27
Iso tubu'edakumeta 'ana 'anivelena Iakobo i vinagoi
1 Tutuyanina 'waineye Aisake 'akonadi i ve'auvea-'afo'afo matana i sako. Bega natuna tubu'edakumeta Iso i goleni i mai i voneni i vo, Natuku.” Iso i vo, Tamaku, yau side.”
2 Aisake i vo, Yau 'akonadi a ve'auvea-'afo'afo, kebu a da 'asetaiga ma'avia a na wafa. 3 Yamu 'eba yaubani tufu 'u na 'ewadi, 'u na nago wala'aie tamu 'aisaya faifaiku 'u na loveni. 4 'Aku'aku 'u na 'idewai 'u na mieni 'waikuye a na 'ani, i na 'a'avana a na velu'ui 'Auvea 'waineye i na vesauluva 'atumaina 'waimuye wata tubu'edakumeta 'amu 'anivelena 'waikuyega 'u na 'ewai, mulieta a na wafa.”
5 Aisake i veifufu natuna Iso 'waineye Libeka i vivinenegeni. Tutuyanina Iso i tauya wala'aie 'aisaya yaubani faifaina, 6 Libeka i vona natudi Iakobo 'waineye i vo, 'A na vonemu. Bagase tamamu i veifufu Iso 'waineye i vo, 7 Tamu 'aisaya wala'aiega 'u na mieni, 'aku'aku 'u na 'idewai a na 'ani bega a na velu'ui faifaimu 'Auvea mataneye mulieta a na wafa.’ 8 Natuku, yama veifufu 'u na nogayadewai bega ava'ai 'a na vonemuga 'u na 'idewai. 9 Nuanuaku 'u na nago 'aisaya yadi vadabaweye goti siaidi 'ailuga 'atumaidi 'u na miedi 'waimeye, bega 'ani'ani 'iwanina a na 'idewadewadi tamamu yana nuanua bani'odi. 10 Mulieta 'ani'ani 'u na naweni tamamu 'waineye i na 'ania, nika bei i na velu'ui faifaimu i na vevesauluva-'atumaina 'waimuye mulieta i na wafa.”
11 Iakobo inana Libeka i vonedi i vo, 'Wa na 'asetai tataku Iso tomogo 'olo'olona, we'e yau tomogo 'atumaina. 12 'Ai'edi tamaku i na 'abitonoviku, bega i na 'asetai yau a vevekali 'ako kebu 'ana fata i na vona-nuakalikalieku, we'e mogitana i na awavesakoyeku.”
13 Siwe inana bonana i tutuli i vo, Natuku, awavesakonina i da mai 'waimeye, yau vematavuloga 'a na tovoieni. Ava'ai 'a na vonemuga, 'u na vematayakeyakeni 'u na nago goti 'u na miedi.”
14 Bega Iakobo i nago goti natudiavo i miedi inana i veledi, mulieta Libeka 'ani'ani 'atumaina wata 'iwanina i 'idewai Aisake yana nuanua wata yana 'eba sosoana bani'odi. 15 Mulieta Libeka Iso 'ana talauma 'atumaidi i mieni vanugayega, Iakobo i veleni. 16 Nimana wata 'odona i baniumadi goti vutuvutudi 'waidiega. 17 I 'a'avana, Libeka 'ani'ani 'atumaina wata 'iwanidi beledi i kabunidiga taiadi Iakobo i veleni.
18 Bega Iakobo 'ani'aninina i mieni tamana i veleni i vo,
Tamaku” Aisake i vo, Natuku, we'e 'omu aitoi, Iso 'alo Iakobo?”
19 Iakobo i vo, Yau yamu tubu'edakumeta Iso, yamu nuanua a vematayakeyakeni. 'Aisaya side a mieni 'waimuye. 'U 'isa, 'u miabui 'u 'ani bega yamu vona-nuakalikali 'u na veleku i na vevesauluva 'atumaina 'waikuye.”
20 Aisake natuna i velutolieni i vo, Natuku, bani'odi 'u munega bega 'aisaya 'u veluagai, 'u le'wa-matayo'o?”
Iakobo i vo, 'Auvea yamu Yaubada i 'ivaiseku nika yaubani 'atumaina a 'idewai.”
21 Mulieta Aisake Iakobo i voneni i vo, Nuanuaku 'u na mai lilivakuye a na 'abitonovimu bega a na 'asetai 'omu mogitana Iso 'alo aitoi?” 22 Bega Iakobo i vaganago tamana i 'abitonovi i vo, Bonamu Iakobo 'ana nogaya bani'odi, we'e nimamu 'wa da vo Iso nimana.” 23 Siwe Aisake Iakobo kebu i da 'isa'inanai, fai Iso nimana 'olo'olona. Begaidi Aisake i 'idewadewa Iakobo i na vesauluva 'atumaina 'waineye. 24 Nika i velutolieni i vo, 'Omu mogitana natuku Iso?” I vo, 'Asa'aiana yau.”
25 Bega Aisake i vo, Natuku, 'aisayanina 'u mieni a na 'ania nika yaku vona nuakalikali a na velemu.” Iakobo tamana Aisake 'ana'ana i veleni i 'ani wata oine i yemu. 26 Mulieta Aisake Iakobo i voneni i vo, Natuku, 'u mai lilivakuye 'u 'avalamaigiku.”
