2
1 Ɛ mi a to,
xɛraan sigan tima geyane fari,
naxan fama xibaru faɲin na
naxan bɔɲɛ xunbenla a fe ralima.
Yuda kaane, ɛ sanle raba,
ɛ dɛ ti xuine rakamali.
Amasɔtɔ halagi tiin mi fa danguma ɛ konni.
A bata raxɔri fefe!
2 Niniwa kaane,
halagi tiine bata keli ɛ xili ma.
Ɛ yinna makantan,
ɛ yɛɛn ti kirane ra,
ɛ tagi xidi yɛngɛ so xinla ma,
ɛ fangan birin malan.
3 Amasɔtɔ Alatala mɔn binyen soma nɛn
Yaxuba bɔnsɔnne yii e nun Isirayila bɔxɔna,
hali halagi tiine to bata yi so na kaladeni
e yi e manpa binle ɲan.
4 Yaxu sofani itoe yɛ masansan wure lefane gbeeli.
E sofa wɛkilɛxine maxidixi dugi gbeele nin.
Wurene mayilenma e wontorone ma,
e na e yitɔn yɛngɛso lɔxɔn xili yi,
e yi tanbane tongo.
5 Yɛngɛ so wontorone e gima taan kirane xɔn han!
E gixin sigama yama malandene yi.
E mayilenma alo xaye xidi dɛgɛne,
e xulun alo kuye sarinna.
6 A bata a sofa yɛbaxine maxili,
koni e fama dagalanɲɛ ayi.
E e gima siga taan nabilinna yinna ma,
e luxun e yɛ masansan wurene bun.
7 Taan so dɛɛne bata rabi baan mabinni,
manga banxin fan birama.
8 Feen bata ragidi,
e bata taan muxune suxu,
e siga e ra konyiyani.
Taan konyi gilɛne yi lu kutunɲɛ
alo ganbane,
e siga e kanken makudunɲɛ sununi.
9 Niniwa taan luxi nɛn
alo ige sa sena
igen minima naxan na.
E a falama a muxu gixine xa,
e naxa, “Ɛ ti! Ɛ ti!”
Koni muxu yo mi xɛtɛma.
10 Ɛ gbetin tongo!
Ɛ xɛmaan tongo!
Nafunla na naxan mi ɲanma.
A sifan birin malanxi na yi.
11 Kalan nun halagin nun bɔnɔna!
Bɔɲɛne bata kala,
xinbine yi sin.
Fatine birin yi xuruxurun,
yɛtagine birin yi yitɔɲɔn.
12 Yatane sodeni ito luxi di,
dɛnaxan yi findixi yatadine dɛgeden na,
yatane nun e diine yi e gima dɛnaxan yi,
muxu yo mi e yikala?
13 Yatan yi subene faxama a diine xa,
a yi a se suxine kɔɛɛn bolon a gilɛɛn xa,
a luxunden nafe xɔɔyi seene ra
a soden nafe se suxine ra.
14 Alatala Sɛnbɛn Birin Kanna falan ni ito ra,
a naxa, “N bata keli ɛ xili ma!
N na ɛ yɛngɛ so wontorone ganma nɛn
e findi tutin na.
Ɛ banxulanne faxama nɛn silanfanna ra* Silanfanna: Sofane yɛngɛso dɛgɛmana.
alo yata sɛnbɛmane.
N danna sa ɛ se tongon na yɛngɛne yi dunuɲa yi.
Muxu yo mi fa ɛ xɛrane xuiin mɛma sɔnɔn.”