1 त तेरी सिनाङ तिङ्‍ला अच्‍युनुपतिवा, ङ्‍यिरा थोक्‍ला मोपोर किसा। कोन्‍छ्‍योककी लेन ल्‍यामु ति ख्‍यिरा पर्ला टम्‍बुप दोके टिम्‍बु क्‍यानी टम्‍शी, तमा दासा तेरीकी मीतिवी ताङ्‍देन क्‍यानी ङ्‍येन्‍शी, 2 तमा सेम मेलोवा ताङ दुक्‍टा वोतुप मीतिवा नेसुर दाक्‍पु पे थुप्‍शी। च्‍यिलासिसिन तेरी मीतिवा कोन्‍छ्‍योकला तेपा क्‍यावु मे। 3 यिने चोवो याङ खोङ्‍तेर्मु वोतुप चोवो यिन्‍दुप तप्‍की खोकी ख्‍यिराङला नरी रम्‍बु जो नङ्‍गिवी, तमा दुक्‍टा नेसुर र्‍होकिवी। 4 ङ्‍यिरा ख्‍यिराङला काङ की सिक्‍यावे, ती ति ख्‍यिरा कियी साङ वे, ती लाका ति तिङ्‍ला साङ किवी सिनी ङ्‍यिराङला छासे तेन्‍तेन वे। 5 कोन्‍छ्‍योककी ख्‍यिराङला चुक क्‍यानी ङ्‍यिङ्‍ज्‍ये क्‍या नङ्‍गुप ताङ ख्रीष्‍टकी चो छेटाङ ख्‍येल्‍सिनाङ हम क्‍या देतुप ति ख्‍यिरा सेमला ल्‍यामो क्‍यानी हाक्‍कोवुला गोमा किशी।

6 अच्‍युनुपतिवा, दाक्‍पी चोवो येशू ख्रीष्‍टकी मिङला ङ्‍यिराङ ख्‍यिराङला टोङ्‍गु तेरिन। छेरा कितुप ताङ ङ्‍यिरा सिक्‍यावु येन्‍देन मेङ्‍येन्‍दुपतिवा तेरी नेसुर कुतुक दे। 7 च्‍यिलासिसिन ङ्‍यिरा काङ क्‍यावे, ख्‍यिरा साङ तुकै राङ क्‍यानी ङ्‍यिरा लुमु से गोकिवी सिरुप ति ख्‍यिराङला छ्‍या राङ वे। ख्‍यिरा मुला वोतुप पेला ङ्‍यिरा छेरा माक्‍या, 8 सी समा साङ तुक राङ मासो, यिने ख्‍यिराङला कले मेख्‍येल्‍शी नोनी ङ्‍यी ताङ नुप्‍ज्‍या हुर्ताक क्‍यानी रङगी टेमु क्‍यानी लाका क्‍यायी। 9 ङ्‍यिराङला ख्‍यिराङ नेसुर दाल्‍जा ङ्‍येतुप ओङ मेतुप याङ मिन, यिन्‍सिनाङ ख्‍यिरा ङ्‍यिरा क्‍यावु दोके क्‍यानी ङ्‍यिरा लुमु से गोकिवी सिरुप ति ख्‍यिराङला हाक्‍कोशी सिनी ङ्‍यिरा तुक क्‍यावु यिन। 10 च्‍यिलासिसिन ङ्‍यिराङ ख्‍यिरा मुला वोतुप पेला “सी लाका मिकिवे, तीकी समा साङ मासाशी।” सिनी ख्‍यिराङला टोङ्‍गु बिन्‍दुप यिन। 11 यिने ख्‍यिरा पर्ला माङ्‍शोक मीतिवा छेरा क्‍यानी लाका मिकिवु ताङ मी यम्‍बी क्‍यावु लाकाला तोक्‍सा छोकुप लाका किनोक सिरुप ति ङ्‍यिरे थोसुङ। 12 तिवाला ङ्‍यिराङ चोवो येशू ख्रीष्‍टकी मिङला क ताङ टोङ्‍गु तेरिन। तिवा खरक्‍पा सोक सोके देनी दाक दाक्‍पी लाका क्‍यानी सशी। 13 अच्‍युनुपतिवा, ख्‍यिराङ ति लाका ल्‍यामु कितुपला यिछ्‍येता माकी। 14 सी दी ङ्‍यिरा तङ्‍गुप यिकीला टिवु ताम्‍ङे ति मेङ्‍येन्‍वे, तुका मीतिवा ल्‍यामो क्‍यानी ङो शेनी ज्‍योक। तिवी मुला तम्‍जी साङ माजो। तमा तिवा ङोछाला ख्‍येल्‍शी। 15 यिन्‍सिनाङ तिवाला डला माजो, यिने रङगी नुपला दोके क्‍यानी टोङ्‍गु बिन।

16 त लोदिमु वोतुप चोवोकी ख्‍यिराङला चो पेला कनी गल्‍सिनाङ नरी लोदिमु नङ्‍शी। तमा खो नरी ख्‍यिरा तेरीकी मुला राङ ज्‍युशी। 17 दी यिकी ति ङ पावलकी राङ टिक च्‍यिनी तङ्‍गुप यिनो। दी तेरी सिनाङ तिङ्‍ला टसी देलेक सिनी टिवु ति दी यिकी ङे राङ तङ्‍गुप यिन सिनी ख्‍यिराङला हाक्‍को ज्‍यितुपला ङरा लाक्‍पी राङ टिवु यिनो। 18 दाक्‍पी चोवो येशू ख्रीष्‍टकी कटिन ति ख्‍यिराङ तेरीला थोप्‍शी।