13
एन्टिओखिया चर्चकी बारनाबास ताङ शाऊलला पेनी कतङ्गुप
1 एन्टिओखियाकी चर्चला कोन्छ्योककी लुङ्तेम्बातिवा ताङ गेकेनतिवा नोक। तिवा ति बारनाबास ताङ नक्पु सिरुप शिमियोन ताङ कुरेनी नेसुर वावु लुकियस ताङ ग्येल्वु हेरोद टिक्पे वोतुप पेलाकी दाल्जा मनेन ताङ शाऊल नोक। 2 तिवा कोन्छ्योकला सोवा तेक्नी ङ्युङ्ने र्हुङ्यिन कितुप पेला कोन्छ्योककी थु चाङ्माकी तिवाला सुङ्सुङ, “बारनाबास ताङ शाऊलला पेनी ज्योक! तिवा ति ङे थोक्ला लाका कितुपला कतङ्गुप यिन।” 3 ती तप्की तिवा येलुङ ङ्युङ्ने र्हुङ्गुप ताङ मोपोर क्यासिमा बारनाबास ताङ शाऊलकी खला लाक्पा ज्याक्नी मोपोर क्यानी ताङ्सुङ।
थल्माला बारनाबास ताङ शाऊल साइप्रसला गलुप
4 तमा कोन्छ्योककी थु चाङ्माकी तङ्गुप तप्की बारनाबास ताङ शाऊल ति मर सिलुकियाला गल्नी तेसुर टु जेनी ग्येम्छोकी पर्ला वोतुप साइप्रस सिरुप ग्येम्छो परकी स कम्बु* १३:४ ग्येम्छो परकी स कम्बु ति टापू यिन। च्यिकला गाल। 5 गल्सिमा तिवा सलामिस सिरुप ग्येसाला लेप्नी यहूदी छ्योखाङतिवी नाङ्ला कोन्छ्योककी सुङ ख्याप्टाक क्यासुङ। ती पेला तिवाला दाल्जा कितुपला यूहन्ना साङ तिवी मुला राङ नोक। 6 तमा तिवा तल्ग्येक साइप्रस गोम्नी पाफोस सिरुप ग्येसाला लेप्सुङ। ते बार येशू सिरुप जिम्डुल छ्या देन्दुप यहूदी लुङ्तेम्बा मेटेङ्बु यीला ठेसुङ। 7 ती ति ती लुङ्बाला ग्येला कितुप सर्गियास पौलुस सिरुप मी छ्ये यीकी मुला देनी तीला शब्ज्यी किनोक। ती सर्गियास पौलस ति रिक्पा वोतुप मी यिनोक। तुक क्यानी तीकी बारनाबास ताङ शाऊलला कताङ्नी कोन्छ्योककी सुङ ङ्येन्दुप नो क्यानोक। 8 यिने एलुमास सिरुप ती जिम्डुल छ्या देन्दुप मी ति बारनाबास ताङ शाऊलकी तेन्दोकला लानी सर्गियस पौलसला कोन्छ्योकला तेपा कि मिज्यिवु छाल्सुङ। एलुमासकी तेन्दोक ति ग्रीक ताम्ङेला जिम्डुल छ्या देन्दुप मी यिन। 9 तमा गोमाला शाऊल सिरुप पावल ति कोन्छ्योककी थु चाङ्माकी क्येङ्नी ती जिम्डुल छ्या देन्दुप तीला छ्योर छ्योर्मे ल्हानी दुक सिक्यासुङ, 10 “ख्यो टेङ्बुला गा मिकिवु डेकी पुज्युङ, ख्युरुङ जिनोक जोप ताङ दुक्टाकी क्येङ्गुप मी यिन। ख्युरुङ कोन्छ्योककी लाम टेङ्बुला क्योकोलोक जोप नो किवी? 11 त ल्होसा! कोन्छ्योककी पर्च्या ख्युरुङला ख्येल वोतो। तुक क्यानी चेयी पर सेक ख्युरुङ ङ्यिमी वो मोथोङ्गुप शर्वा डितो!” तुक सिक्यालुङ्मे मुक्पा छुपुप ताङ नक्तोमी गल्नी तीकी काङ साङ थोङ माथुप्नोक। तमा मीतिवी लाक्पाला जिम्नी टिटे किते नोनी ती ति फार ताङ छुर युकुप छाल्सुङ। 12 ती थोङ्सिमा ती लुङ्बी ग्येला कितुप सर्गियस पौलस तीकी कोन्छ्योकला तेपा क्यासुङ। च्यिलासिसिन चोवो येशूकी येन्देन हाक्कोनी ती ति हलेवा लानोक।
पावल ताङ बारनाबास पिसिदियाकी एन्टिओखियाला गलुप
13 तमा पावल ताङ खोकी दाल्जातिवा पाफोस नेवा टुला जेनी पामफिलियाकी लुङ्बाला वोतुप पर्गा सिरुप दासाला लेप्सुङ। यिने यूहन्ना ति तिवी मु नेसुर केनी यरूशलेमला राङ लोक्सुङ। 14 तिवा पर्गा नेसुर थेन्नी पिसिदियाकी एन्टिओखियाला वासुङ। तमा ङासोप ङ्यिमाला यहूदी छ्योखाङला गल्नी देसुङ। 15 ते यहूदी छ्योखाङकी छ्येतिवी मोशाकी ठिम ताङ कोन्छ्योककी लुङ्तेम्बाकी थेप नेसुर लाप्सिमा पावल ताङ बारनाबासला दुक सिनी कताङ्सुङ, “ओ नुपतिवा, ख्यिरा मुला मीतिवाला टोङ्गु नङ गोवु सुङतिवा वोसिन सुङा!”
