3 Tamu lovana 'waineye, Yaubada 'enoneganegayega i souyeni Abimeleki 'waineye i voneni i vo, 'Omu tomogonimu wafamu, fai vavinenidi 'u 'ewadi taiadi 'wa miamiaga, naginagidi.”

4 Tutuyanina 'waineye, Abimeleki bola kebu Sela tomogodi i da 'abitonovi, begaidi i vo, Ie 'Auvea, yau kebu yaku sakona, begaidi a vevelu'ui 'waimuye, kebu yaku 'aila'a taiadi 'u na luvela'ovima. 5 Ebelamo taunina i voneku, vavinenidi novuna wata taunidi bani'odi i voneku i vo, Ebelamo novudi’ Yaku venua'ivina 'asa'aiana tonovina, fai kebu tamu sauluva sakoina a da 'idewai 'waidie.”

6 'Ana ve 'waineye Yaubada i voneni i vo, E'e, i 'asetai kebu 'u da vekali, yamu venua'ivina 'asa'aiana tonovina. Begaidi a ve'isabodebodemu kebu 'u na sakona matakuye, wata kebu a da tauyemu vavine 'u na 'abitonovidi. 7 'Asiau vavine 'u na veviladi yadi lamoga 'waineye, fai taunina tamu yaku tolu'ivona, Yaubada iana magemagetana, i na velu'ui faifaimu bega kebu 'u na wafaga, ma yawaimu 'u na miamia. Siwe 'ai'edi kebu 'u na veviladiga, 'u na 'asetai 'omu wata yamu 'aila'a matatabumi 'wa na wafa.”

8 I 'atai 'awa'awaiogose, Abimeleki i tovoi yana tofolovavo matatabudi i goleva'augidi i lu'ivona 'waidie, naninina i souyeniga 'waineye faifaina. Tutuyanina yana veifufu i nogai, tomotoga matatabudi i kololo. 9 Abimeleki vala i vetunei nuanuana Ebelamo i na mieni 'waineye. Tutuyanina i le'wa, Abimeleki i velutoli i vo, Awale nani vitaotogina 'u 'idewai 'waimeye? Kebu a da vekaliemuga, siwe yau wata yaku 'aila'a taiadi 'a sakona bwaikina. Begaidi naninina 'u 'idewaiga Sauluva sakoiotogina, kebu i da lubwaineni tamu aitoi i na vetutuyameni.” 10 Wata Abimeleki Ebelamo i velutolieni i vo, Nani de'e 'u 'idewaiga, yamu lamuna mogitana ava'ai?”

11 Ebelamo i tutula i vo, Nani de'e a 'idewaiga, fai a vo 'ako 'awalawanina 'waineye Yaubada 'ana ve'ililibu kebu, wata yaku vavine 'adi nagi faifaina yamu tomotogavo i na 'ikasikasisi i na luvewafaku.’ 12 Vavine de'e 'asa'aiana mogitana novuku, fai tamama 'aitamogana, we'e inamavo tulidi. Siwe taiadi 'a nagi. 13 Tutuyanina Yaubada i goleku tamaku yana vanuga a 'iaweni a nago 'awalawa 'aitamogana 'aitamogana 'waidiamo, yama yaba faifaina a vonedi a vo, Ava'ai 'atamanaga 'waineye ta na le'wale'waga, nuanuaku bwaikina yami 'isanuakalikali faifaiku 'wa na nuanuani. Tutuyanina tomotoga i na 'isemi faifaimi i na vevelutoliga, 'wa na vonedi 'wa na vo, Yau Ebelamo novuna.’ ”

14 Bega Abimeleki yana sifi, 'ifwaidi goti, bulumakau, yana tofolovavo iavetadi wata vevinedi i 'ewadi i 'aniveledi Ebelamo 'waineye, wata yana vavine Sela i veviladi yadi lamoga 'waineye. 15 Wata Abimeleki i vo, 'U na 'isanago yaku fwayafwaya 'u na 'iseni, ava'aibe bei nuanuamu bei 'u na mia.” 16 Wata Abimeleki Sela i vonedi i vo, 'Wa 'iseku, novumi a veleveleni kileu siliba 'ana vebwaika 1,000 'aila'a matadie. De'e 'ami tuveobu a 'idewai, 'ai'edi ava'ai sauluvaga sakoina a na 'idewaiga 'waimie, faifaina. Wata velomu de'e a 'idewaiga, 'omi wata yau 'awasasadeye vita 'ana 'ewayavulagi faifaina.”

17 Mulieta Ebelamo i velu'ui Yaubada 'waineye, nika Yaubada Abimeleki yana vavine wata yana tofolova-maimaiga vevinedi 'adi vita i safaila, bega 'adi fata i na venatuna. 18 Fai basenadi naninina i souyeni Ebelamo yana vavine Sela 'waidie, vevine matatabudi Abimeleki yana vanuga 'ana tomia 'AUVEA yana veimea 'wainega i kakala.