3
1 ख्यिराङ ख्रीष्टकी मुला राङ सेन्बु लङ्गुप तप्की येर देवाच्येनकी ताम्ङेतिवाला नासाम तोङ। ते देवाच्येनला ख्रीष्ट कोन्छ्योककी यावी थाकाला ज्युकिवी। 2 तुक क्यानी ख्यिराङ जम्बुलिङकी ताम्ङेला मिन, येर देवाच्येनकी ताम्ङेला नासाम तोङ। 3 च्यिलासिसिन ख्यिराङ शिनी वे, तमा ख्यिरा मिजी ति ख्रीष्टकी मुला राङ कोन्छ्योककी चिप्ला बानी ज्याङ वे। 4 ख्यिरा मिजी ति ख्रीष्ट यिन। खो फेपुप तुजेला ख्यिराङ साङ खोकी मुला राङ खोकी मोवाला वुङ्गुप थोङ्गितो।
मिजी ङ्यिङ्बा ताङ सम्बा
5 तुक क्यानी ख्यिरा जम्बुलिङकी मिजीला वोतुप नोवातिवा तेरी क्युर। ती नोवातिवा ति शम्डेन कितुप ताङ छ्येवु कितुप ताङ चोताम लपुप ताङ नासाम मेलोवा तोङ्गुप ताङ देर्पा कितुप यिन। देर्पा कितुप ति कुला छ्यो तङ्गुप दोके यिन। 6 ती ताम्ङेतिवी जोसालेन्सिन कोन्छ्योककी पर्च्या ति खोकी कला मेङ्येन्दुपतिवाला ख्येल्गिवी। 7 गोमाला थेङ्मा यी ख्यिरा मिजी साङ तुकै राङ वोतुप्जा। तमा तुक राङ क्यानी युवु साङ यिन्दुप्जा। 8 यिने त याङ ख्यिरा मिजी नेसुर ती तेरी ङ्यिर्मु कितुप ताङ ङ्यिर्मु कोक्पु वोतुप ताङ ङ्यिङ्मर कितुप ताङ मारे तोङ्गुप ताङ ताम्ङे मेलोवा लपुप ति ख्यिरा ख नेमा क्युर गोकिवी। 9 ख्यिराङ च्यिककी च्यिकला जिनोक माजो। च्यिलासिसिन ख्यिरा रङगी मिजी ङ्यिङ्बा ताङ तीला वोतुप किताङ नालुतिवा तेरी क्युर्नी 10 ख्यिरा रङगी मिजी सम्बा फोनी वे। तुक क्यानी ख्यिराङ जो नङ्गुप कोन्छ्योककी ख्यिरा मिजी साङ खोकी किताङ नालु दोके मङ मङ सम्बा जो नङ्गिवी। तमा ख्यिरा खोकी रिक्पाकी कोर्ला ल्यामो क्यानी हाक्कोकिवी। 11 कोन्छ्योककी मिजी सम्बा जो नङ्गुप तप्की दे याङ ग्रीक ताङ यहूदी, च्येतुप लुक्सु क्यावु ताङ च्येतुप लुक्सु माक्यावु, छ्यिग्यपकी मी ताङ च्योलाम ल्यामु मेतुप मी, योक्पु ताङ योक्पु मिन्दुप मीतिवी पर्ला काङ साङ ख्ये मे। यिने ख्रीष्ट तिराङ तेरी सिनाङ खक्छ्येवु वे, तमा खो ति तेरी मीतिवी मुला ज्यु वे।
