44
Iosefa 'ana vedi siliba
1 Tutuyanina Iosefa enavo i 'idewadewa i na tauya, yana vanuga 'ana to'isave'avina i voneni i vo, Yadi venuana 'aitamogana 'aitamogana 'waidie fekafeka 'u na veadagidi i na 'ewa. Wata yadi kileu 'u na dodogidi yadi venuana nagedie. 2 'Adi 'walaboda yana venuana 'awaneye, 'aku vedi siliba wata yana kileu fekafeka 'ana kimwane faifaina 'u na dodogi. Bega yana vanuga 'ana to'isave'avina i na nago Iosefa yana awave'eda'eda matatabuna i vetutuyameni.
3 Enavo i 'enoviladi 'awa'awaiogose, yadi kukua i ve dodogidi yadi 'aiyasavo 'waidie nika i vetauyidi. 4 I nunagoi 'atamana bwaikina bola kebu i da 'iaweniga, Iosefa yana vanuga 'ana to'isave'avina i voneni i vo, 'U na lilide mulidie 'u na talabodedi. Tutuyanina 'u na 'ubwasadiga, 'u na velutoliedi 'u na vo, Awale yaku nuakalikali a 'idewaiga 'atumaina 'waimie, we'e 'omi sauluva sakoina 'wainega 'wa tutula? 5 Ava'ai faifaina 'aku toveimea 'ana vedi siliba 'wa vinagoi? Fai vedinina 'wainega i vovona-vsamula tutuya i mimaiga faifaina. Naninina 'wa 'idewaiga, de'e sauluva sakoiotogina.”
6 Tutuyanina yana vanuga 'ana to'edakumeta i 'ubwasadi, 'ana toveimea yana veifufu i luvaitugani 'waidie.
7 Enavo i vo, Ava'ai mogitana faifaina 'u veveifufu?”'Ima yamu tofolovavo, kebu i da lubwainema bani'odi 'a na vesauluva 'waimuye. 8 Voke kileunidi yama venuana nagedie 'u veluagadiga, faifaidi 'u veveifufu? Kebu i da lubwainema 'amu toveimea yana kileu wata golida 'a na vinagodi yana vanuga 'wainega? 9 'Ai'edi 'ana vedi 'u na veluagai tamu iama 'waineye, tomogonina i na wafa, we'e 'ifwaima yamu tofolova-maimaiga.”
10 Vanuga 'ana to'isave'avina i vo, 'Atumaina, siwe a na vonemi, tomogonina vedi ivinagoiga, kumanina yaku tofolova-maimaiga.”'Ifwaimi yavuyavumi 'wa na nagoi.
11 Bega matatabudi i ve'abiwalowaloga yadi venuana 'aisaya kwavidiega i 'ewadi yavudi. 12 Vanuganina 'ana to'isave'avina yadi venuana 'waidie i lauala, i velamu tubu'edakumeta 'wainega i ve'a'ava 'adi 'walaboda 'waineye. Nika vedinina i veluagai Beniamina yana venuana nageneye. 13 Tutuyanina enavo matatabudi i 'iseni, 'adi talauma i silabu'idi. Mulieta yadi venuananidi i dodogidi doniki kwavudie nika i viladi i nagoi 'atamana bwaikina 'waineye.
14 Iosefa bola i miamia yana vanuge, nika enavo i le'wai, matatabudi i lumata'afufu fwayefwayeye i 'odu 'ageneye. 15 Iosefa i vonedi i vo, Ava'ai faifaina 'aku vedi 'wa vinagoi? Kebu 'wa da 'asetaiga, yau 'aku fata na vona-samula, nani 'ifwaidi souyeniga faifaina.”
16 Iuda i tutula i vo, Ie yaku 'auvea, kebu 'ama fata 'ana ve'awafatafata matamuye? Wata bani'odi 'ana munega 'ana kiavemagetai 'waimuye? Yama sakona faifaina kebu 'ama fata 'ana ve'ewa? Wata yama yogosako faifaidi, 'Auvea 'ama vematavuloga bwaikaotogina 'wainega 'a veveluagai. De'e yama vevelu'ui-nuakalikali yama 'auvea 'waimuye, kebu taima 'aisena vedi 'u veluagai yana venuane i na vetofolova-maimaiga, nuanuama matatabuma 'ana vetofolova-maimaiga 'waimuye.”
