1 Ja jaꞌa ñuu Sión ja kuu Jerusalén te ma kasi yuꞌu san,

ni maa kuita san guaa ndee na yeꞌe niꞌnu ja sandaa ñuu yun,

na kuinio nuu tuu ndii in kiuu

te yeꞌe niꞌnu ia skaku niꞌnu ña jin, na kuinio nuu yeꞌe iti suja ja kai tnu.

2 Saa te vi kuni ñayiu ja sandaa maa ron ja kuu ron Jerusalén,

te ndiꞌi tee ka kuu rey vi kuni ja yeꞌe niꞌnu ron,

te vi xnani ña ñayiu jin ron jin in sivi jaa ja taa maa Jitoꞌo.

3 Te kokuu ron na kuinio in corona vii ndevaꞌa nuu ndaꞌa Jitoꞌo,

axi na kuinio in xeꞌe ja ñuꞌu ndaꞌa ya.

4 Te ma vi xnani saꞌun ka ña ñayiu “ñuu ja ni kendoo uun”

ni ñuꞌu ja oo nuu ron ma vi xnani saꞌun ka “ñuꞌu ja ni ndondaꞌu”,

chi suaꞌa vi xnani ña jin ron “Hefzi-ba” ja kei kaꞌan “junkuaan ini ña rin”

te ñuꞌu ja oo nuu ron vi xnani “Beula” ja kei kaꞌan “ñaꞌa ni tnandaꞌa”

chi junkuaan ini ña Jitoꞌo jin ron,

te maa ya kokuu yii ñundeꞌi ron.

5 Chi nagua saꞌa in suchi yii ja tnandaꞌi jin suchi siꞌi ja ndita ndaꞌu jin,

te saa vi tnandaꞌa ron jin ia ni saꞌa ña jin ron.

Te nagua kusii ini teyii jin ñasiꞌi de, saa kusii ini ia Dios ron jin ron.

6 Te kachi ia Dios:

“Ndee siki muro ron, vi Jerusalén, ni jani rin tee ka jito ña jin ron,

te ni tnoꞌo nduu ni tnoꞌo jakuaa, ma vi kasi yuꞌu saꞌun de.

Te roon ja ka ndakakuneꞌe ña ron ja kuu rin Jitoꞌo ron,

ma vi junkuiin ron ja vi kana ron nuu rin,

7 ni ma vi kondetu ron guaa ndee na ndasaꞌa rin Jerusalén,

te saꞌa rin ja ndiꞌi ñayiu ñuyiu vi konee yiñuꞌu nuu ñuu yun”,

kachi ya.

8 Chi ni kee yuꞌu Jitoꞌo jin ndaꞌa kuaꞌa ya

vi jin jandakui ya, te kachi ya:

“Ma kuandetu saꞌun rin ja vi kaa ñayiu ka kaꞌan uꞌu ña jin ron triu ron,

te ni ma vi koꞌo ñayiu inka ñuu nduxi uva ja ka keneꞌe ron

nuu ka satniuu ndee ron.

9 Chi maa ñayiu ja ka ndaxtutu triu kuu ja vi kaa,

te vi ndasaꞌa kaꞌnu ñai jin rin.

Te maa ñayiu ja ka jaꞌnde uva kuu ja vi koꞌi nduxi ti nuu oo veñuꞌu rin.”

10 Vi yaꞌa ichi yuyeꞌe, te vi ndasaꞌa ichi nuu kikuei ñayiu ñuu rin,

te vi ndasaꞌa ndaa ichi yun, te vi xtajioo yuu nduei nuu ichi yun,

te vi kaneꞌe sukun saꞌun ii ja kuu in seña nagua ja na vi kuni ñayiu ndiꞌi ñuu ja na kikuei.

11 Suaꞌa kaꞌan Jitoꞌo jin ñayiu ka oo ndee jaꞌa ñuyiu:

“Vi kuñaꞌa nuu sesiꞌi ñayiu ñuu Sión:

Yaꞌa vaji ia skaku niꞌnu ña jin ron,

te nee ya ja skutaꞌu ña ya, te kuñaꞌa ya nuu ñayiu ñuu ya.”

12 Te xnani ña ñayiu jin ron “ñuu ii, ja ni ndatau ña Jitoꞌo”.

Te vi xnani ña ñayiu “ñuu ja kutoo ia Dios ja tu ni kendoo ndaꞌu”.