1 ती ज्‍युक्‍ला पावल ताङ सिलास अम्‍फिपोलिस ताङ अपोल्‍लोनियाकी लाम नेवा क्‍यानी थेसलोनिकेला वासुङ। ते यहूदी छ्‍योखाङ यी नोक। 2 तमा नरी दोके क्‍यानी पावल यहूदी छ्‍योखाङ नाङ्‍ला गल्‍नी ङासोप ङ्‍यिमा ङ्‍यिमाला थेङ्‍मा सुम सेक कोन्‍छ्‍योककी सुङ नेसुर केवुल कियी देसुङ। 3 तमा ख्रीष्‍टकी छेटाङ खुरुप ताङ टुङ्‍नी ङोसु लङ गोवु ताम्‍ङे ति ल्‍यामो क्‍यानी पङ्‍बु बिन्‍नी “ख्‍यिराङला ङे ख्‍याप्‍टाक कियी वोतुप दी येशू ति ख्रीष्‍ट यिनो।” सिनी यहूदी छ्‍योखाङला जोम्‍बुप मीतिवाला सिक्‍यासुङ। 4 ती थोसिमा यहूदी मी अलायीकी येशू ख्रीष्‍टला तेपा क्‍यानी पावल ताङ सिलासकी तिङ्‍ला तिङ्‍यासुङ। तमा ते कोन्‍छ्‍योकला सोवा देकुप ग्रीकतिवा बङी ताङ ग्‍येसाकी पुम्‍पेजा छ्‍येतिवी साङ तेपा क्‍यासुङ।

5 यिने मी बङीकी येशूला तेपा क्‍यावु थोङ्‍सिमा यहूदीतिवा ठतोक लानी हाला लाका मेतुप दुक्‍टातिवाला लङ्‍नी ग्‍येसाला ठका ठुका लोङ च्‍यिसुङ। तमा तिवी यासोन सिरुप मीकी खाङ्‍बा थमु ग्‍यप्‍नी पावल ताङ सिलासला मीतिवी चिप्‍ला टि वुङ्‍गुप छाल्‍सुङ। 6 यिने पावल ताङ सिलासला माङ्‍येसिमा यासोन ताङ यम्‍बा तेपा कितुप मीतिवा ललाइला जिम्‍नी ग्‍येसाकी छ्‍येतिवी चिप्‍ला टि गाल। तमा वोरु देनिन सिरा “दी जम्‍बुलिङला ठका ठुका जोप मीतिवा दे साङ वानोक। 7 तमा यासोनकी तिवाला खोरो खाङ्‍बाला ज्‍याक्‍नोक। तिवा तेरीकी येशू सिरुप यम्‍बा ग्‍येल्‍वु मिरा च्‍यिक गिवी सिनी ग्‍येल्‍वु कैसरकी बिन्‍दुप कला मिचिनोक।” 8 ती ताम्‍ङे थोनी ग्‍येसाकी ठिम तोङ्‍गुपतिवा ताङ यम्‍बा मीतिवा तेरी काङ कितुप काङ कितुप गाल। 9 यिने तिवी यासोन ताङ तिवी मुला गलुप यम्‍बा मीतिवाला टङ्‍गा*१७:९ धरौटी लानी पिताङ ताङ्‍सुङ।

10 ती नुपला राङ तेपा कितुपतिवी पावल ताङ सिलासला बेरिया सिरुप दासाला ताङ्‍सुङ। तिवा ते लेप्‍सिमा यहूदी छ्‍योखाङ नाङ्‍ला गाल। 11 तेकी यहूदीतिवा ति थेसलोनिके यहूदीतिवा सिनाङ हाक्‍कोमु नोक। तुक क्‍यानी तिवा पावलकी ख्‍याप्‍टाक कितुप पेला सेम गा क्‍यानी ङ्‍येन्‍गिनोक। तमा येशूकी कोर्ला तिवी बिन्‍दुप येन्‍देन ति टेङ्‍बु यिन्‍ताङ मिन्‍ताङ सिनी ङ्‍यिमी टेङ कोन्‍छ्‍योककी सुङ लोप्‍किनोक। 12 ती तप्‍की तेकी यहूदीतिवा माङ्‍शोककी येशूला तेपा क्‍यासुङ। तमा ग्रीककी पुम्‍पेजा छ्‍येतिवा ताङ ग्रीककी ख्‍योक्‍पेजातिवा साङ बङी तेपा क्‍यासुङ। 13 पावलकी बेरियाला साङ कोन्‍छ्‍योककी सुङ ख्‍याप्‍टाक कियी नोक सिरुप ति थेसलोनिकेकी यहूदीतिवी हाक्‍कोनी तिवा ते साङ वानी मी माङ्‍छ्‍योकला ठका ठुका जोसुङ। 14 ती तप्‍की तेपा कितुपतिवी पावलला शार्क्येक ग्‍येम्‍छोकी गारीला ताङ्‍सुङ। यिने सिलास ताङ तिमोथी ति तेराङ देसुङ। 15 पावलला क्‍योल डोपतिवी तीला एथेन्‍स ग्‍येसा सेक क्‍योल गाल। तमा तिवा सिलास ताङ तिमोथीला ङमु राङ पावलकी चाला वुङ गोकिवी सिरुप पावलकी क खुर्नी बेरियाला लोक्‍सुङ।

