1 Ri e taqoꞌn re ri Jesús kukꞌ ri hermanos e kꞌo Judea xkito e kꞌo na e ta aj judiꞌabꞌ xekojow re Rutzij ri Dios puwi ri Cristo. 2 Ruma kꞌu riꞌ, echiriꞌ xtzelej ri Pedro Jerusalem, ri hermanos e aj judiꞌabꞌ lik xkichap pa chꞌaꞌoj, 3 jewaꞌ xkibꞌiꞌij che: «¿Suꞌchak xatok pa kocho ri na e ta aj judiꞌabꞌ y xatwaꞌ ne kukꞌ?»*Chikiwach raj judiꞌabꞌ, jun kuchꞌulaj ribꞌ chwach ri Dios we kaqibꞌ rukꞌ junoq na utaqem ta ri kojobꞌal kiꞌke. xechaꞌ.

4 Ekꞌu ri Pedro xujeq utzijoxik chike chucholaꞌj suꞌanik xuꞌana waꞌ. Jekꞌuwaꞌ xubꞌiꞌij chike:

5 «E riꞌin in kꞌo pa ri tinamit Jope e riꞌ kanꞌan orar echiriꞌ xaqikꞌateꞌt xqꞌalajisax jun kꞌutubꞌal re ri Dios chinuwach. Waꞌ pachaꞌ jun nimalaj kꞌul ximital lo che ri kajibꞌ utzaꞌm, xqasax lo chilaꞌ chikaj kꞌa pa la in kꞌo wi riꞌin. 6 Echiriꞌ xintzuꞌ chi utz saꞌ ri kꞌo chupa waꞌ, xebꞌenuwil kꞌu awaj kꞌo kajibꞌ kaqan, itzel taq chikop re upa juyubꞌ, awaj kecharar pulew, yey ri kexikꞌikꞌ che ruwa kaj.

7 »Yey xinta kꞌu jun qulaj, jewaꞌ xubꞌiꞌij chwe: “Chatyaktajoq Pedro; chakamisaj y chatijaꞌ” xchaꞌ.

8 »Ximbꞌiꞌij kꞌu riꞌin: “Na kanꞌan ta kꞌana riꞌ, Wajawal, ma riꞌin na jinta kꞌana chꞌul o na taqal taj katijik okinaq pa nuchiꞌ” xinchaꞌ.

9 »Ekꞌuchiriꞌ, xchꞌaw tanchi lo ri jun qulaj chilaꞌ chikaj, jewaꞌ xubꞌiꞌij chwe: “Ri ujosqꞌim chi ri Dios, riꞌat mabꞌiꞌij chꞌul che” xchaꞌ.

10 »Waꞌ oxlaj xuꞌano. Tekꞌuchiriꞌ, ronoje xkꞌam tanchi ubꞌi chikaj.

11 »Chupa kꞌu laꞌ la joqꞌotaj xekꞌun oxibꞌ achijabꞌ chwa ri ja pa in kꞌo wi; rike e petinaq Cesarea, etaqom loq chaꞌ kinkitzukuj. 12 Ekꞌu ri Ruxlabꞌixel ri Dios xubꞌiꞌij chwe kinꞌek kukꞌ y muxiꞌij ne ribꞌ nukꞌuꞌx kinꞌek. Xinꞌek kꞌu riꞌ kukꞌ; yey waꞌ wa waqibꞌ hermanos e aj Jope e kꞌo wara wukꞌ, xojkachbꞌilaj bꞌi.

»Echiriꞌ xojopon Cesarea, xojok chirocho jun achi.†Waꞌchi e Cornelio. 13 Yey waꞌchi xutzijoj chiqe suꞌanik xril uwach jun ángel chirocho. Waꞌ xoꞌltakꞌal chwach rire y jewaꞌ xubꞌiꞌij che: “Chebꞌataqa bꞌi achijabꞌ pa ri tinamit Jope re keꞌkisikꞌij jun achi Simón rubꞌiꞌ, ri kabꞌiꞌx Pedro che. 14 Ekꞌu rire koluꞌbꞌiꞌij chawe suꞌanik katkolobꞌetaj riꞌat kukꞌ konoje ri ejeqel pa wocho” xcha ri ángel che.

15 »Yey, echiriꞌ riꞌin xinjeqo kinchꞌaꞌt kukꞌ waꞌ wa tikawex na e ta aj judiꞌabꞌ, xqaj ri Santowilaj Ruxlabꞌixel ri Dios pakiwiꞌ jelaꞌ pachaꞌ xujeqebꞌej loq echiriꞌ xqaj paqawi ri oj aj judiꞌabꞌ.

16 »Ekꞌuchiriꞌ, xkꞌun chinukꞌuꞌx rubꞌiꞌim kan ri Qanimajawal echiriꞌ xubꞌiꞌij: “Paqatzij wi, ri Juan xuya ri bautismo rukꞌ yaꞌ, noꞌj ri bautismo kikꞌul riꞌix e rukꞌ ri Santowilaj Ruxlabꞌixel ri Dios.”*Hch. 1:5

17 »Ekꞌu uwariꞌche, we ri Dios xuya chike rike wa sipanik jelaꞌ pachaꞌ ri xuya chiqe riꞌoj ri kubꞌul chi qakꞌuꞌx rukꞌ ri Qanimajawal Jesucristo, ¿in china riꞌin chaꞌ kanqꞌatej ri Dios che uꞌanikil waꞌ?» xcha ri Pedro.