16 तमा पावल खोक लानी लाक्पी छ्याक्के क्यानी मीतिवाला सिक्यासुङ, “इस्राएलकी मीतिवा ताङ कोन्छ्योकला ज्यिवा कितुप यहूदी मिन्दुप मिरिक यम्बाकी मीतिवा, सेना! 17 इस्राएलकी कोन्छ्योककी दाक्पी हङ्गावातिवाला खोकी गिपा सिनी पेसुङ। तमा तिवा मिश्र लुङ्बाला देतुप पेला खोकी तिवाला फेल ज्यितुप ताङ ङार छ्येवु जो नाङ्सुङ। तमा ङार छ्येवु क्यानी तिवाला ती लुङ्बा नेसुर तेन्नी फेप्सुङ। 18 तमा दासा पाङ्थेरीला लो खल ङ्यी सेक तिवी कोन्छ्योककी सुङला माङ्येन्सिनाङ खो हम क्यानी ज्युसुङ। 19 ती ज्युक्ला खोकी राङ कनानला वोतुप लुङ्बा दिनला ना तङ्नी इस्राएलकी गिपातिवाला ती लुङ्बा ति कोन्छ्योककी थाक्छ्येवु टोङ्बा जोसुङ। 20 ती सेक लो सयी ज्यी ताङ खल ङ लेप्सुङ।
ती ज्युक्ला कोन्छ्योककी लुङ्तेम्बा शमूएलकी ङो सेक खोकी इस्राएलकी मीतिवाला ठिम तोङ्गुप मीतिवा नाङ्सुङ। 21 लोङ ती ज्युक्ला तिवी ग्येल्वु गोकिवी सिनी लङ्गुप तप्की कोन्छ्योककी बिन्यामिन गिपाकी कीशकी पुज्युङ शाऊलला ग्येल्वु जो नाङ्सुङ। तमा तीकी लो खल ङ्यी सेक ग्येल क्यासुङ। 22 येलुङ कोन्छ्योककी ग्येल्वु शाऊलला ग्येला कितुप नेमा तेन तङ्नी दाऊदला ग्येल्वु जोसुङ। तीकी कोर्ला कोन्छ्योककी पङ्बु नङ्नी ‘दी यिशैकी पुज्युङ दाऊदकी सेम ति ङे सेम दोके राङ वोतुप ति ङे थोङ्सुङ। दीकी ङे नोवाला वोतुप लाकातिवा तेरी किवितो!’ सिनी सुङ्सुङ।* १३:२२ १ शमूएल १३:१४; १६:१२ 23 तमा ज्युक्ला ती ग्येल्वु दाऊदकी गिपा नेमा राङ कोन्छ्योककी थाक्छ्येन नङ्गुप दोके इस्राएलकी मीतिवाला दिक्पा ने थर ज्यितुपला येशू ताङ्सुङ। 24 येशू फेपुप सिनाङ गोमाला यूहन्नाकी तेरी इस्राएलकी मीतिवाला ‘ङ दिक्छेन यिनोक सिनी सेम ग्युर्नी बप्तिस्मा लङ गोकिवी’ सिनी ख्याप्टाक क्यासुङ। 25 खोरो ख्याप्टाक कितुप लाका सिन्दु छ्येवु पेला यूहन्नाकी सिक्यासुङ, ‘ख्यिरा ङला सु यिन नोकिनोक? ख्यिरा गिवी सिनी गु देतुप मी ति ङ मिन, यिने खो ङे तिङ्ला फेप्किवी। ङ याङ खोकी काची र्हाम्डोक डोलुप साङ पोमु मे।’
