1 Tu arpme nim ukupuken pa kai palng kai ukupuk wompel a tu Kerasa. 2 Sisas kil atnurng nim ukupuken pa, atom melnum ur a maur paipm kimpilpet arpmewel pa kil kul eng Sisas. Melnum pa atn rpma tatu kirkap. 3 Kil okg rmpa tatu kirk a tu u mlaminel a tu alil melnum armpewe pa akalkil. Melnum ur ake antiwe mpa rkul yipo kil pa, kalpis. Tu wa ak ampei mringen kalnten pa ak yapo ari ake wa antiwe. 4 Anti watipmen pekg tu yapo nepmwampel ak ampei mpangen, a ampei mringen pa, ari akentiwe. Ampei mpangen pa kil kangku, a ampei mringen pa kil karkur karkur kaingkai kai kitnangku. Melnum ur ake antiwe mpa rkul ngkeng kil pa kalpis. 5 Akangklei akangklei mining a ran pa kil am rpma tatu wrik nangen, a kirkap a pake. Kil akangklei akangklei kirkar akg raingen numpwam alkil ela wes.

6 Kil ari Sisas kai watin ai, kil pirng kul kapor kilko aleinsel. 7-8 5:7-8 Mak 1:24Atom Sisas kil nakel la, “Maur paipm kimpilpet, kitn or tukulelkg melnum pa kai o!” Melnum pa kil kirkar ak ok wail paipm, atom kil la, “Sisas, kitn warim a Maur Wailen a itna ep eng kweikwei wrongkwail. Kitn la ntokg na kupm ti? Tukulelkgtopm! Kitn la iklale kaino kwa, eng ampur kitn alkopm wleket.” 9 Atom Sisas kil asen maur paipm kimpilpet pa la, “Nang a kitn ti mla?” Kil akalmpe la, “Nang akupmen Wrong Watipmen, eng men pa maur paipm watipmen.” 10 Kil ak asen unsa unsa kai Sisas pa la, ampake kil ungkwanten tukulelkgen anong kanokg pa.

11 Manto wailet al okipma itna kaino wrik nangen wompel ai. 12 Tu maur paipm kirkar akwen Sisas titnongket la, “Kitn la eng men a kawor nowe tu manto ai!” 13 Sisas kil awi wor, atom tu maur paipm atnurng melnum pa, a or kai kawor nowe tu manto ti. Atom tu manto wailet paipm kamel kamel wampwomis (2,000) pa anel raras angkaino krongkwang ai kul nar aren kinar kinar ukupuk ai, al u amo amo plalng ike.

14 Tu melnum a ikgalen manto pa ngkark. Tu aye yangkipm pa kai anong wail, wa kai anong yela tatu palpa. Atom tu wrong kin kipman kai ari kweikwei a wet palng pa. 15 Tu kai palng ari Sisas pa, tu ari melnum a wet maur paipm watipmen arpmewel pa. Kil aning apm, nikgwalpm a kil pa palng wontrakole wor, atom kil rpma meen. Tu wrong kin kipman ari pa, tu ngkark. 16 Tu melnum a wet itna ari pa, tu lakati kweikwei a wet palng kai melnum pa a wet maur paipm arpmewel pa, a wa palng kai tu manto pa yat. 17 Atom tu wrong kin kipman la titnongket eng Sisas, la kil utnurng anong pa kai anong ur ai.

18 Atom Sisas kawor nim ukupuken pa. Wa melnum a wet maur paipm arpmewel pa kil asen Sisas pa la kolpa la, “Antiwe mpa kupm ntiweitn kai?” 19 Pake Sisas ake awi wor la mpa kil ntiwel kai pa. Atom kil la, “Kitn kai rpmi nimpokgen tu alkitnen pa niken ipma arein a Maur Wailen wet angklinseitn, a kweikwei wrongkwail a wet kil akteitn pa!” 20 Atom melnum pa kai anong a tu Tekapolis, laron yangkipm kweikwei a wuten Sisas kil aktel pa. Tu kin kipman wrongkwail tu atning pa, atom tu akwonalmpen watipmen.

