ipma wor wasrongentepm ak ipma aklale. 3 Mpa Yan Maur Wailen a wa Sisas Krais Warim Kipman a Yan alkil pa mpa tuwekg lko ipma wor reinso wa ntokg ipma amentepmen ti rki meen wor, eng mpa mentepm rkul nikgwalpm ute aklale a Maur Wailen wa plan ipma wor wasrongen tita kolpa iye kai.

4 1:4 3 Son 1:3Kupm atopen wail eng kupm atning a tu la tu warim tiur akitnen pa tu atn a rpma a akwap katnun nikgwalpm aklale a pikekg Yan kil la titnongket la mpa mentepm kutnun pa. 5 1:5 1 Son 2:7Ti kitn kin yek pa, kupm la lanikeitn kil eng mpa kipm kutnun: kil kil ake kupm niranteitn yangkipm titnongket weten ur la kitn kutnun pa kalpis. Kil kil yangkipm titnongket tingklaket a pikekg itna ak ep lmpiwen ai, a la kol kil lala, mentepm plan ipma wor wasrongen tita! 6 Nikgwalpm a plan ipma wor wasrongen tita pa itna kolkil: mentepm mpa itn a rpmi ikwap kutnun yangkipm titnongket a pikekg Maur Wailen alko la mentepm kutnun pa. Pa yangkipm a pikekg kipm atning ak ep lmpiwen ai la kipm mpa itn a rpmi plan ipma wor wasrongen tita iye kolpa kai.

7 1:7 1 Son 4:1-3Kipm mpa rpmi plan ipma wor wasrongen tita rpmi or pa kai, atnen a tu melnum watipmen a pikekg atnuurng yangkipm aklale pa am kai atn yela tatu kanokg ti kaling plan yangkipm a kai raimpe ak alok tu wrong kin a kipman pa kai ar ise. Tu melnum pa tu la Sisas pa ake Krais melnum a pikekg Maur Wailen naren la ikuwi mentepm ti iye kai wor pa, wa tu ake wa ukipma la kil pikekg palng melnum kol mentepm ti pa. Tu melnum pa tu awi nikgwalpm kai Wrongmanto Antikrais, Yan Yiprokgen a alok tu melnum aye kai ar. 8 Kolpa ti kipm itn a rpmi ikglen kipm alkipm pa riworwor, mpa kweikwei a kipm aken kwap la ikga kipm uwi pa, ikga kai tikote. Kipm ikglen kipm alkipm pa riworwor kolpa pa, kipm ikga uwi kweikwei pa kimeket ikilmpe kwap a kipm ak pa. 9 Mla ur a ake kil arkul yangkipm irir kol a pikekg Krais kaling planto pa a wa kil angkine yangkipm pa kai raimpe pa pati, pa Maur Wailen kil ake rpma kawor ipma akilen pa, kalpis. Pake mla ur a kil arkul yangkipm irir kol a pikekg Krais kaling planto pa pati, kil pa awi Yan a Warim Kipman pa yatenen rpma kawor ipma akilen pa. 10 Kol melnum ur kil kai riwepm nimpokgen yangkipm a ake kai ore yangkipm a Krais kaling plan ti pa, ampur kipm ukwor awiyel aye kawor wan akipmen pa. 11 Eng ntei, mla ur a kil ukwor awi melnum a kolpa aye kawor wan pa, pa kil am kai karpon nampokgen melnum pa antimprak antokg kweikwei a paipm kol a melnum pa antokg pa yat ise.

12 Kupm yangkipm watipmen rpma la kol a nirantepm, pake kupm karken a nirantepm ela wrkapm ti, kupm wasrongen lala, ikga kupm alkupm ti kai riwepm a ntiwepm rpmi oklala pati, ikga mentepm kimeket tipra itopen tita wail. 13 1:13 2 Son 1:1Kitn kin pa, men warimpwarim a wailen alkitn a pikekg Maur Wailen takweiyel a men rka kil pa, men la lanikepm la men nikgwalpm arkentepm rka wa men alkepm wor.