1 Chupa taq kꞌu riꞌ laꞌ la qꞌij ri rey Herodes xebꞌutaq jujun soldados chaꞌ kekichap jujun chike ri kikojom rubꞌiꞌ ri Cristo re keyaꞌ pa kꞌaxkꞌobꞌik. 2 Yey xebꞌutaq che kakikamisaj rukꞌ espada ri Jacobo ri ratzixel ri Juan. Y ri soldados jelaꞌ xkiꞌano.

3 Ekꞌuchiriꞌ xrilo lik xukꞌul kikꞌuꞌx raj judiꞌabꞌ ri xꞌan che ri Jacobo, xutaq uchapik ri Pedro. Waꞌ xuꞌan chupa ri nimaqꞌij Pascua echiriꞌ katij ri pam na jinta levadura che.*Éx. 12:1-27 4 Ekꞌuchiriꞌ chapom chi ri Pedro, ri Herodes xutzꞌapij pa cárcel y xuya pakiqꞌabꞌ kajibꞌ mutzaꞌj soldados re kakichajij, yey wa soldados e kajkaj chujujunal mutzaꞌj. Ri xuchꞌobꞌ ri Herodes e kꞌate karesaj lo ri Pedro chikiwach ri winaq re ri tinamit echiriꞌ ikꞌowinaq chi ri nimaqꞌij Pascua.

5 Kꞌo kꞌu riꞌ ri Pedro pa cárcel lik chajital chi utz. Yey ri kikojom rubꞌiꞌ ri Cristo na kebꞌuxlan ta che uꞌanik orar chwach ri Dios puwiꞌ rire.

6 Chupa kꞌu raqꞌabꞌ chwach pan ri qꞌij echiriꞌ ri rey Herodes uchꞌobꞌom karesaj lo ri Pedro chikiwach ri tinamit, ri Pedro e riꞌ kawar chikixoꞌl kaꞌibꞌ soldados, ximital rukꞌ kaꞌibꞌ karena yuqul lo chike ri soldados. Yey pa rewi raj chajal e kꞌo chwach ri okibꞌal re ri cárcel.

7 Xaqikꞌateꞌt kꞌut xwinaqir jun ángel re ri Qanimajawal rukꞌ, yey jun aqꞌ lik xutzij upa ri cárcel. Ri ángel xuyuchꞌuyaꞌ ri Pedro pukꞌalkꞌaꞌx, xukꞌosoj y jekꞌuwaꞌ xubꞌiꞌij che: «Chatwaꞌlijoq, chawilij» xcha che. E taq kꞌu ri karena kꞌo che ruqꞌabꞌ ri Pedro xtzaqik.

8 Xubꞌiꞌij kꞌu ri ángel che: «Chaximilaꞌ bꞌi rakoton y raxajabꞌ» xcha che. Y rire jelaꞌ xuꞌano.

Xubꞌiꞌij tanchi ri ángel che: «Chakojo bꞌi raqꞌuꞌ re pisbꞌal awij y chat-tereja lo chwij» xcha che.

9 Ri Pedro xel bꞌi teran chirij ri ángel, tobꞌ na retaꞌam taj we qatzij ri kuꞌan ri ángel rukꞌ; ma chwach rire, laj xa wachikꞌ la katajin che rilik. 10 Xebꞌikꞌow kꞌu chikiwach ri nabꞌe mutzaꞌj e chajinel. Tekꞌuchiriꞌ, xebꞌikꞌow che rukaꞌm mutzaꞌj e chajinel y xebꞌopon kꞌu chwach ri okibꞌal ꞌanom rukꞌ chꞌichꞌ, waꞌ e ri kel bꞌi pa bꞌe chupa ri tinamit. Waꞌ wa okibꞌal utukel xjaqataj chikiwach y jelaꞌ xebꞌel bꞌi. Xebꞌin kꞌu jubꞌiqꞌ che ri bꞌe y xaqikꞌateꞌt ri ángel xuya kan ri Pedro utukel.

11 Kꞌa ekꞌuchiriꞌ ri Pedro xumaj usukꞌ na wachikꞌ ta ri kuꞌano. Xubꞌiꞌij kꞌu chiribꞌil ribꞌ: «Woꞌora paqatzij wi, kanmaj usukꞌ e ri Qanimajawal utaqom lo ru ángel wukꞌ. Jelaꞌ xinresaj puqꞌabꞌ ri rey Herodes y che ronoje ri kakaj kakiꞌan rukꞌiyal e aj judiꞌabꞌ chwe» xchaꞌ.

12 Ekꞌu laꞌ katajin waꞌ pujolom ri Pedro, xeꞌek chirocho ri María ruchu ri Juan, ri kabꞌiꞌx Marcos che. Chiriꞌ kimolom wi kibꞌ ukꞌiyal hermanos ketajin pa oración chwach ri Dios. 13 Echiriꞌ ri Pedro xuchꞌawisaj pan ri puerta re ruwa ja, jun ali aj chak Rode rubꞌiꞌ, xel lo che. 14 Ekꞌuchiriꞌ xuto e uqul ri Pedro, ruma rukiꞌkotemal na xujaq ta ri puerta. Ri xuꞌano e kanik xok tanchi ubꞌi pa ja y xuꞌtzijoj chike kꞌo ri Pedro chwach ri puerta.