12 ख्यिराङ कोन्छ्योककी पेन नङ्गुप खोकी ङ्यिङ्ज्येवु ताङ टेङ्बु वोतुप मी यिन्दुप तप्की च्यङ्च्यु सेम्बा ताङ च्यम्बा कितुप ताङ खोरुङला मो बेपुप ताङ कुसु ज्यम्बु ताङ हम क्या देतुप वुङ गोकिवी। 13 मी ललाइकी ख्यिरा तेन्दोकला लानी काङ रे च्यिक रे ताम्ङे क्यासिन ख्यिराङ च्यिककी च्यिकला हम क्यानी तीला माफ बिन। चोवोकी ख्यिराङला माफ नङ्गुप दोके ख्यिरा साङ माफ तेर गोकिवी। 14 दी तेरी सिनाङ मङ खक्छ्येवुला ख्यिराङ च्यिककी च्यिकला ङ्यिङ्ज्ये की। ख्यिराङ च्यिककी च्यिकला ङ्यिङ्ज्ये क्यासिन ख्यिरा तेरी सेम ति वुतुङ के च्यिक्पा राङ च्युङ्गिवी। 15 ख्रीष्टकी ख्यिराङला लोदिमु नङ्गुप तप्की ख्यिराङ च्यिककी च्यिकला नरी ङ्यिङ्ज्ये की। च्यिलासिसिन ख्यिराङ च्यिककी च्यिकला लोदिमु क्यानी सेम थिन्नी देतुपला राङ कोन्छ्योककी ख्यिराङला कताङ नङ्गुप यिन। तीकी थोक्ला ख्यिरा खोला थुचिछे पुल। 16 ख्रीष्टकी सुङ ति छासे क्यानी ख्यिरा सेमला नरी लुशी। तमा तेरी च्यु ताङ रिक्पाकी च्यिककी च्यिकला लोपुप ताङ टोङ्गु बिन। कोन्छ्योकला सोवा देकुप लुतिवा ताङ कोन्छ्योककी थु चाङ्माकी नङ्गुप लुतिवा लानी सेमगी दिङ नेज्युनी कोन्छ्योकला थुचिछे पुल। 17 तमा ख्यिरा ताम्ङे ताङ लाका काङ क्यासिनाङ चोवो येशूकी मिङला किसा। खो नेसुर राङ पपा कोन्छ्योकला थुचिछे पुल।
तेपा कितुप मिछाङतिवाला टोङ्गु
18 पेर्मीतिवा, ख्यिरा रङगी ख्योवातिवी सिक्यावु खला ङ्येन। तुक कितुप ति चोवोला तेपा कितुप मीतिवी कि गोवु यिन।
19 ख्योवातिवा, ख्यिरा रङगी पेर्मीतिवाला च्युरुवु माक्यानी ङ्यिङ्ज्ये किसा।
20 आङातिवा, ख्यिरा नरी रङगी पपाआमी सिक्यावु खला ङ्येना। तुक क्यासिन चोवो येशूला गा लङ्गिवी।
21 तमा पपातिवा, ख्यिरा रङगी पेजातिवाला ङ्यिर्मु मालोङ। तुक क्यासिन तिवी सेम शिवी।
22 लावातिवा, ख्यिराङ दी जम्बुलिङकी रङगी ज्यिन्दाकतिवी सिक्यावु खला ङ्येना। तिवाला गा लोङ्गुप नोनी तिराङ तिवी थोङ्दाङला लाका माकी, यिने चोवोला ज्यिवा खुर्नी सेम टेङ्बुकी लाका की। 23 ख्यिरा काङ किसिनाङ मी थोक्ला क्यावु दोके मिन, यिने चोवोला क्यावु दोके सेमगी दिङ नेज्युनी लाका किसा। 24 नासाम तोङ, चोवोकी ख्यिराङला थाक्छ्येन नङ्गुप छ्यक्तक नङ्गिवी सिरुप ति छ्या राङ वे। चोवो येशू ख्रीष्ट ख्यिरा ज्यिन्दाक यिन। ख्यिरा खोला राङ शब्ज्यी कियी वे। 25 लाका मेलोवा कितुप सु यिन्सिनाङ तीला पर्च्या मेलोवा राङ फोकिवी। चोवोकी सुला साङ ख्ये मेबेवी।