1 “Maa ron, ñayiu ñuu Babilonia ja ka kuu ron na kuinio suchi siꞌi ndutu, ja ka kuu ron tatatnoꞌo caldeo,

manukuei te vi jinkoo ndee nuu ñuꞌu,

chi ma vi kotatnuni saꞌun ka ron,

te ni ma vi koxnani saꞌun ka ña suchi siꞌi yute vi suchi siꞌi vii.

2 Vitna te vi kakuiko molinu ron, te vi ndiko triu ron,

vi xtajioo saꞌun ndesi nuu ron, te vi kaneꞌe xioo ron,

te vi tavichi saꞌnda ron, te vi keneꞌe ndijan ron, te vi yaꞌa ron yute jian.

3 Te na tuu ndijin ja ka ndaa vichi ron, te na vi kuni jakanoo ron,

chi ndaxtenaa rin ñayiu, te ni in ñayiu ma kaku nuu ndaꞌa rin”,

kachi ia Dios.

4 Chi ia ja skaku niꞌnu ña jin ñayiu ñuu san Israel, nani ya Jeovaa, ia ndakui ndevaꞌa,

te maa ya kuu ia ii ñayiu Israel.

5 Te jiñaꞌa ya nuu ñayiu Babilonia:

“Vi jinkoo te ma vi kokaꞌan saꞌun ron, ja ka kuu ron na kuinio sesiꞌi ñayiu caldeo,

te kuaꞌankuei ñunee yun vi koo ron,

chi ma vi koxnani saꞌun ka ña ñayiu ka kuu nijaꞌnu ja ka tatnuni jin ron.

6 Chi ni kiti ini rin nuu ñayiu ñuu rin,

te ni jandetu rin ja ni ka saꞌa neꞌe ka saꞌa yichi ña jin,

te ni xndendoo rin jin nuu ndaꞌa ron.

Su tu ni ka kundaꞌu ini ron jin,

te ni ka jiñaꞌa ron tniuu ndee ndevaꞌa nuu ñayiu nijaꞌnu ñuu rin.

7 Te ni ka kachi ron: Siun ni vi kokuu nijaꞌnuo.

Su tu ni ka ndakani ini ron yaꞌa,

ni tu ni ka ndachikuaꞌa ron naxa kaa ja kokuu nuu na skundiꞌi.

8 Vitna te vi konini tnoꞌo yaꞌa, ja ka kuu ron ñayiu ka junkuaan ini jasii ini oo ñuyiu,

ja vi ka kukanu ini ndevaꞌa ron ja ka oo guaꞌa ron,

te ka kachi ron jin anu ron: Maa ni mao te tu na inka ñayiu inuu jion.

Maa ni yoon ma vi kendoo ndaꞌuo, te ni ma vi skiꞌon seꞌo, ka kachi ron.

9 Su ndi nduu tnundoꞌo yaꞌa, chi sanaa ni te kii nuu invaa ni kiuu,

te vi kendoo ndaꞌu ron, te vi skiꞌin ron seꞌe ron.

Chi xeen ndevaꞌa tnundoꞌo kii siki ron,

visi kuakuaꞌa tniuu tasi vi kuaꞌa javii ka saꞌa ron ja ka xndaꞌu ron ñayiu.

10 Chi ni ka kukanu ini ron jakueꞌe ka saꞌa ron yun,

te ni ka kachi ron: Ni tu na in ndiaꞌa ña.

Chi jandichi ron yun vi ja ka jini ron ni ka xndaꞌu ña jin ron.

Te ni ka kachi ron jin anu ron: Maa ni mao ka kuu,

te tu na inka ñayiu inuu jin mao.

11 Su kii jakueꞌe siki ron ja ma kuu vi kaꞌnu niꞌnu ron jin jatasi ka saꞌa ron.

Te junkau tnundoꞌo siki ron ja ma kuu naxa vi xtajioo ron.

Te sanaa ni, te kii in ja xnaa ña, in ja tu ka ndetu ron.

12 ’Su vi kosaꞌa ni ron tniuu tasi ja vi koxndaꞌu ron ñayiu vi kuakuaꞌa tinuu uꞌu vi kondasiaꞌa ron,

tniuu ja ka saꞌa ron ndee nuu lule ron.

Kondioꞌni a jiniuꞌu joo nuu ron

axi kondioꞌni a vi kundee ron ja vi siuꞌu ron ñayiu.

13 Chi ja ni ka kuita ron jin kuaꞌa ñayiu ja ka xteku ña jin ron.

Vitna te na vi ndututu tee ka jitotnuni ichi andivi,

vi ka skuaꞌa de siki kimi, vi ka kaꞌan de nagua kokuu nuu in in yoo.

Kondioꞌni a kuu vi skaku niꞌnu ña de nuu tnundoꞌo ja vaji siki ron.

14 Su ndiꞌi de ka kuu na kuinio ndayoꞌo,

te teñuꞌu ña ñuꞌu, te ma kuu vi kaku de nuu yaa ñuꞌu yun.

Te ma kendoo ñuꞌu tikayi ja vi ndasaa ñayiu,

ni yaa ñuꞌu ja vi jinkoo ñayiu vi ndasai.

15 Saa vi ndoꞌo tee tasi ron, tee ni ka osatniuu jin ron ndee nuu lule ron.

Te in in maa de kiꞌinkuei de ichi mamaa de,

te tu na in koo ja skaku niꞌnu ña jin ron”, jiñaꞌa ya.