2
येशू ख्रीष्टकी खोङ्तेर्मु वोतुप मक्मी
1 तुक क्यानी आङो, ख्युरुङ ख्रीष्ट येशूकी नङ्गुप कटिनला तेपा रम्बु क्यानी देता। 2 मी मङ्मुकी मिङ्गाला ङे ख्युरुङला येन्देन बिन्दुप ताम्ङे ति खोङ्तेर्मु वोतुप मी यम्बाला साङ लोप। तमा तिवी येलुङ मी यम्बातिवाला लोप थुप्शी। 3 मक्मीतिवी मक ग्यकुपला चो दुक्पा वोसिनाङ हम क्या देतुप दोके क्यानी ख्योरो साङ येशू ख्रीष्टकी थोक्ला लेन ल्यामु ख्याप्टाक कितुपला ङ्यिरा मुला दुक्पा खुर गोकिवी। 4 मक्मीला शुवु मी ति लाका यम्बाला येनी मेदेवी। च्यिलासिसिन तीकी खुरुङला मक्मीला ज्यितुप मी तीला सेमला डोप लाका कि गोकिवी। 5 ती दोके चिर्मु चेप पेला साङ चिर्मु चेप मी ति तीकी ठिमला देनी चिर्मु माचेसिन तीला छ्यक्तक मोथोपिवी। 6 हुर्ताक क्यानी सप्ले लाका कितुप मी तीकी गोमाला डुप्सेन साप ङ्ये गोकिवी। 7 दी ङे सिक्यावु ताम्ङे ति ल्यामो नासाम तोङ। च्यिलासिसिन चोवोकी ख्युरुङला तेरी ताम्ङे हाक्कोवु ओङ नङ्गिवी।
8 ग्येल्वु दाऊदकी गिपाला क्येवु येशू ख्रीष्टला नरी नासाम तोङ। कोन्छ्योककी खोला टुङ्गुप ने ङोसु लङ्गुप यिन। ङे ख्याप्टाक क्यावु लेन ल्यामु ति दी राङ यिन। 9 ती लेन ल्यामुकी थोक्ला राङ ङ दुक्चे क्येनला शोरुप मी दोके च्याटोक ग्यप्नी छेटाङ खुरिन वे। यिन्सिनाङ कोन्छ्योककी सुङला च्याटोक ग्यक मुथुपी। 10 तुक क्यानी कोन्छ्योककी पेतुपतिवी थोक्ला ङ हम क्यानी देतिन। ती ति तिवाला साङ येशू ख्रीष्टकी नङ्गुप थर्वा ताङ नाम्साङ मिशिवु मोवा ङ्ये थुप्शी सिनी यिन। 11 दी ताम्ङे ति टेङ्बु यिन।
दोजो दाक्पु खो ताङ मुला राङ शिसुङ सिसिन खो ताङ मुला राङ सेन्बु साङ लङ्गिवी।
12 दाक्पु खोकी थोक्ला छेटाङ ख्येल्सिनाङ हम क्यानी दे थुप्सिन दाक्पु खोकी मुला राङ ग्येला कितुप ङ्येकिवी।
यिने दाक्पी खोला सेमला मिलिङ्गिवी सिसिन खोकी साङ दाक्पुला ङो मेशेवी सिनी सुङ्गिवी।
13 दाक्पु खोङ्तेर्मु मेसिनाङ खो खोङ्तेर्मु वे,
च्यिलासिसिन खोकी सुङ्गुप ति नाम्साङ मोफोवी।
कोन्छ्योकला गा लोङ्गुप कोर्ला
14 दी ताम्ङेकी कोर्ला तेपा कितुप मीतिवाला टेन्दा लोङ। तमा चोवो कोन्छ्योककी थोङ्दाङला क बिन्नी तिवा ताम्ङे छिक च्यिकला साङ खाँदा मिकिशी। तुका ताम्ङे ति काङ साङ फेन मोथोवु यिन, ती ताम्ङेकी जोसालेन्सिन ङ्येन्दुपतिवाला मेलोवा जेवी। 15 ख्युरुङ अछ्योता सेक कोन्छ्योककी सुङ टेङ्बु ति ल्यामु क्यानी ख्याप्टाक की, तुक क्यासिन खोकी ख्युरुङला गा किवी, तमा ख्युरुङ ङोछाला साङ मेख्येल्वी। 