16
Selai wata Ega
1 Tutuyanina Ebelamu i miamia 'awalawa Kenani, yana vavine Selai kebu tamu kwamana i da venatuneni, we'e Selai tamu yadi tofolova-maimaiga vavine Itifita 'ana wagava Ega. 2 Selai Ebelamu i voneni i vo, 'Auvea kebu i da tauyema 'a na venatuna, bega nuanuama 'u na nago yama tofolova Ega taiadi 'wa na veluaga, mulieta i na venatunaga, kwamananina 'asa'aiana 'a na 'ewai.” Selai yadi nuanuananina Ebelamu i nogai nika i awave'atumaieni. 3 Ebelamu i miamia Kenani malamala 10 nagedie, i 'a'avana Selai yadi tofolova Ega i vagavaia i 'aniveleneni yadi lamoga Ebelamu 'waineye, tamu yana vavine, we'e Ega kumanina vavine Itifita. 4 Ebelamu Ega taiadi i veluaga bega i veinainage, siwe tutuyanina Ega 'akonadi i 'asetai i miana ma yadi fwausa Selai i awavesakoyedi.
5 Bega Selai Ebelamu i voneni i vo, Vekali matatabuna i souyeniga, 'asa'aiana 'omu 'waimuyega. Fai yama tofolova-maimaiga 'a velemu, siwe 'akonadi i miana ma'itufa i awaobuobuyema. 'Auvea i na veda aitoi mogitana yana sakona, 'omu 'alo yau.”
6 Ebelamu i vonedi i vo, Vavinenidi yami tofolova-maimaiga, ava'ai 'wa nuani 'ami laubwaina, 'wa na 'idewai 'waidie.” Begaidi Selai ma yadi nuasako i vevesauluva sakoina Ega 'waidie, faifaina 'waidiega i dega.
7 'Auvea yana anelose Ega i veluagadi ufa-luluvuala lilivaneye sali'avu'avu 'waineye, ufanina Sula 'ana 'eda i nunago we'e lilivaneye. 8 Anelose i velutoliedi i vo, Ega, 'omi Selai yadi tofolova-maimaiga, ava'aiega 'wa mai wata ava'aibe bei 'wa na nago?” Ega i tutula i vo, 'Ama to'isave'avina Selai 'waidiega 'a degadega.”
9 'Auvea yana anelose i vonedi i vo, 'Wa na vilami 'ami toveimea 'waidie, bega yadi nuanua matatabuna 'wa na vematatyakeyakeni.” 10 Wata anelose i vonedi i vo, A vona mogitana 'waimie, 'ami wauma a na, 'ivefuei lu'iawawa-wayoga.”
11 Wata 'Auvea yana anelose i vonedi i vo,
'Omi 'akonadi 'wa miana,
natumi iavetana 'wa na venatuneni.
'Ana wagava 'wa na goleni Isimeli,
'ana 'aseta fai 'Yaubada yami 'we'wela i nogai'.
12 Natumi 'awaie bani'odi doniki walawala'ai,
tomotoga taiadi i na vevetalaga
wata matatabudi i na vedumwe'ai'aieni,
wata enavo matatabudi i na lu'idieni.”
13 Bega yadi nuanua i vo, Vona mogitana bola ma yawaimeye Yaubada 'a 'iseni!” Bega Ega tamu 'Auvea 'ana wagava i 'inanai i vo, 'Omu Yaubada kumanimu 'u 'ise'isema.” 14 Begaidi ufanina i goleni Bia Lai Loi, 'ana saivila, Kumanina Miamia-vagaina i 'ise'isema. Ufanina bola i 'eno'eno, 'atamana Kadesi wata Belidi 'adi 'edabala nageneye.
15 Bega Ega Ebelamu natuna iavetana i vetubugi, mulieta tamana 'ana wagava i goleni Isimeli.
16 Gal 4:22Ebelamu 'ana malamala 86 i veluagai mulieta Ega i venatuna, Ebelamu natuna i goleni Isimeli.