3 Siwe Iuda tamana i voneni i vo, Tamaku, Itifita 'ana toveimea yana veimea toketokena i velemaga i vo, 'Ai'edi taimi kebu taiadi 'wa na maiga, kebu wata maigimi a na 'ise'iseni.’ 4 'Ai'edi Beniamina 'u na tauyeni taiadi 'ana nagoga, matatabuma 'a sosoana 'ana nagoi 'ada'ada moso'ina 'ana kimwane. 5 We'e 'ai'edi Beniamina kebu 'u na tauyeniga, 'ima wata kebu 'a na nagoga, fai tomogonina yana veimea toketokena i velemaga, i vo, 'Ai'edi taimi kebu taiadi 'wa na maiga, kebu wata maigimi a na 'ise'iseni.’ ”

6 Iakobo natunavo i vonedi i vo, Ava'ai faifaina vita bwaikina 'wa mieni 'waikuye? Wata awale tomogonina 'wa voneni 'wa vo, Taima tamu i miamia?”

7 I voneni i vo, tomogonina i toke i velutolitoliema 'omu wata 'ima faifaima i vo, Tamami bola ma yawaina i miamia?’ Wata i velutoliema i vo, Taimi tamu i miamia?” Mogitana yana velutoli 'a nogayeni. 'Ai'edi nagami i da vonemaga, 'ako kebu yana velutolinina 'ada nogayeni’ ”

8 Bega Iuda tamana i voneni i vo, Kwamana 'u na tauyeni ma 'aila'ama a na nagoi, nika kebu 'ana fata wafa i na souyeni 'waideye, 'omu wata natumavo 'waidie. 9 Yau 'aiseotogiku Kwamananina a na ve'isabodebodeni. 'Ai'edi kebu taiadi 'ana vilamaga 'waimuye, yau 'ana vita matatabuna a na tovoieni, we'e 'u na veimeyekumo. 10 'Ai'edi nagami 'ada vonemu bega taima 'u da tauyeni taiadi 'ada nagoga, de'e 'ana veluga wata 'ada vilama.

11 Bega natunavo i vonedi i vo, 'Ai'edi yana vona'awaufaufanina bola toketokena i na 'eno'enoga, tamu 'eda'eda 'wainega ta na nua'ania. Side bani'odi 'wa na 'idewai. Nani 'ifwaidi 'atumaidi yada fwayafwaya vuagina 'wainega, yada 'anivelena tomogonina faifaina 'wa na 'idewadi yami venuane 'wa na dodogidi, 'wa na nawedi 'wa na veleni. Naninidi bani'odi mai'awa wata 'ifwaidi bunama magaidi 'atumaidi. 12 Wata kileunidi i veviladi yami venuane i dodogidi, 'wa na 'imoso'iedi 'wa na 'wa na veleni. 13 We'e taimi 'wa na vagavaia 'wa na vilami 'wa na nagoi tomogonina 'waineye. 14 'A vevelu'ui faifaimi, nuanuaku Yaubada Tomia abama yadi tovemata'ai'ai i na 'isanuakalikaliemi, bega tomogonina 'waineye 'wa na le'waga, Simioni i na 'etoyavuya we'e Beniamina i na vevilai taiadi 'wa na mai. We'e 'ai'edi natukwavo i na wafaga, yau 'asa'aiana 'aiseku.

15 Iakobo i veifufu'a'ava, natunavo yana nuakalikali i 'idewai kileunidi i viledi i taiadi i luvetubami, mulieta Beniamina taiadi i tauya. Tutuyanina i le'wai Itifita, taunidi i nawedi i sivemagesedi Iosefa 'waineye. 16 Tutuyanina Iosefa Beniamina i 'iseni taiadi i maia, yana vanuga 'ana tomia yadi to'edakumeta i voneni i vo, Tomotoganidi 'asiau 'aiata 'ana utukamwana 'waineye taiadi 'ana 'ani. Nuanuaku 'wa na vagavaidi 'wa na lukuvedi yaku vanuga nageneye, mulieta 'aisaya 'u na nikei 'ani'ani bwaikina 'u na 'idewai lavilavie taiadi 'ana 'ani.” 17 Bega tomogonina Iosefa yana veifufu matatabuna i vematayakeyakeni, i nawedi Iosefa yana vanuge.