27 Bega Iakobo i nago tamana lilivaneye i 'avalamaigi, Aisake 'ana talauma i yaogi nika i awavemogitaneni, bega i velu'ui natuna faifaina i vo, 'Auvea i da i vesauluva 'atumaina 'waimuye, magaimu yaoga 'atumaiotogina 'wa da vo tamu 'aisaya wala'ai magaina bani'odi.
28 Nuanuaku Yaubada numula abamayega
wata fwayafwaya 'ai'aiwabuna 'wainega,
'ani'ani wata oine 'atumaidi i da velevelemu.
29 Nuanuaku tomotoga 'adi 'aila'a tulina tulina i da vetofolova
wata i da 'odu'odu 'waimuye.
Nuanuaku tatamwavo, matatabudi 'u da veveimeyedi
we'e inamu natudiavo ma yadi ve'ililibu i da 'odu'odu 'waimuye.
'Ai'edi aitoi i na awavesakoyemu, kumanidiavo i da awavesakoyedi.
We'e aitoi i da vesauluva 'atumaina 'waimuye,
Yaubada wata i da vesauluva 'atumaina 'waidie.”
30 Aisake yana vona-nuakalikali Iakobo 'waineye i ve'a'ava i tauya nika Iso i le'wa wala'aiega 31 Iso 'ani'ani 'atumaina i 'idewai i mieni tamana 'waineye, i voneni i vo, Tamaku, 'u tovoi 'u miabui 'aisaya mieniga 'u 'ania bega 'u na vesauluva 'atumaina 'waikuye.” 32 Nika Aisake i velutolieni i vo, 'Omu aitoi tomogoga?” Iso i vo, Yau natumu yamu tubu'edakumeta, Iso.”
33 Aisake yawaina i lovoga i vo, Vetuma aitoi 'aisaya i veleku a 'ani, wata faifaina a velu'ui Yaubada 'waineye i na vesauluva 'atumaina 'waineye? A vona mogitana vona-nuakalikalinina i na 'eno-vagata.”
34 Tutuyanina Iso tamana yana vona i nogai i toke i taibwaubwau i vo, Tamaku, we'e yau bani'odi? Nuanuaku wata 'u na vesauluva 'atumaina 'waikuye.”
35 Siwe Aisake i vo, Taimu vekaliega 'amu vona-nuakalikali i 'ewai.” 36 Iso i vo, 'Ana wagava Iakobo 'ana 'aseta Tovekali, fai 'akonadi tutuya 'ailuga i vekalieku. Nagami tubu'edakumeta 'aku veuveuta i 'ewai, we'e 'asiau 'aku vona-nuakalikali i 'ewai. I lubwaineni 'u da vesauluva 'atumaina 'waikuye, tamu 'amu veuveuta 'wainega 'u da veleku.”
37 Aisake i vona Iso 'waineye i vo, Yau Iakobo a venua'ivineni i na vetoveimea 'waimuye wata enavo matatabudi a vonedi i na vetofolova-maimaiga 'waineye. Wata a vona'awaufaufa 'waineye 'ani'ani wata oine bwaikina faifaidi a veleni. Natuku, mogitana kebu tamu luvegalala i da 'eno'eno bega a na velemu.”
38 Siwe Iso i vo, Tamaku, 'ai'edi vona-nuakalikali 'aitamogana 'wainega 'u da vesauluva 'atumaina 'waikuye? Yau wata nuanuaku 'u na vesauluva 'atumaina 'waikuye, tamaku.” I vona'a'ava nika Iso i taibwaubwau.
39 Tamana Aisake i voneni i vo,
Yamu mia matatabuna 'waineye
fwayafwaya yana 'ai'aiwabu 'wainega 'u na mia 'ani'ie,
wata numula abamayega kebu 'u na veveluagai.
40 Yamu mia matatabuna kefata 'u na vevefoloveni
we'e taimu 'waineye 'u na vetofolova-maimaiga.
Siwe tutuyanina 'u na vo,
A na 'etoyavuku,’ yana veimea 'u na geuya bega 'u na nago.”
Iakobo i dega i nago 'awalawa Fadani-Lami
41 Fai tamadi Iakobo i vona-nuakalikalieni begaidi Iso taina i vedumwe'ai'aieni. Bega Iso i velamu yana nuanuayega 'eda'eda i 'idewadi i vo, Nagami tamaku yawaina i na 'a'ava a na mogaia, mulieta Iakobo a na luvewafai.”
42 We'e Libeka vala i nogai Iso yana nuanua faifaina bega vala i vetunei Iakobo i mai i voneni i vo, 'U na vainenega, Iso 'amu luvewafa 'ana 'eda i 'idewai bega 'ana mewa i na 'ewai. 43 Natuku, 'a na vonemu 'u na 'idewadewa, bega 'u na dega 'u na nago Elana novuku Lebani 'waineye. 44 Taiadi 'wa na miamia 'ana tugusa tatamu yana nuasako i na 'a'ava. 45 Tutuyanina nuana i na ve'atumai, wata ava'ai 'u 'idewai 'waineye nuana i na fani, mulieta vala a na vetunei 'u na mai. Ava'ai faifaina 'ami 'ailuga 'wa na wafa 'aiata 'aitamogana 'waineye?”
46 Mulieta Libeka Aisake i voneni i vo, Yau a 'abiawa me Aiti vevine yadi sauluva 'waidiega. 'Ai'edi Iakobo i na nagi tamu vavine Aiti 'wainega, a nuani voke sauluvanina 'wainega a na wafa.”