15 Ekꞌu ri e kꞌo pa ja xkibꞌiꞌij che:

—Riꞌat xatchꞌuꞌjerik —xecha che.

Pero rali xujikibꞌaꞌ uwach chike lik qatzij la kubꞌiꞌij.

Yey xkibꞌiꞌij rike:

—Laj e u ángel ri kꞌo chiriꞌ —xechaꞌ.

16 Ekꞌu ri Pedro lik chak kꞌo che uchꞌawisaxik pan ri puerta. Ekꞌuchiriꞌ xkijaqo yey xkil ri Pedro, lik xkam kanimaꞌ che; ma lik kꞌayew chike kakikojo we qatzij ri ketajin che rilik.

17 Pero ri Pedro xuꞌan jun kꞌutubꞌal rukꞌ ruqꞌabꞌ chaꞌ ketzꞌinkaꞌnik. Xutzijoj kꞌu chike suꞌanik xesax lo ruma ri Qanimajawal chupa ri cárcel. Yey xubꞌiꞌij kꞌu chike:

—Tzijoj alaq waꞌ che ri Jacobo*Wa Jacobo na e ta ri xkamisaxik (v. 2); waꞌ e ri jun xuꞌan aj wach re ri iglesia y e uchaqꞌ ri Jesús. Mt. 13:55; Jn. 7:3-5; Hch. 1:14 y chike taq ri hermanos —xchaꞌ.

Tekꞌuchiriꞌ, xel bꞌi y xeꞌek pa jun chik luwar.

18 Echiriꞌ xsaqirik, xok jun sachibꞌal naꞌoj chikixoꞌl ri soldados. Xkijeq ketukukik ruma na ketaꞌam taj saꞌ ri xuꞌan ri Pedro, ma na jinta chik.

19 Ekꞌu ri Herodes xutaq utzukuxik ri Pedro. Yey ruma na xriqitaj taj, e xuta kichiꞌ ri soldados; tekꞌuchiriꞌ, xutaq kikamisaxik. Echiriꞌ xuꞌan waꞌ, ri Herodes xel bꞌi Judea y xeꞌek pa ri tinamit Cesarea y chiriꞌ xkanaj wi.

20 Ri rey Herodes lik kꞌo royowal chikij ri winaq e aj Tiro y e aj Sidón.†Ruma royowal, xebꞌuqꞌatej taq raj kꞌay e kꞌo chupa rutaqanik chaꞌ na kekꞌayin ta chi chike ri e aj Tiro y aj Sidón. Ekꞌu riꞌ wa kebꞌ tinamit xkichꞌaꞌbꞌej kibꞌ chikiwach re kebꞌeꞌchꞌaꞌta rukꞌ ri rey Herodes chaꞌ kakiꞌan utzil chomal chikiwach rukꞌ. Kꞌo kꞌu jun achi Blasto rubꞌiꞌ, waꞌ raj chak ri rey yey lik kꞌo uwach pa ri rocho ri rey. Xkikoj kꞌu kibꞌ chwach ri Blasto y xkipuaqij che chaꞌ rire kachꞌaw pakiwiꞌ chwach ri rey chaꞌ na jinta chi chꞌaꞌoj chikiwach. Y jelaꞌ raj kꞌay re rutinamit ri Herodes utz kakikꞌayij ri kajawax chike ri e aj Tiro y aj Sidón.

21 Ri rey Herodes xukoj kꞌu jun qꞌij chike re kakimol kibꞌ. Laꞌ la jun qꞌij xuwiq ribꞌ rukꞌ chomilaj kꞌul kꞌi rajil, xtzꞌuyiꞌ pa ri qꞌatbꞌal tzij y xuya kꞌu jujun uchꞌaꞌtem chikiwach ri tinamit.

22 Ekꞌu ri winaq xkijeqo lik ko kesikꞌinik kakibꞌiꞌij: «¡Waꞌ wa kaqato, na uqul ta juna achi; e uqul jun tiox!» kechaꞌ.

23 Xa pa joqꞌotaj kꞌu riꞌ jun ángel re ri Qajawal xukoj lo jun yabꞌil che ri Herodes; ma rire xukꞌul wa yakbꞌal uqꞌij xꞌanik, yey waꞌ xew taqal che ri Dios. Jekꞌuriꞌlaꞌ xtijiꞌ kuma amolo y ruma waꞌ xkamik.

24 Noꞌj kꞌu ri Utzilaj Tzij re ri Qanimajawal lik xeꞌek utzijoxik y lik katajin kikꞌiyarik ri kekojow re.

25 Echiriꞌ ri Bernabé y ri Saulo xkikꞌis ri chak yaꞌom chike,*Hch. 11:29, 30 xebꞌel chiriꞌ Jerusalem y xkikꞌam bꞌi ri Juan kukꞌ, ri kabꞌiꞌx Marcos che.