1 अच्‍युनुपतिवा, दाक्‍पी चोवो येशू ख्रीष्‍ट फेपुप ताङ दाक्‍पु खोला ठेतुपला मुला राङ जोम्‍बुप कोर्ला ङ्‍यिराङ ख्‍यिराङला गोङ्‍बा शोयी। 2 ललाइ लुङ्‍तेम्‍बा याङ्‍ना ताम्‍ङे याङ्‍ना ललाइ यिकी नेसुर चोवो फेपुप तुजे वा वे सिक्‍यासिन ख्‍यिराङ पप साङ माकी, यर्मिन मर्मिन साङ माडो। 3 सी साङ ख्‍यिराङला काङगी थोक्‍ला साङ जिनोक जोनी मुलुशी। च्‍यिलासिसिन गोमाला कोन्‍छ्‍योककी तेन्‍दोकला लङ्‍गुप मी दिक्‍छेनतिवा बङी वुङ्‍गुप ताङ ना तोङ गोवु दुक्‍टाकी गिपा माथेन्‍दा सेक्‍ला ती तुजे ति मेवी। 4 ती ना तोङ्‍गुप दुक्‍टाकी गिपा तीकी मीतिवी सोवा देकुपला जोवु तेरी च्‍यालकतिवाला तेन्‍दुप ताङ कोन्‍छ्‍योक दोके जोनी खो ज्‍यु वोतुप दासा चाङ्‍माला देनी खुरुङ राङ कोन्‍छ्‍योक यिन सिनी खोकी तेन्‍दोकला लङ्‍गिवी।

5 ती ताम्‍ङे ति ङ ख्‍यिरा मुला वोतुप पेला नेज्‍युनी ख्‍यिराङला सिक्‍यावु मिन रो? 6 तन्‍दा ती दुक्‍टाकी गिपा ति क्‍येक्‍नी ज्‍याङ वे सिरुप ति ख्‍यिराङला छ्‍या राङ वे। ती दुक्‍टा ति खोरो तुजे छेसिमा गिवी। 7 ती छ्‍याकला वोतुप दुक्‍टाकी ओङकी मीतिवाला कोन्‍छ्‍योककी सुङ ङ्‍येन मिज्‍यिवु लाका कियी राङ वे। यिने कोन्‍छ्‍योककी पिताङ तोङ सिनी मासुङा सेक ती दुक्‍टाला क्‍येक्‍नी ज्‍योकुप मी तीकी ती दुक्‍टा तीला क्‍येक्‍नी राङ ज्‍योकिवी। 8 ती दुक्‍टा तीला पि तोङ्‍गुप पेला चोवो येशू दी जम्‍बुलिङला फेप्‍किवी। तमा खो फेवु पेला ग्‍यपुप वोसिर ताङ खोकी उकी राङ तीला ना तोङ्‍गिवी। 9 ती दुक्‍टाकी गिपा ति शैतानकी ओङ नेसुर वुङ्‍गुप पेला तीकी मीतिवाला मेटेङ्‍बु वोतुप जिम्‍डुल ताङ त ताङ हलेवु लाकातिवा छ्‍या देन्‍दुप ताङ 10 येशूला तेपा माक्‍यावु तप्‍की ना डोपतिवाला जिनोक छ्‍या तेन्‍गिवी। च्‍यिलासिसिन दाक्‍पुला मिजी नङ्‍गुप टेङ्‍बु वोतुप कोन्‍छ्‍योकला तिवी सेमला मालावु तप्‍की यिन। 11 तुक क्‍यानी तिवा जिनोक जोवु ताम्‍ङेला तेपा किशी सिनी कोन्‍छ्‍योककी तिवी सेम ति दुक्‍टाला राङ तेपा कितुपला पिताङ ताङ्‍सुङ। 12 तमा टेङ्‍बु वोतुप कोन्‍छ्‍योकला तेपा माक्‍यानी मेटेङ्‍बुला गा कितुपतिवा तेरीला खोकी क्‍येन तेर्किवी।

13 यिने चोवोकी ङ्‍यिङ्‍ज्‍येवु अच्‍युनुपतिवा, ख्‍यिरा थोक्‍ला कोन्‍छ्‍योकला ङ्‍यिराङ नरी थुचिछे बुलिन। च्‍यिलासिसिन कोन्‍छ्‍योककी गोमा नेज्‍यु ख्‍यिराङला खोकी थु चाङ्‍मा नेमा चाङ्‍मा जो नङ्‍गुपला ताङ कोन्‍छ्‍योक टेङ्‍बुला तेपा क्‍यानी शेप ने र्‍होकुपला खोकी पेन नङ्‍गुप तप्‍की यिन। 14 तीकी थोक्‍ला राङ ङ्‍यिरा ख्‍यिराङला ख्‍याप्‍टाक क्‍यावु लेन ल्‍यामु नेसुर दाक्‍पी येशू ख्रीष्‍टकी मोवा थोपुपला खोकी ख्‍यिराङला कताङ नङ्‍गुप यिन। 15 ती तप्‍की अच्‍युनुपतिवा, तेपा रम्‍बु क्‍यानी ङ्‍यिरा ख्‍याप्‍टाक क्‍यावु सुङ याङ्‍ना ङ्‍यिरा तङ्‍गुप यिकी नेसुर ख्‍यिराङला ङ्‍येतुप येन्‍देनला युसा। 16 तमा दाक्‍पुला ङ्‍यिङ्‍ज्‍ये क्‍या नङ्‍गुप ताङ खोकी कटिन नेसुर नरीकी थोक्‍ला टोङ्‍गु ताङ रेवा ल्‍यामु नङ्‍गुप दाक्‍पी पपा कोन्‍छ्‍योक ताङ चोवो येशू ख्रीष्‍टकी 17 ख्‍यिरा सेमला लोदिमु नङ्‍शी, तमा तेरी लाका ताङ ताम्‍ङे ल्‍यामु कितुपला ख्‍यिराङला रम्‍बु जो नङ्‍शी।