Folo yana leta nagona TESALONAIKA tovetumagana agaidiya
Hida Tesalonaika tovetumagana yadi leta nagona Folo Kolinita againe gimiyami tu giꞋetoladina. Tesalonaika melala kikaiwabuna taliyeya Masedoniya ana fafaliya. Boi Folo yana lumamala-waliliuga anavelu againe gina Tesalonaika againe VenuwaꞋata Yamumuna gimidilumamalena be ekelesiyai-nadi gitubuyemu. (Afositolo 17:1-14) Tovetumagana tufoidi miYuda tu tufoidi moyaꞋaidi yoꞋo tulidiyao kalivai-dina. MiYuda tufoidi Yesu ana tafalolo againe hidamana faꞋina, adi tonagona higaꞋumaꞋuma-moꞋa be Folo ahenao hiwavidi be hina Beliya againe. Muliya Folo Timoti giꞋiveninisena be miTesalonaika valeyadi hagihagina giꞋaliyena.
Hida leta againe Folo givesiule miTesalonaika yadi vetumagana vita tulina tulina agaidiya hikidonena faꞋina kadu hiduꞋuduꞋuna faꞋina. Folo nuwanuwana aseꞋasedi ginakivevatuna ada yadi toliluvaluva Yesu aimo keke gidayewaꞋela tu badi tovetumagana himaduꞋalika-ma faꞋidiya gifatana. Leta dobona hidede amine.
Lusiule. 1:1
Vesiule yadi vetumaganadona faꞋina. 1:2-10
Folo yana dewa miTesalonaika hinafadiya ma. 2:1-12
Gavaimi yadi miyami faꞋina Folo nuwana ginauna. 2:13-3:13
LauꞋage dewa Yesu ana tovetumagana adi lauboda faꞋina. 4:1-12
Yesu yana yewaꞋela ana kivetuvetunu ma. 4:13-5:11
LauꞋage kadu lukafoi tulina tulina ma. 5:12-28
1
Yo siule tobohiyameyao Yaubada yana yoꞋogaga Tesalonaika againe kalivai-mina. Ime Folo Sailosi Timoti yami leta aꞋetoladina be wanaꞋitana. Omi higa Yaubada Tamada kadu yada Kaiwabu Yesu Keliso yadi kaliva yadi vevine ma hinanuwadogemi kadu aseꞋasemi hinakiveniwalovina.
MiTesalonaika yadi vetumagana faꞋina toꞋetoladi hivesiule.
Keke gavana faꞋina tu tova moyaꞋaina Yaubada againe omi faꞋimiya avesivesiule, kadu tova moyaꞋaina yama veꞋoꞋola againe ami egana ayakayakahina. Tova be tova Yaubada Tamada matane anuwa-nunauyemi higa Yesu Keliso wavetumaganena faꞋina waꞋiꞋidibumuhiga, kadu Bana againe yami nuwanuwa wasena faꞋina yana faisewa againe wavedivediwe, kadu yada Kaiwabu Yesu Keliso yana yewaꞋela walulubodena faꞋina waꞋatuꞋatuvefaꞋila. Tova moyaꞋaina mena yami dewa hagihagina yama veꞋoꞋola againe anuwa-nunauyena.
Tobohiyameyao, Yaubada nuwanuwana omiꞋiyao, ada ahalamanena Bana giluwafami be yana yoꞋogaga wanamiyami. Hidedemi ahalamanena, faꞋina Yaubada yana VenuwaꞋata Yamumuna omi agaimiya alumamalena ana toveya keke adagahe-kawowo au AluꞋaluwa Mahalina gifaiwalavelema-yo yama laumamala aseꞋasemi giꞋonana, ada au ahalamanena makewa yama laumamala ma gahe velemoꞋena. Ada ime boi hinafamiya amiyami ana toveya, omi wahalamanena gavaimi ahuluhuluva medemi ami veluga faꞋina ahuluvina. Tu omiꞋiyao ma ime waveꞋuꞋulema kadu Kaiwabu waveꞋuꞋulena. Vita tulina tulina kaliva nimadiya wanuhagana. Hidedemi omi yami watagiya nonogana Yaubada bonana keke wadakiloweni, au AluꞋaluwa Mahalina gifaiwalavelemi-yo yami wavemwamwala wavenogalena. Ada au hidedemi wahuluva faꞋina, omi abaꞋita tovetumagana moyaꞋaidi Masedoniya kadu Akaiya ana fafaliya himimiyami-ma faꞋidiya. Kaliva hiulega hiyuvedonena be agona yuwa lauveya ginauna amine, meda omi yami huluva hagihagina againe venuwaꞋata Kaiwabu faꞋine fafali moyaꞋaina lauveya ginauna. Keke yami fafali Masedoniya o Akaiya agaidiyagaga gidanauna, au yami vetumagana Yaubada againe valeyana fafali moyaꞋaina yuwa lauveya ginauna. Medema faꞋina ime keke tamo gavadi anagaheyeni. 9-10 Au mena mali fafali kalivadi taudiyao ime yama ela agaimiya ma hilukahihiyena, higa yami waꞋasehawahega wavegaꞋaulema. Higahe higa vaita balauma wavekwaulaugedi-yo Yaubada againe wahagavilami be Yaubada velemoꞋena kadu miyamiya-vagahina againe wahawahegemi, ada higa Natuna lobameya ginatauya be babiya ginayewaꞋela-ma wanamiyabodana. Natuna Yesu ma alikeya gisivemididina ada BanaꞋe Yaubada yana ilaꞋa aimo tokoyona agaidiya ginalakayemu-ma againe gilulugolegoleda. Fl 1:3-4 1Ko 4:20 2Te 3:9 1Fi 5:3 Lo 1:8 Af 14:14-15 Md 16:27

1:9-10: Fl 1:3-4 1Ko 4:20 2Te 3:9 1Fi 5:3 Lo 1:8 Af 14:14-15 Md 16:27