1 Tutuyanina 'waineye Ebelamu yana vavine Selai wata Lota taiadi yadi kukua matatabuna i 'ewadi Itifitayega i tauya i nagoga i le'wa 'awalawa Negevi. 2 Ebelamu i ve'ai'aiwabu bwaikina kukua fuedi 'waidiega bani'odiga siliba, golida wata 'aisaya tauvanuga.

3 Negeviega i tauya i nagoga i le'wa tumala tuatuaina 'waineye bagase bei yana vadavada i tufeni, Bedeli wata Ai kamwadie. 4 'Awalawanina 'waineye 'eba velomu kumekumetana basenadi i didigiga, nika bei Ebelamu i 'odu 'Auvea 'waineye i subiai.

5 We'e Lota, kumanina Ebelamu taiadi i yabayaba wata ma yana 'aisayavo sifi, goti, wata bulumakau we'e yana tomotogavo fuedi taiadi. 6 Ebelamu wata Lota yadi 'aisayavo fueotogidi we'e mosomoso yadi 'eba 'ani kebu bwaikinaga begaidi 'adi 'ailuga kebu 'adi fata 'awalawanina 'waineye i na mia. 7 Ebelamu yana 'aisayavo 'adi to'isave'avinavo wata Lota yana 'aisayavo 'adi to'isave'avinavo taiadi i ve'ikwayekwayega. We'e 'awalawanina 'waineye me Kenani wata me Felesi i bei i miamiani.

8 Bola i veve'ikwayekwayega bega Ebelamu Lota i voneni i vo, 'Ida dayaga 'aitamogana, kebu i da lubwaineda ta na ve'ikwayekwayega, wata bani'odi yamu tofolovavo wata yaku tofolovavo. 9 Bega 'asiau a vevelu'uiemu 'waikuyega 'u na mia'idi. 'Awalawa matatabuna yavuyavuna 'waimuye 'u na venua'ivina. 'Ai'edi 'amu 'atagiega 'u na nagoga, yau 'amu wamayega a na nago, we'e 'ai'edi 'amu 'eliega 'u na nagoga yau ma'itufa 'amu 'atagiega a na nago.”

10 Nag 2:10Lota i 'isadaba Ufa Iolidani laube'una i vetonovi i nagoga Soa weyaginega, i 'iseni 'awalawa 'atumaina ufa fuedi wata mosomoso 'atumaidi, 'wa da vo 'Auvea yana bakula Ideni 'alo 'awalawa Itifita. We'e tutuyanina 'waineye 'Auvea bola Sodoma wata Gomola kebu i da luvesavovolidi. 11 Tomotoganidi 'adi 'ailuga i mia'idi, Lota nuanuana Iolidani laube'una bega i obu i nago inala yana 'eba lakayega. 12 Ebelamu 'asa'aiana 'awalawa Kenani bei i miamia, nika Lota i tauya i obu Iolidani laube'uneye 'atamana bwaikidi 'waidie, we'e Sodoma lilivaneye i vebae'wa. 13 Me Sodoma yadi sauluva sakoidi, 'Auvea mataneye i sakosakona-vebogi.

14 Lota 'akonadi i tauya, mulieta 'Auvea Ebelamu i voneni i vo, Bei 'u tovotovoiga 'u na 'isadaba 'u na 'isanago yavalatayega wata bolimanayega, inala yana 'eba lakayega wata yana 'eba inivayega. 15 Fol 7:5Fwayafwayanina matatabuna 'u 'ise'iseniga a na velemu tubumwavo taiadi 'wa na ve'itulamuyeni yami 'eba veimea i na 'eno-vagata. 16 Tubumwavo fueotogidi a na velemu, wala'ai 'ana 'ilukulukuta bani'odiga, kebu tamu aitoi 'ana fata i na lu'iawawadi. 17 'Amu 'anivelena fwayafwayanina 'waikuyega, 'u na nago matatabuna 'u na vai'ali 'ana vebababa wata 'ana vemanawe.”

18 Mulieta Ebelamu ma yana tomotogavo i tovoi i nago 'awalawa Ebiloni, tamu tomogo 'ana wagava Mamile 'ana welavi bwaikidi wata tabutabudi lilivadie i vebae'wa nika bei 'eba velomu i didigi 'Auvea faifaina.