14
Ebelamu Lota i 'ita'ita'ieni
1 Tutuyanina 'waineye, kini 'adi 4 i veveimea inala yana 'eba laka 'wainega, side 'adi wagava, Amilafele 'awalawa Sina 'ana toveimea, Alioki 'awalawa Elasali 'ana kini, Kedolaoma 'awalawa Ilamu 'ana kini wata Kini Tidila 'awalawa Goimu 'ana 'ana toveimea, ma yadi tolugaviavo i va'auta i na vetalaga 'adi gaviavo taiadi. 2 'Adi gaviavo side 'awalawanidi 'adi toveimeavo, Kini Beila 'awalawa Sodoma 'ana toveimea, Kini Besa 'awalawa Gomola 'ana toveimea, Kini Sinaba 'awalawa Adema 'ana toveimea, Kini Semeba Seboimu 'ana toveimea wata Kini Bela 'awalawa Soa 'ana toveimea.
3 Kininidi 'aila'a 'ana veluga ma yadi tolugaviavo i maia ediavo taiadi i luvetubama Laube'u Sidimu 'waineye, tamu 'ana wagava Laube'u Eyaga Wafana. 4 Basenadi malamala 12 nagedie me Isileli i vetofolova Kini Kedolaoma 'waineye, we'e malamala 'ana ve-13 'waineye i vedumwe'ai'aieni.
5 Malamala 'ana ve-14 'waineye, Kini Kedolaoma 'ifwaidi kini taiadi i luvetubama bega 'aila'a 'ifwaidi taiadi i lugavia i vetoketoke- 'iawedi. 'Aila'anidi side, me Lifani 'awalawa Asitoleta-Kanaimu 'waineye, me Susaiti 'awalawa Ami 'waineye, me Emeli 'awalawa Save-Kiliataimi 'waineye, 6 wata me Owa 'atamana 'oya tabwaneye 'awalawa Seli 'waineye, wata i vaganago 'awalawa Eli-Felani sali'avu'avu lilivaneye, matatabuna 'awalawanidi taiadi i lugavia we'e i vetoketoke-'iawedi. 7 Mulieta i viladi i nagoi 'awalawa Eni-Misifati, tamu 'ana wagava Kadesi, me Amalakaiti yana 'eba veimea matatabuna wata bani'odi me Amolaiti, kumanidiavo i miamiani Asasoni-Tamali 'atamana 'waineye, matatabuna i tala'avui.
8 Tutuyanina 'waineye Sodoma 'awalawa 'ana kini, Gomola 'awalawa 'ana kini, Adema 'awalawa 'ana kini, Seboimu 'awalawa 'ana kini wata Bela 'awalawa 'ana kini, 'atamananina tamu 'ana wagava Soa, ma yadi tolugaviavo i tovoi i nagoi Laube'u Sidimu 'waineye, i 'idewadewa vetalaga faifaina. 9 Bega Kini 'adi 5 i i vetalaga kini 'adi 4 ma yadi tolugaviavo taiadi. Toveimeanidi side, Kini Kedolauma 'awalawa Ilamu 'wainega, Kini Tidila 'awalawa Goimu 'wainega, Kini Amilafele 'awalawa Sina 'wainega, wata Kini Alioki 'awalawa Elasali 'ana toveimea. 10 Laube'u Sidimu 'waineye, ovu fueotogidi nagedie koluta i 'eno'enovi, Sodoma wata Gomola yadi kini yana tolugaviavo taiadi i ve'aladegadega, 'ifwaidi i ve'alaonoonoga ovu nagedie, we'e 'ifwaidi i ve'aladegadega i nagoi 'oya siaidi 'waidie.
Ebelamu Lota i 'ita'ita'ieni
11 'Ifwaidi tutuya i a'ava, kini 'adi 4 ma yadi tolugaviavo taiadi i nagoi Sodoma wata Gomola i tala'avuidi bega yadi kukua wata 'ani'ani i vetuadi. 12 Ebelamu taina natuna Lota, Sodoma bei i miamiaga, tolugavianidi i 'ive'avini nani matatabuna taiadi i 'ewadi i nawedi.
