5
Fɛnun pɛɛnɔn nɛn laji bɛ o Bali -le 'bla bɔa
1 "Bɛ -sru ɛn min nɛn 'e -nyrandɩ mingɔnnɛn pɛin -da bɛ, an 'fluba 'tʋ 'yɩ -a -pɛ "yi 'lɔ. 'Fluba zɩɛ e ya 'e plindɩ, ɛn 'wɩnun a 'e 'crɛn -tɛdɩ "man bei, ɛn e ya 'e 'crɛn -tɛdɩ -ji. Ɛn "nyian bɛ, -a -yrɩnan a 'sɔravli. 2 -A -nan nɛn Bali -le 'pasianɔn nɛn laji bɛ, maan 'plɛblɛ 'tʋ 'yɩ, te e -paanman wei 'plɛblɛ 'ji. Yaa laabʋ 'nan: «-Tɩɛ cɩ "le 'e 'fluba 'gʋɛ -a baanun "flu -e 'e 'lɛ 'sʋ?» 3 Min 'ka yɩlɛ laji dɩ, ɛn min 'ka yɩlɛ 'trɛda dɩ, ɛn min 'ka yɩlɛ 'trɛ 'wlu dɩ. Min -tʋ 'ka yɩlɛ -e 'e -kɔla 'e 'fluba zɩɛ -a "flu -e 'e yiɛ 'tɔ -ji dɩ. 4 'Wɩ zɩɛ, zɩ maan -nan 'yɩ bɛ, -a 'wɩ 'nan 'an man, ɛn an -wuɔdɩ 'sia. Kɔɔ min -tʋ 'ka yɩlɛ -e 'e 'fluba zɩɛ -a 'lɛ 'sʋ, -e 'e yiɛ 'tɔ -ji dɩ. 5 -A -nan nɛn min ceje -tʋ "e 'mɛn 'nan: «Te 'i 'wuɔ dɩ! -Jra nɛn 'e "sia Zuda -le kunnin -wulo da bɛ, David kluda min bɛ -a 'bɔ nɛn. E fɛ pɛɛnɔn klɩ, ɛn 'bɛ nɛn 'gʋɛ 'e -kɔlaman 'fluba 'labɛ -a -yrɩvɛ pɛɛnɔn "cɛɛndɩ -a -e 'e yiɛ 'tɔ -ji.»
6 Ɛn an fɛ -tʋ 'yɩ, e ya 'e 'tɔdɩ mingɔnnɛn pɛin 'lɛ. Min cejenun 'lee fɛnun sinjɛn bɛ waa si -fɔ. Bali -le 'bla nɛn. E ya "le fɛ nɛn waa -blɔ cɛɛn 'sraga -a bɛ -yee 'wɩ 'zʋ. -A 'bei a 'sɔravli, ɛn -a yiɛ a 'sɔravli. Yiɛ 'sɔravli zɩɛ Bali lei 'sɔravli "nɛn Bali o 'pa 'sia 'trɛda fɛ pɛɛnɔn 'nan bɛ, o 'bɔ nɛn. 7 'Bla zɩɛ e pli min nɛn 'e -nyrandɩ mingɔnnɛn pɛin -da bɛ -a man, ɛn e 'fluba 'si -a -pɛ "yi 'lɔ. 8 Zɩ e 'fluba 'bɔ 'si bɛ, 'nun tɔɔn ɛn fɛnun sinjɛn bɛ 'lee min ceje -yɔ -tʋ 'wlɛ sinjɛn bɛ, 'o "po sɔɔn "wlu. "Dre "fɔ "davɛ nɛn e ya "le -gɔɛdi -le 'wɩ 'zʋ bɛ, e ya o pɛɛnɔn 'lɔ. Ɛn -siga 'kulenɛn nɛn e ya 'e fadɩ -laziglɔ -a bɛ, e ya "nyian o pɛɛnɔn 'lɔ. -Laziglɔ zɩɛ minnun nɛn o cɩ Bali -le vɛ -a bɛ, -wee Bali trʋ 'badɩ nɛn. 9 -A -nan nɛn o "dre "trɛ -fɔdɩ 'sia. Waa -fɔa 'nan:
«-A -nɔan da nɛn i 'fluba 'sia,
'nan -e 'i -a -yrɩvɛnun "cɛɛn "man.
Kɔɔ yiɛ drɛ 'sraga bʋvɛ -a
'lɛglɔn -tʋdʋ pɛɛnɔn nɛn
'trɛda 'gʋɛ -a -ji minnun man,
'lee minnun nɛn
o wei -tʋdʋ pɛɛnɔn -fɔa
'trɛda 'gʋɛ o man.
'I nyɛn nɛn e -sran bɛ,
-a 'bɔ 'a nɛn i o ta pan 'wʋ Bali lɛ.
10 Yia drɛ zɩɛ
ɛn o drɛ Bali -le mingɔnnɛn trɛda 'nɔn 'a,
ɛn o drɛ Bali -pannɔn 'a,
'nan -e 'o -kaa "tɩ Bali 'su.
-Wɛɛ -taa "mingɔnnɛn -blɩlɛ
'trɛda fɛ pɛɛnɔn da.»
11 "Bɛ -sru ɛn Bali -le 'pasianɔn nɛn laji bɛ, an o "kaga 'yɩ. O ya "kaga, blamin 'ka 'kɔlaman -e 'e o "nrɔn dɩ. An o 'yɩ mingɔnnɛn pɛin "srɔn, o ya fɛnun sinjɛn 'lee min cejenun yei. An o wei 'man, 12 te o "dre -fɔa wei 'plɛblɛ 'ji. Waa -fɔa 'nan:
«Bali -le 'bla nɛn
waa -blɔ cɛɛn 'sraga bʋvɛ -a minnun man bɛ,
-a -nɔan da nɛn minnun -a ve 'nan,
'plɛblɛ a -yrɔ.
Ɛn -a -nɔan da nɛn minnun -a ve 'nan,
"yi pɛɛnɔn 'san nɛn.
Ɛn -a -nɔan da nɛn minnun -a ve 'nan,
'wɩ 'tɔdɩ pɛɛnɔn "sia "va.
Ɛn -a -nɔan da nɛn minnun -a ve 'nan,
-a lɔ nɛn "koe "cɩ.
Ɛn -a -nɔan da nɛn minnun -a ve 'nan,
'tɔ bɔdɩ a -yee vɛ -a.
Ɛn -a -nɔan da nɛn minnun -a ve 'nan,
'tɔ -dan a -yee vɛ -a.
Ɛn -a -nɔan da nɛn minnun -a ve 'nan,
'tɔ "yi "vɩdɩ a -yee vɛ -a.»
13 Ɛn "nyian fɛnun pɛɛnɔn nɛn Bali o drɛ bɛ, an o wei 'man te o "dre -fɔa. -A -mienun a laji, ɛn -a -mienun a 'trɛda, ɛn -a -mienun a 'trɛ 'wlu, ɛn -a -mienun a jemie -va. Waa -fɔa 'nan:
«Min nɛn 'e -nyrandɩ mingɔnnɛn pɛin -da bɛ,
'lee Bali -le 'bla bɛ,
-kaa o 'tɔ "yi "vɩ,
ɛn -kaa o 'tɔ bɔ,
ɛn -kaa o 'tɔ -dan vɩ,
ɛn -kaa vɩ o man 'nan
o ya 'plɛblɛ 'li 'trilii.»
14 -A -nan nɛn fɛnun sinjɛn bɛ, o wɩɩla "man 'nan: «Amɛn!» Ɛn min cejenun 'o "po sɔɔn, te waa bɔa.