24
फेलिक्सकी दोङ्ला पावलला क्येन बिन्दुप
1 ङ्यिमा ङकी ज्युक्ला तेरी सिनाङ कोङ्यार छ्ये हननिया ताङ ललाइ यहूदी छ्योखाङकी गोमा कितुप मी छ्येतिवी तर्तुल्लस सिरुप ठिमला खामु वोतुप मी ताङ मुला यहूदिया लुङ्बाला ग्येला कितुपला रोम ने वावु मी छ्ये फेलिक्सकी ते वानी पावलकी तेन्दोकला लानी शुवा ग्यप्सुङ। 2 तमा पावलला ते कताङ्सिमा तर्तुल्लसकी दुक सिनी क्येन ग्यप्सुङ। “यहूदियाला ग्येला कितुपला रोम ने वावु मी छ्ये फेलिक्स ला, ख्योरो ङ्यिराङला छासे लोदिमु बिन वे। तमा दी गिपाकी थोक्ला यर्के डोप लाकातिवा क्या वे। 3 दी ताम्ङे ति ङ्यिराङ कनी गल्सिनाङ ताङ्देन क्यानी ङ्येन्दा कितिन। 4 यिने उकुर च्यिक ङ्यिरा गोङ्बा शुवु ताम्ङे ति च्येयी सेन्डे की। 5 च्यिलासिसिन ङ्यिरा ल्हासिन दी मी तीकी कनी साङ मीतिवाला छासे दुक्पा तेरुप ताङ लुङ्बा तेरीकी यहूदीतिवी पर्ला हराङ हुरुङ जोप ताङ नासरी छ्योककी गोमा कितुप मी छ्ये यिन्दुप थोङ्सुङ। 6 तमा दीकी याङ ल्हङाङला साङ मेचेङ्गा जोप नो किनोक। तुक क्यानी ङ्यिरा दीला जिमिन। 7-8 त याङ ख्योरे राङ दीला ल्यामो क्यानी टिसिन ङ्यिरा दीला क्येन बिन्दुप तेन्दोक ति तेरी हाक्कोकिवी।” सिनी सिक्यासुङ। 9 यम्बा यहूदीतिवी साङ ती ताम्ङेतिवा टेके राङ यिन सिक्यासुङ।
10 ती ज्युक्ला फेलिक्सकी पावलला ताम्ङे लपुपला लाक्पी लातुक क्यासिमा पावलकी दुक सिक्यासुङ, “ख्युरुङ लो अलायी गोमा नेज्युन यहूदी गिपातिवाला ग्येला कितुप मी यिन्दुप ति ङे हाक्कोसुङ। ती तप्की मीतिवी ङला क्येन बिन्दुप कोर्ला गा ताङ क्यानी दी ताम्ङे सिरिन। 11 ख्योरे राङ फार छुर टिनी ल्हासिन गिवी, ङ यरूशलेमला वानी सोवा तेकुप ति ङ्यिमा च्यिङ्ङी मिसिन मागल वे। 12 ङे ल्हङाङ ताङ छ्योखाङ ताङ ग्येसाला मी ताङ मुला केवुल क्यावु याङ्ना मीतिवाला चेन्दुप दी ङला क्येन तेरुपतिवी काङ साङ माथोङ वे। 13 तुक क्यानी ङला क्येन बिन्दुप ताम्ङेकी पङ्बु साङ दिवी तेर मुथुपी। 14 यिने ख्युरुङला ती ताम्ङे ति ङ टेङ्बो सिरिन। ङ तिवी यम्बा छोक्पा सिरुप येशूला तेपा क्यानी दाक्पी गिपाकी कोन्छ्योकला सोवा देकिन। तमा ठिमला वोतुप ताम्ङे ताङ कोन्छ्योककी लुङ्तेम्बाकी थेपला वोतुप तेरी ताम्ङेला तेपा कितिन। 15 टेङ्बु वोतुपतिवा ताङ मेटेङ्बुतिवा तेरीला कोन्छ्योककी शेप ने सेन्बु लोङ्गिवी सिरुप ताम्ङे ति दिवी खोप्रे सेमला लावु दोके ङ साङ कोन्छ्योकला रेवा कितिन। 16 ती तप्की कोन्छ्योककी थोङ्दाङला ताङ मीतिवी थोक्ला साङ ङ नरी टेङ्बु कितुप छोलिन।