13 We'e tamu Lota yana tomotoga 'waidiega i dega i mai Ebelamu kumanina tomogo Ibeliu 'waineye, gavianina faifaina i lu'ivona. We'e tutuyanina 'waineye Ebelamu i miamia Mamile tomogo Amolaiti yana welavi bwaikidi wata tabutabudi lilivadie. We'e Mamile ma tainavo Esikoli wata Aneli Ebelamu taiadi i veiana. Yadi veiananina 'wainega gavia 'ana tutuya 'waineye i luluvetubama nika ma fuedie i vevetalaga. 14 Ebelamu yana tolugaviavo 'adi 'aila'a 318, matatabudi i tubuga wata i vebwaika yana vanuge. Tutuyanina vala i nogai, Lota 'ana gaviavo i 'ive'avini, yana tolugaviavonidi i goleva'augidi bega mulidie i tala'wavinedi i nagoga 'ana tugusa Dani. 15 'Akonadi i lovani, Ebelamu yana tolugaviavo i 'ididi yadi 'aila'a tulina tulina 'waidie bega 'adi gaviavo taiadi i vetalaga nika i vetoketoke-'iawedi. Siwe 'ifwaidi i dega bega i lusogiedi i nagoiga 'atamana Oba 'waineye, 'atamananina Damasiko yavalatayega. 16 Naninidi 'adi gaviavo i 'ewadiga, matatabuna Ebelamu i veviladi, Lota, yana kukua, vevine wata 'ifwaidi tomotoganidi i yogonidiga taiadi.
17 Tutuyanina Ebelamu i vetoketoke-'iawediga, i vilai i mimai Sodoma 'ana kini i souyeni i yogo'ede'edeni, Laube'u Save 'waineye. 'Atamananina tamu 'ana wagava Kini yana Laube'u. 18-19 Ibu 7:1-10Mulieta Salema 'ana kini, taunina Yaubada Bwaikaotogina yana tovelomu 'ana wagava Melekisadeki beledi wata oine i miedi, bega Ebelamu i vona-nuakalikalieni i vo,
Yaubada Bwaikaotogina,
Abama wata fwayafwaya 'adi to'idewadewa
I da vevesauluva 'atumaina Ebelamu 'waimuye.
20 Yaubada Bwaikaotogina ta na subiai fai
Kininidi 'adi 4 ma yadi tolugaviavo i 'anivelenedi nimamuye, 'u leodi.”
Mulieta Ebelamu kukuanidi i 'ewadiga i 'idia 'etokwau 10 i yatodi we'e kwau 'aitamogana Melekisadeki i veleni.
21 Sodoma 'ana kini Ebelamu i voneni i vo, Yaku tomotoga 'ama gaviavo i 'ive'avinidiga, 'u na veviladi 'waikuye, we'e kukua matatabuna i na 'eno'eno taunimu faifaimu.”
22 Siwe Ebelamu i vona Sodoma 'ana kini 'waineye i vo, Yau a vona'awaufaufa 'Auvea Yaubada Bwaikaotogina mataneye, abama wata fwayafwaya 'adi To'idewadewa, kebu tamu nani 'a na 'ewai 'waimuyega. 23 Avinodi uya 'aitamogana 'alo 'amu 'ageyafayafa, siwe kebu i da lubwaineku a na 'ewadi, kukuanidi matatabuna 'omu faifaimu. 'Ai'edi a da 'ewadiga, 'ako 'u da vo, Yau kumaniku Ebelamu a 'ive'ai'aiwabuya.’ 24 We'e 'ani'aninidi yaku tolugaviavo tubuvauvaudi 'akonadi i 'aniga a tauyedi, wata tomotoganidi taiadi a nago vetalaga faifaina, Aneli, Esikoli wata Mamile 'adi veuveuta a tauyedi 'u na veledi we'e 'ifwaidi nani 'asa'aiadi.”