16 कोन्छ्योकला मोवा मेतुप जम्बुलिङकी गो ताङ चा मेतुप ताम्ङेतिवा माङ्येना। च्यिलासिसिन तुका ताम्ङेतिवी कोन्छ्योकला मङ मङ मोवा मेतुप जेवी। 17 तुका ताम्ङेतिवा म बुनी ङमु ग्यावु दोके यिन। तुका ताम्ङे मेटेङ्बु कितुपतिवी पर्ला हुमेनियस ताङ फिलेतस साङ यिनो। 18 तिवी ती ताम्ङे टेङ्बु क्युर ज्याक्नी शेप ने सेन्बु लङ्गुप ति तोङ्ला के च्युङ्गुप यिन सिनी मीतिवाला येन्देन मेटेङ्बु लोप्किनोक। तिवी तुका ताम्ङे मेटेङ्बु लाप्नी माङ्शोक मीतिवाला तेपा कितुप क्युर्नी ज्योक च्यिसुङ। 19 यिन्सिनाङ कोन्छ्योककी डम्ज्यी रम्बु जोसुङ। ती डम्ज्यीला “कोन्छ्योककी खोरे पेतुप मीतिवाला ङो शेकिवी।”* २:१९ गन्ती १६:५ सिनी टि वे। तमा “चोवो कोन्छ्योकला तेपा किवी सिनी सिरुप मी तेरीकी दिक्पा कितुप क्युर गोकिवी।”* २:१९ गन्ती १६:२६ सिनी टि वे।
20 दी ताम्ङे साङ नासाम तोङा। मी छ्येतिवी खाङ्बा सेर ताङ ङुलकी नेक्योक तिराङ मेवी, यिने शिङ ताङ थली नेक्योक साङ गिवी। ती नाङ्ला सेर ताङ ङुलकी नेक्योक ति नाथोप डेन्बु वुङ्गुप पेला थोकिवी, शिङगी नेक्योक ताङ यम्बा नेक्योकतिवा यम्बा पेला थोकिवी। 21 ती दोके सी साङ दिक्पा कितुप क्युर्नी खुरुङ टेङ्बु जेवी सिसिन ती ति नाथोप पेला खाङ्बी ज्यिन्दाककी खक्छ्येवुला थोकुप चेङ्गा वोतुप नेक्योक दोके च्युङ्नी ज्यिन्दाककी थोक्ला तेरी लाका ल्यामु कितुप च्युङ्गिवी।
22 ख्युरुङ नाज्युङ वोतुप पेला नासाम शरुप ताम्ङे मेलोवातिवा क्युर, तमा सेम टेङ्बु क्यानी कोन्छ्योकला तेपा कितुपतिवी मुला राङ टेङ्बु कितुप ताङ तेपा रम्बु कितुप ताङ मी यम्बाला ङ्यिङ्ज्ये कितुप ताङ लोदिमु कितुप छोल। 23 यिने काङ साङ हाक्मोकोवु तेन्दोक मेतुप ताम्ङेला माङ्येन। च्यिलासिसिन तुका ताम्ङेकी थमु तिराङ लोङ्गिवी सिरुप ति ख्युरुङला साङ छ्या वे। 24 कोन्छ्योककी थोक्ला शब्ज्यी कितुप मी तीकी थमु ग्यकुप मेवी, यिने तेरी मीतिवाला च्यङ्च्यु कितुप ताङ तिवाला ल्यामु क्यानी येन्देन तेरुप ताङ हम क्या देतुप ताङ 25 कुसु ज्यम्बु क्यानी रङगी तेन्दोकला लङ्गुप मीतिवाला साङ ल्यामु क्यानी लोप गोकिवी। तुक क्यासिन कोन्छ्योककी तिवाला साङ सेम ग्युर च्यिनी तिवी खोकी सुङ टेङ्बुला तेपा कि थुप्किवी। 26 तमा तिवा सेम ङ्येनी शैतानकी ओङ नेसुर थर्नी कोन्छ्योककी नोवाला युक थुप्किवी।