1 वुतुङ के ङे याङ ख्‍यिराङ ताङ लाउडिकियाला वोतुप मीतिवा ताङ ङला ङो माशेवुतिवा तेरीकी थोक्‍ला छासे टेमु क्‍यानी लाका क्‍या वे सिरुप ति ख्‍यिराङला हाक्‍कोशी सिरुप ङे नोवा वे। 2 ङे तुक क्‍यावु ति ख्‍यिराङ ताङ तिवी सेमला ङाडेङ ङ्‍येनी च्‍यिककी च्‍यिकला ङ्‍यिङ्‍ज्‍ये किशी सिनी यिन। तुक क्‍यासिन वुतुङ के ख्‍यिराङ तेरीकी सुङ टेङ्‍बु हाक्‍कोनी सेमला तेन्‍तेन तेपा क्‍यानी कोन्‍छ्‍योककी छ्‍याकला वोतुप ख्रीष्‍टला ल्‍यामु क्‍यानी ङो शे थुप्‍किवी। 3 ख्रीष्‍टला राङ कोन्‍छ्‍योककी तेरी येन्‍देन ताङ रिक्‍पा ति बानी ज्‍यकुप टोङ्‍बा दोके क्‍यानी ज्‍याक्‍नी वे। 4 ङे दी ताम्‍ङे सिक्‍यावु ति सी साङ ख्‍यिराङला ताम्‍ङे टेङ्‍बु वोतुप दोके जिनोक जोनी मुलुशी सिनी यिन। 5 ङ ख्‍यिरा पर्ला मेसिनाङ ङे सेम ति ख्‍यिरा पर्ला राङ वे। ख्‍यिराङ येर मर माक्‍यानी ख्रीष्‍टला तेपा क्‍यानी डेकला देतुप ति ल्‍हानी ङ गा कितिन।

6 येशू ख्रीष्‍टला ङे चोवो यिन सिनी ख्‍यिरा सेमला लावु तप्‍की ख्‍यिराङ नरी खोकी सुङला ङ्‍येन्‍नी मिजी क्‍योङ। 7 तमा दोङ्‍बी मार तिङ्‍मु क्‍यङ्‍नी नाम्‍साङ तला मग्‍यकुप रम्‍बु वोतुप दोके ख्‍यिराङला लापुप येन्‍देनला तेपा रम्‍बु क्‍यानी खोला नरी थुचिछे पुल। 8 ख्‍यिराङ च्‍याङ्‍से देता! सी साङ खोप्‍रे च्‍यु ताङ रिक्‍पा नेसुर जिनोक जोवु ताम्‍ङेतिवा लाप्‍नी ख्‍यिराङला मुलुशिता। तुका ताम्‍ङेतिवा ख्रीष्‍ट नेमा वावु मिन, यिने मीतिवी लुक्‍सु ताङ जम्‍बुलिङला वोतुप ङार नेसुर वावु यिन। 9 च्‍यिलासिसिन कोन्‍छ्‍योकला वोतुप तेरी छाछिङी ति ख्रीष्‍टकी मुला राङ ज्‍यु वे। 10 तमा ख्‍यिरा खोला तेपा क्‍यावु तप्‍की खोला वोतुप तेरी किताङ नालुतिवा ति ख्‍यिरा मिजीला थोप्‍नी वे। खो ति तेरी ओङ्‍ज्‍येन ताङ ङारतिवी खला चोछ्‍ये वे। 11 ख्‍यिराङ खोला तेपा क्‍यानी यहूदी च्‍येतुप लुक्‍सु क्‍यावु यिन। ती च्‍येतुप लुक्‍सु ति मी लाक्‍पी क्‍यावु मिन, ख्रीष्‍ट नेमा राङ च्‍युङ्‍गुप यिन। ती ति ख्‍यिराङला वोतुप दिक्‍पाकी किताङ नालु क्‍युरुप यिन। 12 बप्‍तिस्‍मा लङ्‍गुप पेला ख्‍यिराङ ख्रीष्‍टकी मुला राङ मुक्‍तुम ग्‍यपुप दोके यिन। तमा ख्रीष्‍टला शेप ने ङोसु लोङ्‍गुप कोन्‍छ्‍योककी ङारला ख्‍यिरा तेपा क्‍यावु तप्‍की ख्‍यिराङ साङ ख्रीष्‍टकी मुला सेन्‍बु लानी वे। 13 ख्‍यिरा दिक्‍पा क्‍यावु ताङ दुक्‍टा कितुप किताङ नालु माक्‍युरुप तप्‍की थेङ्‍मा यी ख्‍यिराङ शिनी वोतुप्‍जा, यिने त याङ कोन्‍छ्‍योककी ख्रीष्‍टकी मुला राङ ख्‍यिराङला सेन्‍बु लाङ वे। तमा ख्‍यिरा तेरी दिक्‍पातिवा ता च्‍यिनी वे। 14 तीकी तेन्‍दोक ति खोकी दाक्‍पुला क्‍येन फोकुप दाक्‍पी क्‍यावु दिक्‍पी थोक्‍ला टिवु यिकीतिवा तेरी ख्रीष्‍टकी मुला राङ ग्‍यङ्‍शिङला काँडी दाप्‍नी ना ताङ्‍सुङ। 15 ती ग्‍यङ्‍शिङ लोला राङ डेतिवी ओङ्‍ज्‍येनतिवा ताङ ङारतिवाला ना ताङ्‍नी तिवी खला खोकी ग्‍येल्‍सुङ। तमा मीतिवी मिङ्‍गाला तिवाला छ्‍या तेन्‍नी ङोशी मारे जोसुङ।