21 Atom Sisas kil awi nim ukupuken pa wa yaper kul ukupuk wompel ti. Tu wrong kin kipman wailet paipm tu kul ariwel ak wang a kil wli palng kai itna ukupuk yamping pa. 22 Melnum tukgunakg ur a ikgalen wan a tu Suta atning atning yangkipm a Maur Wailen atnewe pa kil kul. Nang a kil pa Sairus. Kil ari Sisas, atom kil kapor kilko alein wreren nepm a Sisas. 23 Kil la ak ok a ikgakgel lanaki Sisas kolpa, “Warim kin wusok yek akupmen wreren eng a imo. Kitn kul elng wam elewel, eng mpa kil wor rpmi, eng ake mpa kil imo.” 24 Atom Sisas kil antiwel kai. Atom tu kin kipman wrongkwail tu katnuntel. Tu aktalpul tita aye kolpa kai wrerentel. 25 Kin wris ur pa kil anti tu wrongkwail itna, kil akapore perper, am rpma kolpa rpma kol wring wampwam yikak wekg. 26 Tu melnum a antokg i numpet pa alkel wleket watipmen paipm, atom kin pa angkli marpm alkil plalng eng tu pa. Pake numpet alkil pa ake kai wor ur, kalpis, am paipm kolpa itna pake. 27 Kin pa atning yangkipm a tu la Sisas kil antokg numpet a tu melnum palng wor, kolpa atom kil ak angkom angkom tu wrong wailet a yirokg a Sisas kul wamanti apm akilen. 28 Kil akwonalmpen la, “Kol mpa kupm waminti apm a kil pa, mpa kupm palng wor.” 29 Penterngen kolti, num walmpopm a kil pa am plalng ike. Kil almpen almpen numpwam kil pa ari, numpet kil pa am plalng ike. 30 5:30 Luk 6:19Penterngen kolti Sisas kil ariwe la, titnongket ur am atnurngkel kai ike. Kil plelng ari tu kin kipman wrongkwail ti, atom kil la, “Mla wuten wamanti apm akupmen ti?” 31 Atom wa tu watnom a kil aroaro wonel pa lanakel la, “Ti ake kitn ari tu wrong kin kipman wailet itna kapringenteitn itna ti aki, atom wa kitn wa asen la, mla wamantiweitn ai?” 32 Sisas kil ikgen yela la mla wet wamantiwel pa. 33 Kin pa ariwe kweikwei a wet palngtel pa, atom kil ngkark warwar. Atom kil kul wreren kapor kilko alein Sisas, a kil laron la, “Wuten kupm antokg.” 34 5:34 Mak 10:52; Luk 7:50; 17:19Atom Sisas kil lanakel la, “Warim kin, nikgwalpm wor akitnen a kitn ukipma pa antokgteitn kitn palng wor. Kupm alkeitn wor, kitn kai rpmi meen, numpet a kitn pa am plalng ike.”

35 Sisas kil anti kin pa la okyangkipm pa itna, atom tu melnum tiur angkai wan a Sairus, melnum tukgunakg a ikgalen wan a tu atning atning yangkipm a Maur Wailen atnewe pa, kul la, “Ngkeng Sisas pa, ampur kil kul, warim kin akitn pa am amo ike.” 36 Ari Sisas kil ake atning yangkipm a tu angkengkel pa kalpis. Kil lanaki Sairus la, “Ampur kitn ipma kalkuten, ukipma kolti!” 37 Sisas kil karken la ake mpa wrong ur ntiwel kai. Mpa Pita, Son, wusok alkilen Semis. 38 Ak wang a tu kul wan a Sairus pa, Sisas kil atning tu antokg nungkulkg titno wail paipm, tu akg paipm ak ok namputen. 39 Ak wang a kil kawor wan pa kil lanaken la, “Kipm akg antokg nungkulkg titno paipm eng ntei? Warim ake amo, palpa okg kolti.” 40 Tu akinoalmpel paipm kolti. Ari kil ungkwanten kawor en plalng. Kil awi mansan a warim pa nampokgen tunteng melnum wraur pa antiwel, kai kawor wrik a warim yipmiri armpe pa. 41 5:41 Luk 7:14Kil wamanti kai wam pa, kil la, “Talita kumi!”, pa pati kil ak ok alkilen la kolpa la, “Warim kin wasek, kupm lala, kitn wrekg o!” 42 Pilpa, warim kin pa wrekg angkom atatu kolti. Warim kin pa kin tangkis, wring alkilen pa wampwam yikakwompwekg. Tu ari pa, tu wrekg paipm. 43 Sisas kil la yangkipm titnongket pa naken la, “Akentiwe mpa kipm laniki mla ur eng kuina ur a kupm antokg kil. Ti kipm uk okipma warim kin pa il o!”