16 पावल एथेन्‍सला सिलास ताङ तिमोथीला गुन देतुप पेला तेकी ग्‍येसाला कुतिवा तिराङकी क्‍येङ्‍गुप थोङ्‍नी सेमला छासे पप लानोक। 17 ती तप्‍की पावलकी यहूदीतिवा ताङ कोन्‍छ्‍योकला शब्‍ज्‍यी बुलुप यहूदी मिन्‍दुप मिरिक यम्‍बातिवी मुला छ्‍योखाङ नाङ्‍ला येशूकी कोर्ला केवुल क्‍यासुङ। तमा यम्‍बा मीतिवाला साङ हाला ठेनी ङ्‍यिमी टेङ केवुल क्‍यासुङ। 18 ती पेला इपिक्‍युरी ताङ स्‍तोइ सिरुप शेवा खावा वोतुप मीतिवी पर्ला ललाइकी पावल ताङ मुला केवुल क्‍यासुङ। तिवी पर्ला ललाइकी “दी पेतेक पेतेक सिरुप मी तीकी काङ सिक्‍यावु यिनाङ?” सिनी सिक्‍यासुङ। तमा यम्‍बातिवी “दी याङ छ्‍यिग्‍यपकी ल्‍हलुतिवी कोर्ला ख्‍याप्‍टाक कितुप मी दोके थोङ्‍गिनोक।” सिनी सिक्‍यासुङ। च्‍यिलासिसिन पावलकी येशू ताङ खो ङोसु लावु कोर्ला ख्‍याप्‍टाक क्‍यानोक। 19 तमा तिवी पावलला अरियोपागस सिरुप ठिम्‍खाङला टि गल्‍नी, “दी ख्‍योरो बिन्‍दुप येन्‍देन सम्‍बा ति काङ यिन? ङ्‍यिराङला साङ लोप थुप्‍किवी? 20 ख्‍यिरा लापुप ताम्‍ङे ति ङ्‍यिराङला मिच्‍यिक्‍पा थोकिनोक। तुक क्‍यानी ती ताम्‍ङेकी तेन्‍दोक ति काङ यिन, ती ति ङ्‍यिराङ साङ हाक्‍कोवु नो वे।” सिनी सिक्‍यासुङ। 21 तिवी तुक सिनी टिवु तेन्‍दोक ति एथेन्‍सकी मीतिवा ताङ ते देतुप छ्‍यिग्‍यपकी मीतिवी ति ताम्‍ङे सम्‍बा ङ्‍येन्‍दुप ताङ शेतुप मिसिन यम्‍बा लाका काङ साङ मिकिनोक।

