1 Suaꞌa kaꞌan Jitoꞌo:

“Vi saꞌa guaꞌa te vi saꞌa ndaa,

chi ja oo yatni ja kenta kiuu ja skaku niꞌnu ña rin,

te vi kuni ron ja saꞌa ndaa ndaa rin”.

2 Te na taꞌu na ndetu ñayiu saꞌa siaꞌa,

te oo yutnui, te tavaꞌi kiuu ndatatu, te tu xtivi,

te jito guaꞌi mai ja ma saꞌi jakueꞌe.

3 Te ñayiu inka ñuu ja kiundui ichi Jitoꞌo, ma kaꞌin:

“Saꞌa siin ña Jitoꞌo jin san nuu ñayiu ñuu ya”.

Ni ma kokaꞌan tee ni nduu kapuu:

“Kuu san nani kuinio in yutnu yichi”.

4 Chi suaꞌa kaꞌan Jitoꞌo:

“Tee ni ka nduu kapuu ja ka tavaꞌa de kiuu ndatatu rin,

te ka saꞌa de nagua junkuaan ini rin, vi ka oo yutnu de jin tratu ni saꞌa rin,

5 te kuñaꞌa rin ini veꞌe rin vi ini muro rin ja vi kondee sivi de,

te kuñaꞌa rin in sivi guaꞌa ka saa ja vi koo seyii de vi sesiꞌi de,

te suni kuñaꞌa rin in sivi de ja vi koteku tnoꞌo de nikuii nikani, in ja ma naa saꞌun.

6 Te ñayiu inka ñuu ja vi kiunduu ichi rin ja vi kunukuechi nuu rin,

vi ja vi kokutoo ñai jin rin, vi kokunukuechi ñayiu nuu rin,

nuu ja ndiꞌi ka tavaꞌa kiuu ndatatu, te tu ka xtivi,

te ka oo yutnui jin tratu ni saꞌa rin,

7 te kondeka rin jin kiꞌin rin nuu yuku ii rin,

te saꞌa rin ja vi kosii ini veꞌe rin nuu ka ndakuatui,

te kuantaꞌu rin ja ka sokoi vi kiti ja ka teñuꞌi nuu altar rin,

chi veꞌe rin konani veꞌe nuu ka ndakuatu ñayiu ndiꞌi ñuu.

8 Te ndaxtutu ka rin ñayiu ñuu rin

jin sava ka ñayiu ka oo ii sava ka ñuu ja ni ndatau rin,

nagua ja na vi ndututui”,

kachi Jitoꞌo, ia ndaxtutu ñayiu Israel ja ni ka ndutenui sava ka ñuu.

9 “Neꞌekuei ndiꞌi ron ja ka kuu ron na kuinio kiti yuku

vi kiti xeen, te vi kaa ron.

10 Chi inu kuaa ndiꞌi tee ka jito ñayiu Israel, te tu ka jini saꞌun de,

te ndiꞌi de ka kuu na kuinio tiꞌina kuu ñiꞌi ja tu kuu jiaꞌan ti,

te ka nduei ni de, chi ka junkuaan ini de vi kusun de

vi ja vi jani de.

11 Te ka kuu de na kuinio tiꞌina ja ka kokin ndevaꞌa ti,

te ni ja tu ka ndutu chii ti.

Te ka kuu de tee ka jito ndikachi ja tu ka jinkuiꞌnu saꞌun ini de,

te in in de ni ka kiꞌin de ichi mamaa de,

te ndiꞌi de ka nduku de ja vi jinkoo vaꞌa mamaa de.

12 Te ka kachi de: Neꞌekuei ni na vi ndukuo vinu vi texeen,

te na vi koꞌo ndee vi jinio,

te suni saa ni vi saꞌo xtnee nagua ka saꞌo vitna,

axi saa vi saꞌa guaꞌa kao saa vitna, ka kachi de.”