26 ओ अब्राहामकी गिपा ताङ कोन्छ्योकला ज्यिवा कितुप यहूदी मिन्दुप मिरिक यम्बाकी मीतिवा, दी दिक्पा ने थरुप लेन ल्यामु ति कोन्छ्योककी दाक्पी पर्ला राङ ताङ वे। 27 यिने यरूशलेमकी मीतिवा ताङ तिवाला ओङ्ज्येन कितुपतिवी येशू सु यिन सिरुप ति ङो माशेवु ताङ ङासोप ङ्यिमा ङ्यिमाला रोकुप कोन्छ्योककी लुङ्तेम्बाकी सुङतिवा साङ हाक्माकोवु तप्की खोला क्येन बिन्सुङ। तुक क्यासिमा गोमाला कोन्छ्योककी लुङ्तेम्बातिवी खोकी कोर्ला सुङ्गुप ताम्ङेतिवा तेरी छेसुङ। 28 खोला से गोवु तेन्दोक काङ मेसिनाङ तिवी खोला से राङ गोकिवी सिनी पिलातसला गोङ्बा शुसुङ। 29 तुक क्यानी खोकी कोर्ला कोन्छ्योककी लुङ्तेम्बाकी सुङला टिन वोतुप तेरी छेसिमा तिवी खोला ग्यङ्शिङ लो नेमा पाप्नी शेप मीला ज्योकुप टककी फुककी नाङ्ला ज्याक्सुङ। 30 यिने कोन्छ्योककी खोला शेप ने ङोसु लाङ्सुङ। 31 ती ज्युक्ला खोकी मुला राङ गालील नेसुर यरूशलेमला वुङ्गुपतिवी चिप्ला खो ङ्यिमा अलायी सेक छ्यार्सुङ। तमा तिवा तन्दा साङ खोकी पङ्बु यिन। 32 कोन्छ्योककी दाक्पी पगावा हङ्गावाला थाक्छ्येन नङ्गुप लेन ल्यामु ति ङ्यिराङ ख्याप्टाक किवी। 33 तीकी तेन्दोक ति खोकी येशूला ङोसु लाङ्सिमा ती थाक्छ्येन नङ्गुप ति तेरी दाक्पु तिवी गिपातिवाला डुप्सुङ। तुक क्यानी भजनसंग्रह ङ्यीला दुक सिनी टि वे,
‘ख्युरुङ ङे पुज्युङ यिनो,
हारिङ ङे ख्युरुङला क्येवु यिन।’* १३:३३ भजन २:७
34 कोन्छ्योककी येशूला ङोसु लाङ्सुङ, ङोसु लाङ्सिमा नाम्साङ रुल डो माच्यी। तीकी कोर्ला भजनसंग्रहला दुक सिनी टि वे,
‘दाऊदला थाक्छ्येवु टेङ्बु ताङ तेन्तेन क्यावु मोलाम ति ङ ख्यिराङला तेरिनो।’
35 तुक क्यानी भजनसंग्रहकी यम्बा दासाला दुक सिनी टि वे,
‘कोन्छ्योककी खोरे मी टेङ्बुला नाम्साङ रुल मिज्यिवी।’* १३:३५ भजन १६:१०
36 यिन्सिनाङ दाऊद जम्बुलिङला वोतुप पेला कोन्छ्योकला ल्यामो क्यानी शब्ज्यी पुल्नी शिसुङ, शिसिमा तीकी हङ्गावातिवी मुला राङ मुक्तुम ग्यप्नी रुल्सुङ। 37 यिने कोन्छ्योककी शेप ने ङोसु लङ्गुप तीकी जु ति मारुल। 38 ती तप्की अच्युनुपतिवा, कोन्छ्योककी शेप ने ङोसु लङ्गुप ती येशूकी क्या नङ्गुप लाका नेसुर कोन्छ्योककी ख्यिराङला दिक्पा ने थर ज्यितुप ताम्ङे ति ख्यिराङला हाक्कोशी। 39 ख्यिराङ येशूला तेपा कितुपतिवा तेरीला ख्यिरा क्यावु दिक्पा नेसुर थर च्यिनी वे। ती थर ज्यितुप लाका ति मोशाकी ठिम नेसुर वुङ मुथुपी। 40 ती तप्की च्याङ्से देता! मिसियाङ कोन्छ्योककी लुङ्तेम्बातिवी थेप नाङ्ला सिक्यावु दोके येशूला तेपा माक्यासिन ख्यिराङ दिक्पा ने थर मुथुप्तो। ती कोन्छ्योककी लुङ्तेम्बाकी थेपला दुक सिनी टि वे,
41 ‘ओ मारे तोङ्गुप टेङ, ल्होसा।
तमा हलेवा क्यानी ना डोशी।