22 तमा पावल अरियोपागसकी पर्ला खोक लानी, “ओ एथेन्‍सकी मीतिवा, ख्‍यिराङ ल्‍हलुतिवाला तेन्‍दुपला टेमु वोतुप ति ङे थोङ्‍सुङ। 23 ङ फार छुर युनी ल्‍हासिन ख्‍यिरा तेन्‍दुप ल्‍हतिवा बङी वोतुप ति ङे थोङ्‍सुङ। ती पर्ला ‘ङो मेशेवु ल्‍हे थोक्‍ला’ सिनी टिवु छोटी साङ ङे थोङ्‍सुङ। तमा ख्‍यिरा हाक्‍माकोवा क्‍यानी तेन्‍दुप ति ल्‍हकी कोर्ला ङ ख्‍यिराङला ख्‍याप्‍टाक कितिन। 24 काङ यिन सिसिन जम्‍बुलिङ ताङ तीला वोतुप तेरी च्‍यालकतिवा ति कोन्‍छ्‍योककी ज्‍येसुङ। खो ति देवाच्‍येन ताङ जम्‍बुलिङकी कोन्‍छ्‍योक यिन्‍दुप तप्‍की मी लाक्‍पी जोवु ल्‍हङाङ नाङ्‍ला मुज्‍युवी। 25 कोन्‍छ्‍योककी जम्‍बुलिङ तेरी ज्‍येवु तप्‍की खोला कतुकारला ख्‍येल्‍नोक सिनी मी लक नेसुर खोला शब्‍ज्‍यी बुल मोगोवी। च्‍यिलासिसिन खो तेरी मीतिवाला मिजी ताङ उ ताङ यम्‍बा तेरी गोवु च्‍यालकतिवा नङ्‍गुप कोन्‍छ्‍योक यिन। 26 खोकी मी च्‍यिक नेमा राङ दी जम्‍बुलिङ तेरीकी खला देतुप मी रुजेनतिवा तेरी जो नाङ्‍सुङ। तमा मीतिवा ती जम्‍बुलिङला वासिमा चो सेक दे गोवु छे ताङ देतुप दासा साङ जो नाङ्‍सुङ। 27 कोन्‍छ्‍योककी ती तेरी क्‍यावु तेन्‍दोक ति मीतिवी खोला छोल्‍शी, तमा छोल्‍नी खोला ठेशी सिनी यिन। यिन्‍सिनाङ खो दाक्‍पी मु ने थाक्‍रिङ्‍बु मे। 28 तुक क्‍यानी दाक्‍पु खोकी मुला राङ मिजी क्‍योङ्‍यिन वे, खोकी मुला राङ येर मर कियी वे, तमा खोकी मुला राङ दी जम्‍बुलिङला देयी वे। ती तप्‍की ख्‍यिरा छिक्‍च्‍ये†१७:२८ कविता जोपतिवा ललाइकी साङ ‘दाक्‍पु ति वुतुङ के खोकी गिपा राङ यिन।’ सिक्‍या वे।

29 दाक्‍पु कोन्‍छ्‍योककी गिपातिवा यिन्‍दुप तप्‍की खो ति मी लाक्‍पी लक्‍शी नेसुर नासाम तङ्‍नी सेर, ङुल ताङ दो थ्‍योनी जोवु दोके यिन सिनी नासाम तोङ्‍गुप मेङ्‍गिवी। 30 गोमाला मीतिवी हाक्‍माकोनी क्‍यावु तेरी लाकातिवाला कोन्‍छ्‍योककी ङ्‍याम माक्‍या, यिने तफेन्‍ला दासा तेरीकी मीतिवी सेम ग्‍युर गोकिवी सिनी क नङ वे। 31 च्‍यिलासिसिन खोकी तुजे यी तेन्‍तेन क्‍यानी दी जम्‍बुलिङला वोतुप मी तेरीला ठिम टेङ्‍बु क्‍या नङ्‍गिवी। ती ठिम कितुपला कोन्‍छ्‍योककी येशूला पेन नङ्‍गुप यिन। खोकी येशूला शेप ने ङोसु लानी तेरी मीतिवाला दी ताम्‍ङेकी कोर्ला पङ्‍बु छ्‍या तेन नाङ्‍सुङ।”

32 मीतिवी येशू टुङ्‍नी ङोसु लावु कोर्ला थोसिमा ललाइकी मर्च्या क्‍यासुङ। तमा ललाइकी ङ्‍यिराङ येलुङ दी ताम्‍ङे ति ङ्‍येन गोकिवी सिनी सिक्‍यासुङ। 33 तोजोयी सिक्‍यासिमा पावल तिवी पर नेसुर थेन्‍नी गाल्‍सुङ। 34 यिने मी ललाइ ति पावलकी मुला तिङ्‍यानी येशूला तेपा क्‍यासुङ। तिवा ति अरियोपागसकी ठिम कितुप डियनुसियस ताङ दामारिस सिरुप पुम्‍पेजा मिरा च्‍यिक ताङ यम्‍बा मीतिवा यिनोक।