12
'Auvea Ebelamu i venua'ivineni
1 Fol 7:2,3; Ibu 11:8Mulieta 'Auvea Ebelamu i voneni i vo, Yamu 'awalawa, yamu 'aila'avo wata tamamu 'u na 'iawedi 'u na nago fwayafwayanina a na vemuga 'waineye.
2 Tubumwavo fuedi a na velemu bega 'amu 'aila'a i na vebwaikaotoga.
A na vevesauluva 'atumaina 'waimuye wata
'Amu wagava a na 'ivebwaikaotogi
bega 'waimuyega tomotoga fueotogidi yadi 'atumaina i na veluagai.
3 Gal 3:8Egavo i na vesauluva 'atumaina 'waimuye, yau wata a na vesauluva 'atumaina 'waidie,
Wata egavo i na vesauluva sakoina 'waimuye, yau a na vematavulogidi.
We'e tomotoga 'adi 'aila'a tulina tulina fwayefwayeye yadi mia i na ve'atumai 'omu 'waimuyega.”
4 Ebelamu 'Auvea yana vona i vematayakeyakeni bega i tauya 'atamana bwaikina Elana 'wainega, taina natuna Lota taiadi. Tutuyanina 'waineye Ebelamu 'ana malamala 75 'akonadi i veluagai. 5 Ebelamu yana vavine Selai wata Lota i vagavaidi, yadi kukua 'atumaidi, yadi 'aisayavo wata yadi tofolova-maimaiga i 'ewadiga Elana 'waineye, matatabudi Elana 'wainega i tauya i nagoga i le'wa 'awalawa Kenani 'ana tugusa 'waineye.
6 Ebelamu ma yana 'aila'avo 'awalawanina nageneamo i nagoga 'ana tugusa 'atamana Sekemu i souyeni. 'Atamananina 'waineye tamu welavi bwaikina wata tabutabuna i tovotovoi 'ana wagava Mole. We'e me Kenani i miamiani 'awalawanina 'waineye. 7 Fol 7:5; Gal 3:16Mulieta 'Auvea i souyeni Ebelamu i voneni i vo, Tubumwavo 'waidie side fwayafwayanina a na veledi.” Fai 'Auvea i souyeni 'waineye begaidi Ebelamu kileu i didigi 'eba velomu 'Auvea 'ana subia faifaina.
8 I 'a'avana 'atamananina 'wainega i vaganago 'oya siaidi 'waidie, 'atamana 'ailuga Bedeli wata Ai kamwadie yana vadavada i tufeni, Bedeli inala yana 'eba inivayega we'e Ai inala yana 'eba lakayega, bei tamu 'eba velomu i didigi bega i 'odu 'Auvea 'waineye i subiai. 9 We'e 'atamananina 'wainega Ebelamu i tauya i yaba-vuvua i nunago 'awalawa Negevi weyaginega.
Ebelamu i nago Itifita
10 Tutuyanina 'waineye loka bwaikina i souyeni 'awalawanina 'waineye, begaidi Ebelamu i tauya i obu Itifita bei i na yogomia fai loka bwaikaotogina. 11 'Akonadi i velilivana sai'afoga i na luku Itifita, yana vavine Selai i vonedi i vo, A 'asetami 'omi 'ami 'isa 'atumaiotogina. 12 Tutuyanina ta na le'wa me Itifita i na 'isemi i na vo, No'o yana vavine,’ nika yau i na luvewafaku we'e 'omi i na 'ewami. 13 Nag 20:2; 26:7Begaidi 'wa na vonedi 'wa na vo, Yau novuna,’ nika 'omi faifaimi yau i na veianeku ma yawaiku a na miamia.”
14 Tutuyanina Ebelamu i le'wa, me Itifita Selai i 'isedi vavine 'adi 'isa 'atumaiotogina. 15 Kebu tutuya manamanawenaga Felo*Felo 'asa'aiana Itifita 'ana kini yana toveimea bwaikidi Selai i 'isedi, i nago Felo 'waineye vavinenidi i awave'atumaiedi bega i mai Selai i vagavaidi i nawedi Felo yana vanuge. 16 Felo Selai faifaidi Ebelamu ma'itufa i veianeni bega nani fuedi i veleni bani'odi sifi, bulumakau, kameli, doniki iavetadi wata vevinedi, wata yana tofolova-maimaiga iavetadi wata vevinedi, naninidi matatabuna i 'anivelenedi Ebelamu 'waineye.
17 Siwe Ebelamu yana vavine Selai faifaidi, 'Auvea viga sakoidi wata toketokedi Felo wata yana vanuga 'ana tomia matatabudi i veledi. 18 Nika Felo i veimea Ebelamu i mieni 'waineye bega i velutolieni i vo, Awale 'u vesauluva sakoina 'waikuye? Awale kebu 'u da vonekuga vavine de'e yamu vavine? 19 Awale 'u vo, Selai novuku?’ Faifainanina a vagavaia a mieni yaku vavine. Siwe 'asa'aiana, yamu vavine side, 'asiauotoga 'u na vagavaidi taiadi 'wa na tauya 'wa na nago.” 20 Bega Felo yana tofolovavo i luimilidi Ebelamu i veugeugeni, yana vavine wata yadi kukua matatabuna i kwekwedi taiadi i nagoi 'edeye i valovedi.