17 Iosefa i vo, Kebu 'ana fata tamu nani 'ana 'idewai! Tomogonina vedi ivinagoiga, kumanina 'aisena yaku tofolova-maimaiga. We'e matatabumi 'wa na vilami tamami 'waineye ma yami sosoana.”
Iuda enavo Faifaidi i veifufu
18 Mulieta Iuda i vaganago lilivaneye, i voneni i vo, Ie yaku 'auvea, ma yaku ve'ililibu a vevelu'ui-nuakalikali 'waimuye, 'ana fata yamu tofolova-maimaiga vona 'aitamogana i da 'inanai 'waimuye. Wata a vevelu'ui-nuakalikali, avinodi Felo taiadi yami veimea i ve sala, siwe kebu 'u na nuasakoyeku.
19 Yana tofolova-maimaiga i velutolieni i vo, 'Aku toveimea, 'omu ma tamamu wata ma taimu?’ 20 Yana velutoli a nogayeni 'a vo, E'e 'aku toveimea, 'ima ma tamama siwe 'akonadi i ve 'auvea, we'e natuna yana 'walaboda i tubuga. Tatana mogitana yawaina i 'a'ava, we'e inana natudiavo 'waidiega, 'aiseotogina i luvegalalai, siwe tamana i nuakalikalieni mogitana.’
21 Siwe wata 'u vonema 'u vo, Kwamananina 'wa na mieni 'waikuye, bega tauniotogina a na 'iseni.’ 22 Siwe 'ama toveimea 'ana vonemu, kwamana kebu 'ana fata tamana i na 'iaweni, 'ai'edi tamana i na 'iaweniga, i na wafa.’ 23 Siwe 'u vonema 'u vo, 'Ai'edi taimi 'ami 'walaboda kebu taiadi 'wa na maiga, kebu wata maigiku 'wa na 'ise'iseni.’
24 Tutuyanina 'a vilama 'a nagoi tamama yamu tofolova 'waineye, yamu veifufu 'a lu'ivoneyeni 'waineye. 25 Mulieta tamama i vonema i vo, Wata 'wa na vilami 'ada'ada 'wa na kimwane.’ 26 We'e yana vona 'a tutuli 'a vo, Kebu 'ana fata 'a na nago, nagami 'ama 'walaboda 'u na tauyeni mulieta 'ana nago. Fai i vonemaga kebu wata maigina 'ana 'ise'iseni, 'ai'edi 'ama 'walaboda 'u na tauyeni taiadi 'ana nagoga, i na sosoanema’
27 Mulieta tamama i vonema i vo, 'Akonadi 'wa 'asetai yaku vavine natudiavo iavetadi 'adi 'ailuga, 28 Tamu iana 'iaweda, i yogo-vagata. We'e tamu aigodi voke 'aisaya walawala'ai i silabulabu'i. Tutuyanina 'wainega i maiga 'asiau, kebu wata maigina a da 'ise'iseni. 29 'Asiau nuanuami wata taina 'waikuyega 'wa na 'ewai, 'ai'edi tamu vita i na souyeni 'waineye, tomogo nava'auna budubudulina ma yana nuavita 'wa na vetunei 'ana taumata 'waineye.’
30 Ie 'aku toveimea, 'Ai'edi kwamana kebu taiadiga, kebu 'ana fata a na vilaku tamaku 'waineye. Fai tamama yana sauluva natuna taiadi i vesala. 31 'Ai'edi natuna i na 'isa'a'avaiga, tamama i na wafa. 'Ana vita matatabuna 'ima yamu tofolova-maimaiga 'ana evai, we'e 'ima nava'auna budubudulina 'ana vetunei 'ana taumata 'waineye. 32 Ie 'aku toveimea, tamaku mataneye a vona'awaufaufa, kwamana a na 'i'isave'avini. Wata a voneni a vo, 'Ai'edi kebu taiadi 'ana vilamaga, 'ana vita matatabuna yau a na tovoieni.’
33 Wata 'aku toveimea, a vevelu'ui-nuakalikali 'waimuye, kwamana kebu i na vetofolova-maimaiga, yau 'ana vita a na tovoieni, we'e kwamana enavo taidi i na viladi. 34 'Ai'edi kwamana kebu taiadiga, bani'odi a na munega bega a na vilaku tamaku 'waineye? Kebu nuanuaku vita i na souyeni tamaku 'waineye a na 'iseni.”