16 तुक क्‍यानी सी साङ ख्‍यिराङला साप थुङ्‍गुप ताङ चाङ्‍मा वोतुप ङ्‍यिमा तेन्‍दुप ताङ छेवा च्‍यिक तेन्‍दुप ताङ ङासोप ङ्‍यिमा तेन्‍दुप ताम्‍ङेकी कोर्ला क्‍येन मग्‍यक्‍शी। 17 ती तेरी ताम्‍ङेतिवा ज्‍युक्‍ला वुङ्‍गुप ताम्‍ङेकी र्‍हिप्‍च्‍याङ तिराङ यिन, यिने वुतुङ्‍की ति ख्रीष्‍ट राङ यिन। 18 ङ्‍यिरा ज्‍यल्‍का थोङ्‍गुप यिन सिनी मी यम्‍बाला छ्‍या देन्‍दुपला कुसु ज्‍यम्‍बु जोप दुक्‍टातिवा ताङ देवाच्‍येनकी लेन क्‍योलुप थुला तेन्‍दुप मीतिवा सी साङ ख्‍यिराङला थोपुप छ्‍यक्‍तक तोर्नी डोप मोजोशी। तिवा ति सेम दुक्‍टा नेसुर तेन्‍दोक मेताला ङ राङ छ्‍ये यिन सिनी सिवी, 19 तमा ख्रीष्‍ट ताङ मुला तम्‍जी माजोनी कुतुक देकिवी। यिने ख्रीष्‍टकी ओङला देसिन तीकी तेरी जु ति थिन्‍जाम ताङ चतिवा टेक टेक थिनी ख्रीष्‍टकी ङार नेसुर कोन्‍छ्‍योककी नोवाला वोतुप दोके फेलिन डिवी।

20 ख्‍यिराङ याङ ख्रीष्‍टकी मुला राङ शिनी दी जम्‍बुलिङला ओङ्‍ज्‍येन क्‍यावु ठिम नेसुर थर्नी वे। यिन्‍सिनाङ च्‍यिला दी जम्‍बुलिङकी ठिमला वोतुप मीतिवी दोके मिजी क्‍योङ्‍गिवी? 21 च्‍यिला ख्‍यिराङ “दीला जिम्‍बुप मेवी, तीकी टोवा ल्‍हाप मेवी, तीला थो तोङ्‍गुप मेवी।” सिरुप ठिमतिवाला तेन्‍गिवी? 22 ती तेरी ठिमतिवा थोकिन थोकिन ना डिवी। तिवा ति मीतिवी जोवु ठिम ताङ येन्‍देनतिवा तिराङ यिन। 23 तिवा ति खोप्‍रे जोवु छ्‍योला टेङ्‍बु कितुप ताङ कुसु ज्‍यम्‍बु कितुप ताङ खोरो जुला डेकला ज्‍योकुपला छासे रिक्‍पा वोतुप दोके थोङ्‍गिवी, यिने तिवा ति नासाम दुक्‍टाला खोरो ओङला ज्‍योकुपला काङ साङ फेन मोथोवु वे।