18 Ekꞌuchiriꞌ xkita taq waꞌ, na jinta chi xkibꞌiꞌij chirij ri Pedro, e xkijeq kakiyak uqꞌij ri Dios, jewaꞌ xkibꞌiꞌij: «¡Uyaꞌom ne riꞌ ri Dios chike ri na e ta aj judiꞌabꞌ kakitzelej kitzij chwach chaꞌ jelaꞌ kꞌo kikꞌaslemal!» xechaꞌ.

19 Rukꞌ rukamik ri Esteban, xjeqer kiternabꞌexik rukꞌ kꞌax janipa ri kikojom rubꞌiꞌ ri Cristo. E taq kꞌu riꞌ waꞌ xekich bꞌi y xebꞌopon kꞌa chupa taq ri tinamit re Fenicia, re Chipre y ri tinamit Antioquía.‡“Antioquía”: E jun tinamit kꞌo Siria. Kꞌo jun chik tinamit “Antioquía re Pisidia”. Hch. 13:14-52 Yey xew xkitzijoj kan ri Utzilaj Tzij re ri Jesucristo chike ri e aj judiꞌabꞌ.

20 Chikixoꞌl kꞌu wa hermanos e kꞌo e aj Chipre y e aj Cirene. Ekꞌu rike echiriꞌ xebꞌok Antioquía, xkijeq kakitzijoj ri Utzilaj Tzij re ri Qanimajawal Jesucristo chike ri na e ta aj judiꞌabꞌ. 21 Yey ruchuqꞌabꞌ ri Qanimajawal lik kꞌo pakiwi rike. Lik kꞌu e kꞌi ri tikawex xkikoj rubꞌiꞌ ri Cristo y xkijalkꞌatij ri kibꞌinik.

22 Ri kikojom rubꞌiꞌ ri Cristo e kꞌo Jerusalem, echiriꞌ xkita waꞌ, xkitaq bꞌi ri Bernabé chaꞌ keꞌek kꞌa chilaꞌ Antioquía. 23 Echiriꞌ xopon ri Bernabé y xril ri unimal rutzil ukꞌuꞌx ri Dios kukꞌ ri kikojom rubꞌiꞌ ri Cristo, lik xkiꞌkot che. Y xebꞌupixabꞌaj konoje chaꞌ rukꞌ ronoje kikꞌuꞌx kakichuqꞌubꞌej kibꞌ chwach ri Qanimajawal.

24 Ri Bernabé e jun achi lik utz ukꞌuꞌx, ruchuqꞌabꞌ ri Santowilaj Ruxlabꞌixel ri Dios lik kꞌo rukꞌ y lik kꞌo kubꞌulibꞌal ukꞌuꞌx. Ruma kꞌu ruchak rire, lik e kꞌi ri tikawex xkikoj rubꞌiꞌ ri Qanimajawal Jesucristo.

25 Tekꞌuchiriꞌ, ri Bernabé xeꞌek pa ri tinamit Tarso re kuꞌtzukuj ri Saulo. Echiriꞌ xuriqo, xukꞌam lo Antioquía. 26 Xekꞌojiꞌ kꞌu kukꞌ ri tinamit re ri Cristo ronoje ri jun junabꞌ, e riꞌ kekꞌutun chikiwach ukꞌiyal winaq. Chiriꞌ kꞌu riꞌ, nabꞌe laj xbꞌiꞌx “cristianos” chike ri kikojom rubꞌiꞌ ri Cristo.

27 Chupa taq riꞌ laꞌ la qꞌij e kꞌo jujun eqꞌalajisay runaꞌoj ri Dios xebꞌel bꞌi Jerusalem y xebꞌopon Antioquía. 28 Kꞌo jun chike waꞌ, Ágabo rubꞌiꞌ. Rire xyaktajik y ruma ri Ruxlabꞌixel ri Dios, xuqꞌalajisaj kape jun unimal numik chwi ronoje ruwachulew pa ejeqel wi ri winaq. (Waꞌ xuꞌana chupa rutaqanik ri Claudio.)§Ri Claudio xkꞌojiꞌ nimalaj taqanel pakiwi ri taqanik re Roma chupa ri junabꞌ 41-53 D.C.

29 Ruma kꞌu waꞌ, ri kikojom rubꞌiꞌ ri Cristo e kꞌo Antioquía xkiyijbꞌaꞌ chikiwach chaꞌ kakitaq pan toꞌbꞌal chike ri hermanos ejeqel Judea; chikijujunal kꞌu riꞌ xkichꞌobꞌ raqan janipa ri kakiyaꞌo, waꞌ e chirij taq ri kꞌo kukꞌ. 30 Y jelaꞌ xkiꞌano; xkitaq bꞌi ri kiqasaꞌn pakiqꞌabꞌ ri Bernabé y ri Saulo chaꞌ kakikꞌam bꞌi Judea y kakiya chike ri e aj wach re riglesia.