11
'Auvea tomotoga yadi bona 'aitamogana i sivilavilai bona fuedi i souyedi
1 Tutuya kumekumetana 'waineye, tomotoga matatabudi fwayefwayeye bonadi 'aitamogana 'wainega i veveifufu. 2 Tutuyanina tomotoga i yaba-vuvua i nunago inala yana 'eba laka 'wainega , nika tamu laube'u bwaikina i veluagai 'atamana Sina 'awalawa Babiloni bei i mia. 3 Bega ma ediavo i veifufu i vo, 'Wa maia, yada beliki*Beliki tamu vanuga 'ana 'eba 'aiyogona fwayafwaya dekudekuna 'wainega i na tutuya, 'ana 'isa 'wa da vo labia 'etobai 'aitamogana bani'odi. Mulieta i na yatoi i na lalana i na kabuni bega i na fa'alaotogi. Belikinidi 'adi 'eba dekufwatagi koluta bega yadi vanuga i yogoyogonidi. ta na 'idewadi wata ta na kabunidi i na fa'alidi.”Fai kileu kebu, Begaidi beliki 'wainega i 'aiyogona wata koluta 'wainega i 'idekudeku. 4 Matatabudi i veifufu i vo, 'Wa maia, 'asiau yada 'atamana bwaikina ta na 'idewai wata vanuga manamanawena ta na yogoni i na laka abame, nika 'ada wagava i na vebwaika bega kebu ta na yavula fwayafwaya matatabuna 'waineye.”
5 Tamu 'aiata, 'Auvea i obuma 'atamana bwaikina wata vanuganina manamanawena tomotoga i yogoyogoniga i na 'iseni. 6 Nika 'Auvea i vo, E'a, fai 'aila'a 'aitamogana wata bonadi 'aitamogana, begaidi ma 'aila'adi folovanidi i vevelamudi, wata folovanina i nuani i na 'idewaiga, 'waidie kebu vitanaga. 7 'Asa'aiana! ta na obu tomotoga bonadi 'aitamogana ta na sivilavilai i na vetuli bega bona fuedi i na souyedi, 'wainega ma ediavo i na ve'ibavubavu.” 8-9 Kumanina faifaina, 'Auvea tomotoga i luveyavulidi i nagoi fwayafwaya matatabuna 'waidie, we'e 'atamananina bwaikina i yogoyogoniga i 'ailove. Begaidi 'atamananina bwaikina i goleni Babeli, fai 'Auvea tomia fwayafwaya bonadi i sivilai bona tulina tulina i souyedi. Sauluvanina 'wainega, i luveyavulidi i nagoi fwayafwaya matatabuna 'waineye.
Semi 'ana wauma 'wainega Ebelamu i souyeni
10 De'e Semi tubunavo valadi.
Wayagata wata ufa bwaikina i 'a'ava, malamala 'ana veluga 'waineye, Semi 'ana malamala 100 i veluagai, natuna Afakisadi i tubuga. 11 Afakisadi i tubuga, mulieta Semi i miamia malamala 500, malamalanidi nagedie natunavo iavetadi wata vevinedi i tubuga.
12 Tutuyanina Afakisadi 'ana malamala 35 i veluagai, natuna Sila i tubuga. 13 Sila i tubuga i 'a'ava, Afakisadi i miamia malamala 403, malamalanidi nagedie, natunavo iavetadi wata vevinedi i tubuga.
14 Tutuyanina Sila 'ana malamala 30 i veluagai, Iba i tubuga. 15 Iba i tubuga, mulieta wata Sila i mia 'ana malamala 403 'waineye, natunavo iavetadi wata vevinedi i tubuga.
16 Tutuyanina Iba 'ana malamala 34 i veluagai, natuna Feliki i tubuga. 17 Feliki i tubuga, mulieta wata Iba i mia 'ana malamala 430 i veluagai, natunavo iavetadi wata vevinedi i tubuga.
18 Tutuyanina Feliki 'ana malamala 30 i veluagai, natuna Leu i tubuga. 19 Leu i tubuga, mulieta wata Feliki i mia 'ana malamala 209 'waineye, natunavo iavetadi wata vevinedi i tubuga.
20 Tutuyanina Leu 'ana malamala 32 'waineye, natuna Seluki i tubuga. 21 Seluki i tubuga, mulieta wata Leu i mia 'ana malamala 207 i veluagai, natunavo iavetadi wata vevinedi i tubuga.
22 Tutuyanina Seluki 'ana malamala 30 'waineye, natuna Naoli i tubuga. 23 Naoli i tubuga i a'ava, mulieta wata Seluki i mia 'ana malamala 200 'waineye, natunavo iavetadi wata vevinedi i tubuga.
24 Tutuyanina Naoli 'ana malamala 29 i veluagai, natuna Tela i tubuga. 25 Tela i tubuga i 'a'ava, mulieta wata Naoli i mia 'ana malamala 119 'waineye, natunavo iavetadi wata vevinedi i tubuga.
26 Tela 'ana malamala 70 i veluagai, natunavo Ebelamu, Naoli wata Elana i tubuga.
Tela yana 'aila'a
27 De'e Tela natunavo valadi. Tela natunavo side 'adi wagava, Ebelamu, Naoli wata Elana. Mulieta Elana natuna Lota i tubuga. 28 Bola tamana Tela i miamia, Elana yawaina i 'a'ava 'ana tuvada 'waineye, 'atamana Ula 'awalawa Kalidia nageneye. 29 Bei i miamia Ebelamu wata Naoli i nagi. Ebelamu yana vavine 'adi wagava Selai, we'e Naoli yana vavine 'adi wagava Milika. Vavinenidi Elana natuna, Milika wata Isika tamadi. 30 We'e Salai kakalidi, fai kebu 'adi fata i na veinainage.
31 Tamu tutuya 'waineye, Tela natuna Ebelamu, tubuna Lota Elana natuna, lawana vevinedi Selai natuna Ebelamu yana vavine, matatabudi Ula 'awalawa Kalidia 'wainega i tauya. Igodi i tauya i da nago 'awalawa Kenani siwe tutuyanina i le'wai 'atamana Elana, bei i mia. 32 Tela bola i miamia 'atamana Elana, 'ana malamala 205 i veluagai, nika i wafa.
*11:3: Beliki tamu vanuga 'ana 'eba 'aiyogona fwayafwaya dekudekuna 'wainega i na tutuya, 'ana 'isa 'wa da vo labia 'etobai 'aitamogana bani'odi. Mulieta i na yatoi i na lalana i na kabuni bega i na fa'alaotogi. Belikinidi 'adi 'eba dekufwatagi koluta bega yadi vanuga i yogoyogonidi.