1 Tutuya 'ifwaidi i 'a'avana, Ebelamu i 'isa'isa nika 'Auvea i souyeni 'waineye i voneni, 'wa da vo bani'odi i da 'enoneganega i vo, Kebu 'u na kololo vita bwaikidi 'waidie fai yau yamu babala wata 'amu to'ita'ita'i, 'awaie 'amu tutula bwaikaotogina a na velemu.” 2-3 Siwe Ebelamu i tutula i vo, E'e 'Auvea Yaubada, tutulanina bwaikina 'u na velekuga, siwe ava'ai 'ana 'atumaina fai yau kebu natukuga, 'awaie a na wafa yaku tofolova Eliesa tomogo Damasiko tutulanina i na 'ewadi i na veimeyedi. 'Auvea 'u na nuani, kebu tamu natuku 'u da velekuga, yaku tofolova-maimaiga kukuanidi 'waikuye matatabudi i na 'ewadi wata i na veimeyedi.” 4 Nika wata 'Auvea i veifufu 'waineye i vo, De'e tomogonina yamu tofolova-maimaiga kebu tutulimuga, we'e bola taunimu natumu iavetana i na tubuga 'waimuyega, kumanina 'omu tutulimu.” 5 Lom 4:18; Ibu 11:12'Auvea Ebelamu i vagavaia i souyedi 'atamane i voneni i vo, 'U 'isalaka abame, 'ubwana 'u na 'isadewadi nika 'u na lu'iawawa-wayogedi. 'Asa'aiana 'awaie tubumwavo 'adi 'aila'a fueotogidi, lu'iawawa-wayoga.” 6 Lom 4:3; Gal 3:6; Iem 2:23Ebelamu i vetumagana 'Auvea yana vona 'waineye, yana vetumagananina faifaina i awave'atumaieni i vo, Yana sauluva matatabuna tonovidi matakuye.” 7 Wata 'Auvea i vo, Yau 'Auvea, kumaniku me Babiloni yadi 'awalawayega we'e 'atamana Ea 'wainega a vagavaimu 'u mai, de'e fwayafwayanina a na velemu 'u na vetoniwakeni.”

8 Siwe Ebelamu i vo, 'Auvea Yaubada, mogitana bani'odi a na munega fwayafwayanina a na 'asetai bega a na vetoniwakeni?”

9 Bega Yaubada i voneni i vo, Nuanuaku bulumakau vevinena, goti vevinena, sifi iavetana, matatabudi 'adi malamala 'aitonu 'u na miedi 'waikuye, bunebune wata kabututula manu-vauna.” 10 Bega Ebelamu 'aisayanidi matatabuna i luvewafadi. Mulieta 'aitamogana 'aitamogana i tutuvotagidi i 'a'ava, 'ewadi i lelega vi'ai 'ailuga 'waidiamo, we'e manuga kebu i da bobodi. 11 Mulieta manuyausibosibo i obuma 'aisayanidi bobobodi i da 'ani, siwe Ebelamu i sogiedi.

12 'Akonadi inala ininiva, Ebelamu matana i duduna-'afo'afo, i 'ufobala i 'enowafa, nika dudubala 'eba kololo i obuma i 'avuseni.

13 Sou 1:1-14; Fol 7:6I lovani 'Auvea i voneni i vo, 'U na 'aseta-'atumaia fai 'awaie tubumwavo i na vewakawaka tamu 'awalawa 'waineye bei i na vetofolova-maimaiga, we'e vitanidi bwaikidi i na veveluagadi malamala 400 nagedie. 14 Sou 12:40,41; Fol 7:7Siwe tomotoganidi i na veimeyediga bega i na vetofolova-maimaiga, yau a na vematavulogidi, mulieta tubumwavo yadi tauya 'waineye 'ai'aiwabu bwaikina i na 'ewadi i na souyedi. 15 We'e 'omu 'u na ve'auvea 'amu malamala i na vefueotoga mulieta ma yamu nuaniwalova 'wainega yawaimu i na 'a'ava i na ve'ufamu. 16 Tutuya de'e me Amolaiti bei i miamianiga kebu a na lu'wavinediga, nagamidi yadi sakona i na vevebwaika 'ana tugusa yaku 'etowava i na veluagai nika a na vematavulogidi. We'e 'omu tubumwavo i na miamiani tamu 'awalawa 'waineye, lakata 4 i na 'a'avana tubumwavonidi a na veviladi i na maia me Amolaiti yadi fwayafwaya i na 'ewai.”

17 Tutuyanina inala i niva, nika i dudubali, Ebelamu i 'iseni lufwa bwaikina i sousouyeni 'ai 'eba leva 'ana nau 'wainega, wata dukala magetana i 'awaiaia 'aisayanidi bobobodi 'awasasadiamo i le'wa i nago. 18 Tutuyanina 'waineye 'Auvea yana veakutagona i 'idewai Ebelamu 'waineye i voneni i vo, Tubumwavo faifaidi fwayafwaya de'e a 'a'aniveleneni 'waimuye, i velamu Itifita 'ana 'eda bala 'wainega i nago ufa bwaikina Iufiletisi 'waineye. 19 Fwayafwayanina 'akonadi me Kenaiti, me Kenisaiti wata me Kadimoni, 20 me Aiti, me Felesi, me Lifani, 21 me Amolaiti, me Kenani, me Gegasaiti wata me Iebusaiti i luvaia.”