च्यिलासिसिन ख्यिरा ङोला राङ ङ लाका यी कितिन।
ती लाकाकी कोर्ला सी ख्यिराङला सिक्यासिनाङ ख्यिरा नाम्साङ तेपा मिकिवी।’ ”* १३:४१ हबकूक १:५
42 ती ज्युक्ला पावल ताङ बारनाबास यहूदी छ्योखाङ नाङ नेमा थेन डोप पेला मीतिवी “ज्युककी ङासोप ङ्यिमाला साङ दी ताम्ङे सुङ्डे की।” सिनी तिवाला गोङ्बा शुसुङ। 43 तमा कोन्छ्योकला सोवा देकुप छर्सिमा यहूदीतिवा ताङ यहूदी छ्योला ल्यामो क्यानी तेपा कितुप यहूदी मिन्दुप मिरिक यम्बातिवा बङी पावल ताङ बारनाबासकी तिङ्ला तिङ्यासुङ। तमा पावल ताङ बारनाबासकी तिवी मुला ताम्ङे अरा उरा सिक्यासिमा “ख्यिराङ नरी कोन्छ्योककी सुङला ङ्येन्नी कोन्छ्योक नेमा वुङ्गुप कटिन थोप्नी देता।” सिनी तिवाला सिक्यासुङ।
44 ज्युककी ङासोप ङ्यिमाला कोन्छ्योककी सुङ ङ्येन्दुपला तेरी ग्येसाकी मीतिवा फोक ल्हानी यहूदी छ्योखाङला वासुङ। 45 मी माङ्छ्योक वुङ्गुप थोङ्नी यहूदीतिवा ठतोक लानी पावलकी मीतिवाला लापुप ताम्ङे ति टेङ्बु मिन सिनी पावलकी तेन्दोकला लासुङ। 46 यिने पावल ताङ बारनाबासकी ङाडेङ क्यानी सिक्यासुङ, “कोन्छ्योककी सुङ ति थल्माला ख्यिराङ यहूदीतिवाला राङ ख्याप्टाक कि गोवु ति यिन्जा। यिने ख्यिरा दी सुङला माङ्येन्नी नाम्साङ मिशिवु मिजी ङ्ये छ्योवु मेतुप तप्की ङ्यिराङ यहूदी मिन्दुप मिरिक यम्बाकी मीतिवी ते डिवी। 47 च्यिलासिसिन कोन्छ्योककी
‘जम्बुलिङकी अन्तिमला गल्नी यहूदी मिन्दुप मिरिक यम्बाकी मीतिवाला दिक्पा ने थरुप लेन ल्यामु ख्याप्टाक कितुप वोसिर दोके च्युङ्गुपला ख्यिराङ पेनी वे।’
सिनी ङ्यिराङला सुङ वे।”* १३:४७ यशैया ४२:६; ४९:६
48 ती थोसिमा यहूदी मिन्दुप मिरिक यम्बाकी मीतिवा गा लानी कोन्छ्योककी सुङगी थोक्ला सोवा तेक्सुङ। तमा नाम्साङ मिशिवु मिजी थोपुपला कोन्छ्योककी पेतुप मीतिवा तेरीकी तेपा क्यासुङ।
49 तुक क्यानी येशूकी सुङ ति फेलिन ताङ ओङ छ्येवु डोयी गाल्सुङ। 50 यिने यहूदीतिवी पावल ताङ बारनाबासकी तेन्दोकला लानी कोन्छ्योकला सोवा देकुप पुम्पेजा छ्युक्पुतिवा ताङ ती ग्येसाला गोमा कितुप मी छ्येतिवाला चेन्नी तिवाला छेटाङ बिन च्यिनी ती ग्येसा नेवा तेन ताङ्सुङ। 51 यिने पावल ताङ बारनाबासकी खोप्राङ तेन्दोकला लङ्गुपतिवाला काङ्बी थला र्हुन ज्याक्नी आइकोनियनला गाल्सुङ। 52 तमा एन्टिओखियाला वोतुप येशूकी लोमातिवा कोन्छ्योककी थु चाङ्माकी क्येङ्नी सेम किर्मु क्यानी देसुङ।