5 Tutuyanina Iakobo vala i nogai natuna vevinena Deina Sekemu i 'ivesakoi, siwe natunavo i nagoi gidegideye yadi 'aisaya i 'isave'avinidi, begaidi kebu tamu ava'ai i da 'idewai, i nagoga 'ana tugusa i viladi 'atamane. 6 Mulieta Emoli, Sekemu tamana i nago Iakobo 'waineye, nani de'e faifaina i na kiavetonovi. 7 Tutuyanina Iakobo natunavo wala'aiega i le'wai, valanina i nogai yawaidi i lovoga wata i nuasako-'afo'afo, fai novudi i vunugi i 'enoveni. Sekemu sauluva sakoiotogina i 'idewai Iakobo yana 'aila'a 'waidie, nani de'e i lubwaineni kebu i da 'idewai.

8 Bega Emoli i veifufu Iakobo ma natunavo 'waidie i vo, Natuku Sekemu vavine de'e nuana i 'ewaotogi, nuanuaku natumu 'u da tauyeni taiadi i da nagi. 9 Wata nuanuama nagi 'ana veimea ta na 'idewai. Natumiavo iavetadi 'wa na tauyedi natumavo vevinedi faifaidi, wata 'ima natumavo iavetadi 'a na tauyedi natumiavo vevinedi faifaidi. 10 Nika 'ami fata 'awalawa de'e 'waineye taidi ta na mia. Yama fwayafwaya matatabuna 'a tauyeni 'waimie. Bei taiadi ta na miamia ta na vevekimwane. Kebu tamu ve'etoboda 'waimie i da 'eno'eno, wata yavuyavumi kukua 'wa na kimwakimwane 'awalawa de'e 'waineye.”

11 Mulieta Sekemu taunina i veifufu Deina tamana wata novunavo 'waidie i vo, A vevelu'ui 'waimie 'ai'edi 'wa da sosoana, Deina 'wa da tauyemi a da nagia. 'Ai'edi ava'ai yami nuanua 'wa na velu'ui 'waikuye, vona mogitana a na velemi. 12 'Ai'edi kukua wata nuakalikali 'ana vebwaika 'wa na yatoiga, 'aku fata ma yaku sosoana a na tutuli. Begaidi vavine 'wa na tauyeni 'a na nagia.”

13 Fai 'akonadi Sekemu novudi Deina i 'ivesakoi begaidi Iakobo natunavo ma yadi nuasako, Sekemu ma tamana Emoli i yagaidi. 14 I vonedi i vo, 'Ima kebu novuma 'a da tauyeni, fai bunu 'aibobo kebu 'u da 'ewaiga. 'Ai'edi novuma 'u na nagia 'eba bunumayaga 'waimeye. 15 Yama nuanua side bani'odi a mieni 'waimie. 'Ai'edi iaveta matatabumi bunu 'aibobo 'wa na 'ewai, 'ima wata bani'odi bunu 'aibobo 'a 'ewai. 16 Mulieta 'ima natumavo vevinedi 'a na velemi wata natumiavo vevinedi 'a na nagidi. Nika ma fueda ta na mia 'aila'a 'aitamogana. 17 Siwe 'ai'edi bunu 'aibobo kebu 'wa na 'ewaiga, natuma 'a na vagavaia taiadi a na nago.”

18 Emoli wata natuna Sekemu yadi nuanua i awave'atumaieni. 19 Sekemu kebu i da vogavogana veimeanina i na 'idewaiga faifaina. Fai nuanuana bwaikina Iakobo natuna. Taunina tamu tomogo bwaikina ma 'ana ve'ililibu yana 'aila'avo 'waidie. 20 Bega Sekemu ma tamana Emoli i nagoi 'atamana 'ana 'awa 'eba luku 'waineye, to'edakumetavo 'waidie i veifufu veimeanina faifaina.

21 Tomotoganidi yadi sauluva 'atumaidi 'waimeye. Siwe ta na ta na tayegidi i na maia taiadi ta na miamia, yavuyavudi i na vevekimwane. Tomotoganidi 'a da fata taiadi ta na mia, fai yada fwayafwaya bwaikina, Natudiavo vevinedi ta na 'ewadi yada vevinevo wata natudiavo vevinedi wata iavetadi i na nagi 'waideye. 22 'Ai'edi tomotoganidi taiadi ta na mia 'aila'a 'aitamogana, iaveta matatabuda bunu 'aibobo ta na 'ewai tomotoganidi bani'odi. 23 'Ai'edi yadi nuanua ta na 'idewai, bola yadi 'aisayavo wata yadi kukua matatabuna 'ida ta na veimeyedi. 'Wa mai yada nuanua 'aitamogana 'wainega bega ta na tauyedi taiadi ta na mia.”

24 Tomotoganidi i miamiani 'atamana bwaikina 'waineye, Emoli wata Sekemu yadi nuanua i awave'atumaieni, bega iaveta matatabudi bunu 'aibobo i 'ewai. 25 'Aiata 'aitonu i 'a'ava, 'adi 'aibobo i vebonu bola i veveviga, nika Iakobo natunavo 'adi 'ailuga, Simioni wata Livai, Deina novunavo mogitana, ma yadi kefata i luku 'atamananina 'waineye bei kebu aitoi i da 'ikasikasisi, bega iaveta matatabudi i luvewafadi. 26 Wata bei, Emoli wata natuna Sekemu taiadi i luvewafadi kefata 'wainega, mulieta Sekemu yana vanuga 'wainega Deina i vagavaia nika i viladi yadi 'eba mia 'waineye.

27 We'e Iakobo natunavo i viladi i maia, tomotoganidi i luvewafadi i na 'isedi, bega 'atamananina matatabuna i kwekwei fai novudi i 'ivesakoi. 28 Mulieta sifi, bulumakau, doniki wata kukua 'ifwaidi i veluagadi 'atamana nageneye wata tanoga 'waidie ma yadi nuasako i 'ewadi. 29 Yadi kukua matatabuna i lukwekwedi, yadi vanuga i luvela'ovidi, yadi vevinevo wata natudiavo taiadi i 'ive'avinidi i nawedi yadi tofolova-maimaiga.

30 Mulieta Iakobo Simioni wata Livai i vonedi i vo, 'Omi yami sauluva sakoina 'wainega 'ada gavia 'wa'wayami i mai 'waideye. Me Kenani wata me Felesi 'awalawa de'e 'waineye i na vegavieda. 'Ida kebu 'ada 'aila'aga siwe 'ai'edi waumanidi i na luvetubama i na maia taiadi ta na vetalaga. Bega yau wata yaku vanuga 'ana tomia matatabuna i na 'u'umida.”

31 Siwe natunavo ma yadi nuasako yana vona i tutuli i vo, Awale novuma i 'ive'avini 'wa da vo, tamu vavine toalagogona bani'odi?”