18 Tutuyanina i le'wa yana vanuge, matatabudi i kololo'afo'afo, fai i nuani i vo, 'Ida ta maiga yana vanuge, fai yada mai kumekumetana 'waineye, yada venuana 'waidie kileu i veviladi. Voke nuanuana taiadi ta na vetalaga i na vetoketoke'iaweda, bega yada 'aisaya i na 'ewadi we'e 'ida ta na vetofolova-maimaiga 'waineye.

23 Yana vanuga 'ana to'isave'avina i vonedi i vo, Kebu 'wa na kolologa. Yami Yaubada, kumanina tamami yana Yaubada, 'ai'aiwabu i dodogidi yami venuana 'waidie. A 'asetai, yami kileu 'ani'ani 'adi tutula faifaina 'akonadi a veluagadi.” I vona'a'ava, Simioni i yavuya i souyeni i nago enavo 'waidie.

24 Mulieta vanuga 'ana to'isave'avina tomotoganidi i nawedi Iosefa yana vanuge, ufa i veledi 'agedi i lekoadi wata doniki 'adi'adi i veledi. 25 Yadi 'ani faifaina 'akonadi i vonedi, 'ako Iosefa yana vanuge i na 'ani. Fai i 'asetai Iosefa lavilavie i na le'wa, begaidi yadi nuakalikali i 'idewavagasedi i 'eno'enovi.

26 Tutuyanina Iosefa i le'wa vanuge, nuakalikalinidi i 'ewadi i 'anivelenedi Iosefa 'waineye, mulieta tugatugadi i vetufano'uyedi fwayefwayeye, ma yadi ve'ililibu i 'odu 'waineye. 27 Mulieta Iosefa i vona-vekaiwa 'waidie i 'a'ava, wata i velutoliedi i vo, Tamami 'au'auveana 'wa da 'asetai, kumanina faifaina 'wa veifufuga, bola ma yawaina i miamia?”

28 I vo, E'e, tamama yamu tofolova i miamia ma yawaina.” Nika ma yadi ve'ililibu i 'odu-vaitugana 'waineye.

29 Iosefa i miabui enavo i 'isa-'atumaidi nika taina Beniamina i 'iseni, taunina inana natudi, i velutoliedi i vo, We'e taimi 'ami 'walaboda, kumanina faifaina nagami 'wa veifufuyeni 'waikuye?” Wata Iosefa i vo, Natuku, nuanuaku Yaubada i na vevesauluva 'atumaina 'waimuye.” 30 Iosefa nuana i vita mogitana taina faifaina, begaidi i luku yana tutudaba 'waineye i 'we'wela. 31 Mulieta maigina i lekoai i 'a'avana i vilai i mai, fai kebu nuanuana enavo i na 'asetai de'e iadi. Yana tofolovavo i vonedi i vo, 'Ani'ani 'wa 'wa maiedi.”

32 Tofolovavo Iosefa 'ana'ana i 'idewaiga yana talalia 'aisena, enavo yadi talalia wata 'aisedi, me Itifita i na 'aniga yadi talalia 'aisedi, fai 'asa'aiana bani'odi yadi sauluva, Ibeliu wata Itifita kebu taiadi i da luluvetubama. 33 Iosefa enavo 'aitamogana 'aitamogana i vemiabuidi yadi tubuga 'ana malamala 'waidiamo, yadi miabui tubu'edakumeta 'wainega i nago 'adi 'walaboda 'waineye. Yadi miabuinina 'wainega, matatabudi i veyawai-lovogidi, ma ediavo i vetunuvilavila. 34 Iosefa enavo 'adi'adi i tala'ewadi taunina 'ana talalia 'wainega, we'e Beniamina 'ana ta'ula 'adi 5 wata ma 'ana 'imoso'i i veleni enavo kebu taiadi i da vesala. Matatabudi yavuyavudi, i 'aniluvetubama wata i yemu ma yadi sosoana.