17 लो अलायी ज्युक्ला ङ ङे गिपातिवी पर्ला दुक्पाला ख्येलुप मीतिवी थोक्ला टङ्गा बिन्नी दाल्जा कितुप ताङ कोन्छ्योकला बुल्वा बुलुपला ङ यरूशलेमला वायिन। 18 ङ ल्हङाङ नाङ्ला गल्नी ठिमला वोतुप दोके चाङ्मा कितुप लुक्सु कियी वोतुप ति दिवी थोङ्सुङ। ती पेला मी मङ्मु साङ मे, हराङ हुरुङ साङ मे। यिने ते एशिया ने वावु ललाइ यहूदीतिवा तिराङ वोतुप्जा। 19 ती एशिया ने वावु यहूदीतिवी ङे थोक्ला काङ रे च्यिक रे सि गोवु ताम्ङे वोसिन तिवी राङ दे ख्योरे चिप्ला वानी क्येन ग्यक थुप गोवु ति यिन्जा। 20 ङला क्येन बिन्दुप ति टेङ्बु यिन्सिन ङ यहूदी छ्योकी ठिम्खाङकी मीतिवी चिप्ला वोतुप पेला ङला काङ क्येन थोङ्गुप ति दी मीतिवा खोप्रे राङ दे लप्शी। 21 ङे तिवी पर्ला लानी थोर ग्यप्नी सि गोवु ताम्ङे च्यिक ति दी यिन, ‘कोन्छ्योककी शेपतिवा सेन्बु लोङ्गुपकी कोर्ला ङे ख्यिराङला ख्याप्टाक क्यावु तप्की ख्यिरा चिप्ला हारिङ ङला ठिम कियी वे।’ ”
22 ती फेलिक्सकी साङ येशूकी कोर्ला तेरी छ्या वोतुप तप्की “मक्मी तोङ्डा च्यिककी खकी छ्ये लुसियस दे वासिमा ङ ख्यिरा शुवाकी कोर्ला केवुल क्यानी तेरिन।” सिनी सिक्यासुङ। 23 तमा तीकी मक्मी सयी च्यिककी खकी छ्ये तीला क बिन्नी “पावलला ल्यामो ल्होसा, तीला चोन्खाङ नाङ्ला ठिम तम्बु माकी। तमा सु वानी तीला गोवु च्यालकतिवा दाल्जा क्यासिनाङ माग्येका।” सिनी सिक्यासुङ।
पावल चोन्खाङला उप्नी ज्यकुप
24 ङ्यिमा अलायी तिङ्ला फेलिक्स खोरो यहूदी पेर्मी द्रूसिल्ला ताङ मुला ते वासुङ। तमा तीकी पावलला कताङ्नी ख्रीष्ट येशूला तेपा कितुप कोर्ला ङ्येन्सुङ। 25 पावलकी टेङ्बु वोतुप ताङ खोरुङला डेकला ज्योकुप ताङ ज्युक्थमाला कोन्छ्योककी जम्बुलिङकी मीतिवाला ठिम क्या नङ्गुप कोर्ला ताम्ङे किसालेन्सिन फेलिक्स ति ज्यिवा क्यानी पावलला “तन्दा ति ख्युरुङ ग्युक, खोम वोतुप पेला ङ ख्युरुङला लोङ कतोङ्गुप्नो।” सिनी सिक्यासुङ। 26 पावलकी टङ्गा तेर किते यिन्दे नोनी तीकी रेवा साङ क्यानोक। ती तप्की तीकी पावलला पर्चिक पर्चिक कताङ्नी अरा उरा सिनोक। 27 यिने लो ङ्यी ज्युक्ला फेलिक्सकी छापला पर्किअस फेस्तस ओङ्ज्येन कितुपला वासुङ। ती पेला फेलिक्सकी यहूदीतिवाला गा लोङ्गुपला पावलला चोन्खाङला राङ उम ज्याक्नी गाल्सुङ।